தமிழகத்தில் தெருக்கள், சாலைகள், குடியிருப்புகள் மற்றும் பிற பொது இடங்களின் பெயர்களில் இடம்பெற்றுள்ள சாதிப்பெயர்களை நீக்குவதற்கான அரசாணையை எதிர்த்து தாக்கல் செய்யப்பட்ட வழக்கு உயர்நீதிமன்ற மதுரை அமர்வில் விசாரணைக்கு வந்தது. இந்த வழக்கில் அரசாணைக்கு தடை விதிக்கக் கோரப்பட்ட நிலையில், நீதிமன்றம் அத்தகைய தடையை விதிக்க முடியாது என தெளிவுபடுத்தியது. வழக்கை தள்ளுபடி செய்து உத்தரவிட்ட நீதிபதிகள், அரசாணையின் நோக்கத்தை ஆதரிக்கும் வகையில் பல முக்கிய கருத்துகளை முன்வைத்தனர்.

தமிழக அரசு சமீபத்தில் வெளியிட்ட இந்த அரசாணை, குடியிருப்புகள், தெருக்கள், சாலைகள் மற்றும் நீர்நிலைகளில் உள்ள சாதி சார்ந்த பெயர்களை அகற்றி, புதிய பெயர்களை சூட்டுவதற்கான வழிகாட்டு நெறிமுறைகளை வகுத்துள்ளது. ஆதி திராவிடர் காலனி, ஹரிஜன் குடியிருப்பு, வண்ணான்குளம் போன்ற பெயர்கள் இதில் அடங்கும். இத்தகைய பெயர்கள் சமூகத்தில் பாகுபாட்டை நினைவூட்டுவதாகவும், சமத்துவத்தை பாதிப்பதாகவும் அரசு கருதியதால் இந்த நடவடிக்கை எடுக்கப்பட்டது. மனுதாரர் தரப்பில், பெயர் மாற்றத்தால் மக்களுக்கு குழப்பம் ஏற்படும் என்றும், ஆதார் அட்டை, வாக்காளர் அடையாள அட்டை போன்ற ஆவணங்களில் சிக்கல்கள் உருவாகும் என்றும் வாதிடப்பட்டது.

மேலும், இது அரசியல் நோக்கத்துடன் கொண்டு வரப்பட்டதாகவும் குற்றம்சாட்டப்பட்டது.ஆனால் நீதிமன்றம் இந்த வாதங்களை ஏற்கவில்லை. நீதிபதிகள் தங்கள் உத்தரவில், “தங்களது மனதில் சாதிப் பெயர்களைத் தக்கவைத்துக் கொண்டிருப்பவர்களின் மனதில் மட்டுமே பெயர்களைத் திருத்துவதால் குழப்பம் ஏற்படும்” என்று குறிப்பிட்டனர். சாதி என்பது மக்களின் மனதில் மட்டுமே இருக்கும் ஒன்று என்றும், அதை நீக்குவதற்கான முயற்சிகள் அவசியம் என்றும் அவர்கள் வலியுறுத்தினர். தற்போது நடைமுறையில் உள்ள சில பெயர்கள் மிகவும் இழிவானதாகவும், ஆட்சேபனைக்குரியதாகவும் உள்ளன என்பதை நீதிமன்றம் சுட்டிக்காட்டியது.

இதையும் படிங்க: பள்ளி சேர்க்கை படிவங்களில் இருந்து சாதி விவரம் நீக்கம்!! இமாச்சல் அரசு அசத்தல்..!!

இத்தகைய இழிவான சாதிப்பெயர்களை நீக்குவது சமூக நீதியை நிலைநாட்ட அவசியமானது என்ற நோக்கிலேயே அரசாணை பிறப்பிக்கப்பட்டுள்ளது என தெரிவிக்கப்பட்டது.நீதிமன்றம் மேலும் கூறியதாவது, பொது இடங்களில் சாதிப்பெயர்கள் தொடர்ந்து இருப்பது அரசியலமைப்பின் அடிப்படை மதிப்புகளுக்கு எதிரானது. சாதி வேறுபாடுகளை அகற்றி சமத்துவ சமூகத்தை உருவாக்கும் திசையில் அரசு எடுத்துள்ள இந்த முயற்சி பாராட்டத்தக்கது. பெயர் மாற்றத்தால் ஏற்படும் தற்காலிக சிரமங்கள் இருந்தாலும், அவை நீண்டகால நன்மைக்கு முன்னால் சிறியவை. மக்கள் மனநிலையில் மாற்றம் ஏற்பட வேண்டும் என்றாலும், பொது இடங்களில் இருந்து இழிவான பெயர்களை அகற்றுவது அந்த மாற்றத்திற்கு உதவும்.இந்த உத்தரவின் மூலம், தடை கோரிய மனு தள்ளுபடி செய்யப்பட்டது. 

இதையும் படிங்க: கடைகளுக்கு தமிழில் பெயர் பலகைகள்... நவ. 1 வரை கெடு..! ஹைகோர்ட் உத்தரவு..!!