தமிழகச் சட்டமன்றத் தேர்தலுக்கானத் தயார்நிலை குறித்து ஆய்வு செய்வதற்காக, இந்தியத் தலைமைத் தேர்தல் ஆணையர் ஞானேஷ்குமார் தலைமையிலான உயர்மட்டக் குழுவினர் இன்று (பிப்ரவரி 26) சென்னை வந்தடைந்தனர். புதுச்சேரியில் தேர்தல் ஆய்வுகளை முடித்துக்கொண்டு சென்னை வந்த இக்குழுவினர், தமிழகத்தின் 38 மாவட்டங்களைச் சேர்ந்த தேர்தல் அதிகாரிகள் மற்றும் காவல்துறையினருடன் விரிவான ஆலோசனைகளை மேற்கொண்டு வருகின்றனர்.
தலைமைத் தேர்தல் ஆணையர் ஞானேஷ்குமார், தேர்தல் ஆணையர்கள் சுக்பீர் சிங் சந்து மற்றும் விவேக் ஜோஷி ஆகியோர் அடங்கிய 7 பேர் கொண்ட குழு, தமிழகத்தின் 38 மாவட்ட ஆட்சியர்கள் (மாவட்டத் தேர்தல் அதிகாரிகள்), காவல்துறை கண்காணிப்பாளர்கள் (SP) ஆகியோருடன் தனித்தனியாக ஆலோசனை நடத்தினர். இந்த ஆய்வில் சென்னை மற்றும் பிற மாநகரக் காவல் ஆணையர்கள், மண்டல ஐ.ஜி.க்கள் (IG), சரக டி.ஐ.ஜி.க்கள் (DIG) ஆகியோர் கலந்து கொண்டனர். தேர்தல் நேரத்தில் சட்டம் ஒழுங்கைப் பராமரித்தல் மற்றும் பதற்றமான வாக்குச் சாவடிகளில் கூடுதல் பாதுகாப்பு வழங்குவது குறித்து விவாதிக்கப்பட்டது.
பணப்பட்டுவாடா, இலவசங்கள், மது மற்றும் போதைப் பொருட்கள் விநியோகத்தைத் தடுத்து நிறுத்தவும், தேர்தல் நடத்தை விதிமுறைகளை (Model Code of Conduct) எவ்வித பாரபட்சமுமின்றி அமல்படுத்தவும் அதிகாரிகளுக்கு ஆணையர் உத்தரவிட்டுள்ளார். மாவட்ட அதிகாரிகளுடனான கூட்டத்திற்குப் பிறகு, அங்கீகரிக்கப்பட்ட அரசியல் கட்சிகளின் பிரதிநிதிகளையும் தேர்தல் ஆணையக் குழுவினர் சந்தித்துப் பேசினர். அப்போது தேர்தலை எத்தனை கட்டங்களாக நடத்துவது மற்றும் வாக்காளர் பட்டியலில் உள்ள குறைகள் குறித்தக் கருத்துகள் கேட்டறியப்பட்டன. சமீபத்தில் வெளியிடப்பட்ட இறுதி வாக்காளர் பட்டியலின்படி, தமிழகத்தில் தற்போது 5.67 கோடி வாக்காளர்கள் உள்ளனர். தேர்தல் பணிகளில் வெளிப்படைத்தன்மையை உறுதி செய்யத் தொழில்நுட்ப உதவிகளைப் பயன்படுத்துமாறு அதிகாரிகளுக்கு அறிவுறுத்தப்பட்டது.
இதையும் படிங்க: நெருங்கும் சட்டசபை தேர்தல்..!! தலைமை தேர்தல் ஆணையர் நாளை தமிழகம் விசிட்..!!
நாளை (பிப்ரவரி 27) தமிழக அரசின் தலைமைச் செயலாளர் மற்றும் டிஜிபி (DGP) ஆகியோருடன் இறுதிக்கட்ட ஆலோசனை நடத்திய பிறகு, செய்தியாளர்களைச் சந்தித்துத் தேர்தல் ஆணையம் முக்கிய அறிவிப்புகளை வெளியிடும் என எதிர்பார்க்கப்படுகிறது.
இதையும் படிங்க: சட்டமன்றத் தேர்தல் 2026..: சென்னையில் தலைமை தேர்தல் ஆணையர் ஞானேஷ் குமார் ஆலோசனை!