தமிழகத்தில் வடகிழக்குப் பருவமழை தீவிரம் அடைந்து வரும் நிலையில், தென்மேற்கு வங்கக்கடல் மற்றும் தமிழகக் கடலோரப் பகுதிகளில் நிலவும் வளிமண்டல மேலடுக்கு சுழற்சியின் காரணமாக, தலைநகர் சென்னைக்கு இன்று மிகத் தீவிரமான 'ரெட் அலர்ட்' (Red Alert) விடுக்கப்பட்டுள்ளது; மேலும் செங்கல்பட்டு, திருவள்ளூர் உள்ளிட்ட வட மாவட்டங்களுக்கும், கோவை, நீலகிரி, தேனி உள்ளிட்ட மேற்கு மற்றும் மலை மாவட்டங்களுக்கும் மிகக் கனமழைக்கான 'ஆரஞ்ச் அலர்ட்' (Orange Alert) விடுத்து சென்னை மண்டல வானிலை ஆய்வு மையம் அதிரடி எச்சரிக்கை மணி அடித்துள்ளது.
சென்னையில் ஏற்கனவே நேற்று இரவு முதல் கொட்டித் தீர்த்த கனமழையால் நகரின் தாழ்வான பகுதிகள் பலவும் வெள்ளக் காடாகக் காட்சியளிக்கும் நிலையில், தற்போதைய மேகக் கட்டமைப்புகளின் தீவிரத்தைக் கருத்தில் கொண்டு சென்னைக்கு 'ரெட் அலர்ட்' விடுக்கப்பட்டுள்ளது. இதன் காரணமாக, இன்று சென்னையில் 20 சென்டிமீட்டருக்கும் அதிகமான அதீத கனமழை கொட்டித் தீர்க்க வாய்ப்புள்ளதாக வானிலை மையம் எச்சரித்துள்ளது.
அதேபோல், சென்னையை ஒட்டியுள்ள செங்கல்பட்டு மற்றும் திருவள்ளூர் மாவட்டங்களுக்கும், மேற்குத் தொடர்ச்சி மலைப்பகுதிகளை ஒட்டியுள்ள நீலகிரி, கோயம்புத்தூர் மற்றும் தேனி ஆகிய மாவட்டங்களுக்கும் மிகக் கனமழைக்கான 'ஆரஞ்ச் அலர்ட்' விடுக்கப்பட்டுள்ளது. இந்த மாவட்டங்களில் 11 முதல் 20 சென்டிமீட்டர் வரை பலத்த மழை பெய்யக்கூடும் என்பதால், மலைப்பகுதிகளில் திடீர் வெள்ளப்பெருக்கு மற்றும் மண்சரிவு அபாயங்கள் ஏற்படும் வாய்ப்புள்ளதாகக் கூறி உள்ளூர் நிர்வாகங்கள் எச்சரிக்கப்பட்டுள்ளன.
இதையும் படிங்க: மின்மிகை மாநிலத்திற்கு இந்த அவலமா?: ரூ.35 மின் கொள்முதலுக்கு பிரேமலதா கண்டனம்!
மேலும் தென் மாவட்டங்களான சிவகங்கை, ராமநாதபுரம் உள்ளிட்ட பகுதிகளிலும் வளிமண்டல மேலடுக்கு சுழற்சியின் தாக்கத்தால் பரவலாக இடி, மின்னலுடன் கூடிய பலத்த கனமழை பெய்ய வாய்ப்புள்ளதாகத் தெரிவிக்கப்பட்டுள்ளது.
இந்தத் தீவிர எச்சரிக்கையைத் தொடர்ந்து, தமிழக அரசு நிர்வாகம் பேரிடர் மீட்புப் பணிகளைப் போர்க்கால அடிப்படையில் முடுக்கிவிட்டுள்ளது. சென்னை மாநகராட்சி முழுவதும் 15 மண்டலங்களிலும் தேசிய மற்றும் மாநிலப் பேரிடர் மீட்புப் படையினர் (NDRF & SDRF), தீயணைப்புப் படையினர் மற்றும் மீட்புப் படகுகள் தயார் நிலையில் நிறுத்தப்பட்டுள்ளன. தாழ்வான பகுதிகளில் உள்ள மக்கள் உடனடியாகப் பாதுகாப்பான நிவாரண முகாம்களுக்குச் செல்ல அறிவுறுத்தப்பட்டுள்ளனர்.
மழைப்பொழிவு உச்சத்தில் இருக்கும் போது பொதுமக்கள் அத்தியாவசியத் தேவைகளின்றி வீடுகளை விட்டு வெளியே வர வேண்டாம் என்றும், மின்கம்பங்கள், மரங்கள் மற்றும் தேங்கியுள்ள நீர்நிலைகளின் அருகில் செல்வதைத் தவிர்க்க வேண்டும் என்றும் தமிழ்நாடு பேரிடர் மேலாண்மை ஆணையம் பொதுமக்களுக்குக் கண்டிப்பான அறிவுறுத்தல்களை வழங்கியுள்ளது.
இதையும் படிங்க: தமிழ்நாட்டின் புதிய முழுநேர ஆளுநராக ராஜேந்திர விஸ்வநாத் அர்லேகர் நியமனம்!