2026 சட்டமன்றத் தேர்தலில் போட்டியிடாமல் திமுக கூட்டணிக்கு நிபந்தனையற்ற ஆதரவு வழங்கிய கமல்ஹாசனின் முடிவை வரவேற்றுள்ள தமிழ்நாடு முதலமைச்சர் மு.க.ஸ்டாலின், அவர் செய்திருப்பது மாபெரும் தியாகம் என்று நெகிழ்ச்சியுடன் தெரிவித்துள்ளார். மக்கள் நீதி மய்யத்தின் இந்தத் திடீர் அறிவிப்பு வெளியான சில மணி நேரங்களிலேயே, அதற்குப் பதில் அளிக்கும் வகையில் முதலமைச்சர் தனது மனமார்ந்த நன்றிகளைப் பதிவு செய்துள்ளார். இது தியாகம் அல்ல, கடமை என்று கமல் அடக்கத்துடன் குறிப்பிட்டிருந்தாலும், அரசியல் ரீதியாக இது ஒரு மிகப்பெரிய அர்ப்பணிப்பு என்பதை முதலமைச்சர் சுட்டிக்காட்டியுள்ளார்.

கமலுக்கு நான் எப்படி நன்றி சொல்வது என்றே தெரியவில்லை; அவரது முடிவு என்னை மிகவும் நெகிழ வைத்துவிட்டது என்று குறிப்பிட்ட முதலமைச்சர், இந்தத் தாராள மனப்பான்மை தமிழக அரசியல் வரலாற்றில் ஒரு மைல்கல் என்று புகழ்ந்துள்ளார். தொகுதிகள் மற்றும் சின்னம் தொடர்பான சிக்கல்களைக் கடந்து, தமிழகத்தின் நலன் மற்றும் மதவாத சக்திகளை வீழ்த்த வேண்டும் என்ற ஒற்றை இலக்கிற்காகத் தனது கட்சியின் அடையாளத்தைப் பின்னுக்குத் தள்ளிவிட்டு, கூட்டணி தர்மத்திற்காகக் களம் இறங்கியுள்ள கமல்ஹாசனின் முதிர்ச்சியை அவர் வெகுவாகப் பாராட்டியுள்ளார்.

இதையும் படிங்க: #BREAKING: தேர்தலில் மநீம போட்டியில்லை! கமல் அறிவிப்பு!

கமல்ஹாசன் மட்டுமன்றி, அவரது முடிவுக்குக் கட்டுப்பட்டு ஒட்டுமொத்தமாகத் திமுகவின் வெற்றிக்காக உழைக்க முன்வந்துள்ள மக்கள் நீதி மய்யத்தின் உறுப்பினர்கள் மற்றும் நிர்வாகிகள் அனைவருக்கும் தனது மனமார்ந்த நன்றியைத் தெரிவிப்பதாக முதலமைச்சர் கூறியுள்ளார். தமிழக உரிமைகளைக் காக்கும் இந்தப் போரில், கமல்ஹாசனின் இந்தத் தியாகம் வீண் போகாது என்றும், திராவிட மாடல் 2.0 அரசு அமைவதில் இது முக்கியப் பங்காற்றும் என்றும் அவர் நம்பிக்கை தெரிவித்துள்ளார். கமல்ஹாசனின் இந்த நகர்வு, தேர்தல் களத்தில் திமுக தலைமையிலான கூட்டணியின் பலத்தை இரட்டிப்பாக்கியுள்ளதாகவே அரசியல் வட்டாரங்கள் கருதுகின்றன.

இதையும் படிங்க: திமுக கூட்டணியில் தேமுதிகவுக்கு 10 தொகுதிகள் ஒதுக்கீடு!