பெருநகர சென்னை மாநகராட்சி, நடப்பு நிதியாண்டின் இரண்டாவது அரையாண்டு சொத்து வரியை விரைவில் செலுத்தும் குடியிருப்பு மற்றும் வணிகக் கட்டிட உரிமையாளர்களுக்கு 5 சதவீத ஊக்கத்தொகை வழங்கப்படும் என அறிவித்துள்ளது. இந்த சலுகை அக்டோபர் 31ஆம் தேதிக்குள் வரியை செலுத்துபவர்களுக்கு மட்டுமே பொருந்தும். அதிகபட்சமாக ரூ.5,000 வரை தள்ளுபடி கிடைக்கும் என மாநகராட்சி வருவாய் அதிகாரிகள் தெரிவித்துள்ளனர்.
சென்னையில் சொத்து வரி ஆண்டுக்கு இருமுறை வசூலிக்கப்படுகிறது. முதல் அரையாண்டு (ஏப்ரல்-செப்டம்பர்) காலக்கெடு செப்டம்பர் 30 உடன் முடிவடைந்த நிலையில், இரண்டாவது அரையாண்டு (அக்டோபர்-மார்ச்) காலம் தற்போது தொடங்கியுள்ளது. அரையாண்டு தொடங்கிய முதல் 30 நாட்களுக்குள் வரியை முன்கூட்டியே செலுத்துவோருக்கு இந்த ஊக்கத்தொகை வழங்குவது மாநகராட்சியின் வழக்கமான நடைமுறையாகும்.
இதன் மூலம் வரி செலுத்துவோர் சிறிய அளவில் நிவாரணம் பெறலாம் என்பதுடன், மாநகராட்சி வருவாய் வசூலையும் விரைவுபடுத்த முடியும். மாநகராட்சி அதிகாரி ஒருவர் கூறுகையில், “நீண்ட காலமாக நிலுவையில் உள்ள சொத்து வரி தொகை சுமார் ரூ.300 கோடியாக உள்ளது.
இதையும் படிங்க: மக்களே கவனிங்க... சொத்துவரி செலுத்த இன்றே கடைசி நாள்..! சென்னை மாநகராட்சி அறிவுறுத்தல்.!!
இதில் ரூ.90 கோடி தொகைக்கு நீதிமன்ற வழக்குகள் நிலுவையில் இருப்பதால், அந்தப் பகுதியில் தற்போது எந்த கூடுதல் நடவடிக்கையும் எடுக்க முடியவில்லை. நிலுவைத் தொகையை வசூலிப்பது குறித்து மாநில அரசுக்கு தெரிவிக்க உள்ளோம். அரசின் முடிவு கிடைத்த பிறகு அடுத்த கட்ட நடவடிக்கைகள் மேற்கொள்ளப்படும்” என்றார்.
நடப்பு நிதியாண்டின் முதல் அரையாண்டில் மட்டும் ரூ.1,119 கோடி சொத்து வரி வசூல் செய்யப்பட்டுள்ளது. ஆண்டு இலக்கு ரூ.1,250 கோடியாக நிர்ணயிக்கப்பட்டுள்ளது. இலக்கை எட்டுவதற்கு பொதுமக்களின் ஒத்துழைப்பு அவசியம் என அதிகாரிகள் வலியுறுத்தியுள்ளனர். தாமதமாக செலுத்தினால் மாதத்திற்கு 1 சதவீத எளிய வட்டி அபராதமாக விதிக்கப்படும் என்பதால், சலுகையைப் பயன்படுத்திக்கொள்ள பொதுமக்கள் அழைக்கப்பட்டுள்ளனர்.
வரியை ஆன்லைனில் tnurbanepay.tn.gov.in போர்டல், நம்ம சென்னை ஆப், யூபிஐ, அல்லது மாநகராட்சி அலுவலகங்கள் மற்றும் பொது சேவை மையங்கள் வழியாக எளிதாக செலுத்தலாம். இந்த ஊக்கத்தொகை திட்டம், சரியான நேரத்தில் வரி செலுத்துவதை ஊக்குவித்து மாநகராட்சியின் நிதிநிலையை மேம்படுத்த உதவும் என எதிர்பார்க்கப்படுகிறது. சொத்து உரிமையாளர்கள் இந்த வாய்ப்பை பயன்படுத்திக்கொண்டு, அக்டோபர் மாதத்திற்குள் வரியை செலுத்தி சலுகையைப் பெறலாம் என மாநகராட்சி அறிவுறுத்தியுள்ளது.
இதையும் படிங்க: மக்களே கவனிங்க... சொத்துவரி செலுத்த இன்றே கடைசி நாள்..! சென்னை மாநகராட்சி அறிவுறுத்தல்.!!