கோவை கவுண்டம்பாளையம் வீட்டு வசதி வாரிய குடியிருப்பில் அடுத்தடுத்து 13 வீடுகளின் பூட்டை உடைத்து 56 சவரன் நகைகள் மற்றும் ரூ.3 லட்சம் திருடிய வழக்கில் தொடர்புடைய உத்தர பிரதேசத்தை சேர்ந்த மூன்று பேரை தனிப்படை போலீசார் சுட்டு பிடித்தனர்.
கோவை கவுண்டம்பாளையம் பகுதியில் வீட்டு வசதி வாரியத்திற்கு சொந்தமான குடியிருப்புகள் அமைந்துள்ளது. 6 பிளாக் உள்ள இந்த குடியிருப்பில் 1,848 வீடுகள் உள்ளது. இங்கு அரசு அலுவலர்கள், மாநகராட்சி ஊழியர்கள் உள்ளிட்ட ஏராளமானோர் தங்கி உள்ளனர். இந்த நிலையில் நேற்று மதியம் அங்குள்ள ஏ பிளாக்கில் மூன்று வீடுகளிலும், சி(3) பிளாக்கில் 10 வீடுகளின் பூட்டை உடைக்கப்பட்டு நகைகள், பணம் திருடப்பட்டது தெரியவந்தது.
இதையடுத்து அக்குடியிருப்பு மக்கள் கவுண்டம்பாளையம் போலீசாருக்கு தகவல் அளித்தனர். சம்பவ இடத்திற்கு வந்த போலீசார் கைரேகை நிபுணர்கள் உதவியுடன் வீடுகளில் பதிவான கைரேகைகளை சேகரித்தனர், மேலும் மோப்ப நாய் உதவியுடன் வளாகம் முழுவதும் சோதனையிட்டனர். விசாரணையில் குடியிருப்பில் வசித்து வரும் நில எடுப்பு பிரிவு வருவாய் அலுவலர் வீட்டில் இருந்து 30 சவரன் நகைகள் என கிட்டத்தட்ட 56 சவரன் தங்க நகைகள் மற்றும் ரூ. 3 லட்சம் பணம் திருடப்பட்டது தெரியவந்தது.
இதையும் படிங்க: #BREAKING கோவையில் 13 வீடுகளில் அடுத்தடுத்து நடந்த பயங்கரம்... 3 வடமாநில கொள்ளையர்கள் சுட்டுப்பிடிப்பு...!
மேலும் சம்பவ இடத்திற்கு வந்த கோவை மாநகர காவல் ஆணையர் சரவணசுந்தர் நேரில் ஆய்வு மேற்கொண்டு விசாரணையை தீவிரபடுத்த உத்தரவிட்டார். இந்த திருட்டு சம்பவம் தொடர்பாக கவுண்டம்பாளையம் போலீசார் வழக்கு பதிவு செய்து மூன்று தனிப்படைகள் அமைத்து விசாரணையை தீவிரபடுத்தினர். முதல் கட்டமாக மேட்டுப்பாளையம் சாலையில் குடியிருப்பு அருகே பொருத்தப்பட்டுள்ள சிசிடிவி கேமரா காட்சிகளை சேகரித்து அதனை ஆய்வு மேற்கொண்டனர். அதன் அடிப்படையில் கண்டறியப்பட்ட நபர்களை தீவிரமாக தேடும் பணியை துவங்கி, அந்த மர்ம நபர்கள் சென்ற பகுதிகளில் உள்ள சிசிடிவி காட்சிகளையும் சேகரித்து போலீசார் பின் தொடர்ந்தனர்.
இதையடுத்து இந்த வழக்கில் தொடர்புடைய மூன்று பேர் கோவை குனியமுத்தூர் அடுத்த குளத்துப்பாளையம் செல்லும் வழியில் திருநகர் காலணியில் உள்ள வீட்டில் பதுங்கி இருப்பது போலீசாருக்கு தெரியவந்தது. இதையடுத்து அங்கு சென்ற தனிப்படை போலீசார் வீட்டில் பதுங்கி இருந்த மூவரையும் பிடிக்க முயன்றனர். அப்போது அங்கிருந்த தலைமை காவலர் பார்த்திபன் என்பவரை அந்த நபர்கள் அறிவாளால் வெட்டிவிட்டு, தப்ப முயன்றனர். அப்போது மூவரையும் போலீசார் காலில் துப்பாக்கியால் சுட்டு பிடித்தனர்.
இதையடுத்து சுட்டுப் பிடிக்கப்பட்ட மூவரையும் போலீசார் ஆம்புலன்ஸ் மூலம் கோவை அரசு மருத்துவமனைக்கு அழைத்து வந்தனர். அங்கு மூன்று பேருக்கும் தீவிர சிகிச்சை அளிக்கப்பட்டு வருகிறது. முதல் கட்ட விசாரணையில் பிடிபட்ட நபர்கள் உத்தரப்பிரதேச மாநிலத்தை சேர்ந்த ஆசிப்(48), இர்பான்(45), ஆரிப் கஜிவாலா (60), என்பது தெரியவந்தது. சுட்டுப் பிடிக்கப்பட்ட மூவரும் கோவை அரசு மருத்துவமனையில் சிகிச்சை பெற்று வரும் நிலையில் அவர்களிடம் மாநகர காவல் துணை ஆணையர் தேவநாதன் நேரில் விசாரணை மேற்கொண்டார்.
மேலும் கொள்ளையர்களை பிடிக்க முயன்ற போது அறிவாளால் வெட்டப்பட்டு காயமடைந்த தலைமை காவலர் பார்த்திபனை பார்த்து நலம் விசாரித்தார். தொடர்ந்து பிடிபட்ட நபர்கள் வேறு எங்காவது திருட்டுச் சம்பவங்களில் ஈடுபட்டுள்ளனரா? என்ற கோணத்தில் போலீசார் விசாரணையை தீவிரப்படுத்தி உள்ளனர்.
இதையும் படிங்க: #BREAKING கோவையில் 13 வீடுகளில் அடுத்தடுத்து நடந்த பயங்கரம்... 3 வடமாநில கொள்ளையர்கள் சுட்டுப்பிடிப்பு...!