தமிழ்நாட்டில் இந்த ஆண்டு தொடக்கம் முதல் செப்டம்பர் 30-ஆம் தேதி வரை 18 ஆயிரத்துக்கும் மேற்பட்டோர் டெங்கு காய்ச்சலால் பாதிக்கப்பட்டுள்ளதாகவும், 9 பேர் உயிரிழந்துள்ளதாகவும் சுகாதாரத்துறை தரவுகள் தெரிவிக்கின்றன. செப்டம்பர் மாதத்தில் மட்டும் சென்னையில் டெங்கு பாதிப்பு கணிசமாக அதிகரித்துள்ளது. ஆகஸ்ட் மாதத்தில் 605 பேர் பாதிக்கப்பட்ட நிலையில், செப்டம்பர் மாதத்தில் இந்த எண்ணிக்கை 1,290-ஆக உயர்ந்துள்ளது.

முன்னதாக செப்டம்பர் 16-ஆம் தேதி நிலவரப்படி தமிழ்நாட்டில் 16,334 டெங்கு பாதிப்புகளும் 9 உயிரிழப்புகளும் பதிவாகியிருந்தன. அதே காலகட்டத்தில் 2025-ஆம் ஆண்டு 15,688 பாதிப்புகளும் 13 உயிரிழப்புகளும் பதிவாகியிருந்த நிலையில், 2024-ஆம் ஆண்டு 34,339 பேர் பாதிக்கப்பட்டிருந்தனர். தற்போதைய அதிகரிப்பு பருவகால மாற்றங்களுடன் தொடர்புடையதாக இருப்பதாக சுகாதாரத்துறை தெரிவித்துள்ளது.

குறிப்பாக, வடகிழக்கு பருவமழை தொடங்கும் காலகட்டத்தில் மழைநீர் தேங்குவதால் டெங்கு கொசுக்கள் உற்பத்தியாகும் வாய்ப்பு அதிகரிக்கிறது. இதனால் வீடுகள் மற்றும் சுற்றுப்புறங்களில் தண்ணீர் தேங்காமல் பார்த்துக்கொள்ள வேண்டும் என சுகாதாரத்துறை தொடர்ந்து வலியுறுத்தி வருகிறது.

இதையும் படிங்க: சர்ரென குறையும் டெங்கு பாதிப்பு... சென்னை மாநகராட்சி ஆணையரின் அப்டேட்... மக்கள் நிம்மதி..!!

எந்தெந்த மாவட்டங்களில் பாதிப்பு அதிகம்?

சென்னை, திருவள்ளூர், காஞ்சிபுரம் மற்றும் செங்கல்பட்டு மாவட்டங்களில் டெங்கு பாதிப்பு அதிகமாக இருப்பதாக சுகாதாரத்துறை கண்காணிப்பில் தெரியவந்துள்ளது. கள்ளக்குறிச்சி மாவட்டத்திலும் பாதிப்பு அதிகரித்து வருவதாக தெரிவிக்கப்பட்டுள்ளது. இந்த பகுதிகளில் கொசு உற்பத்தியாகும் இடங்களை கண்டறிந்து உடனடியாக அழிக்க அதிகாரிகளுக்கு அறிவுறுத்தப்பட்டுள்ளது.

சென்னையிலும் டெங்கு தடுப்பு நடவடிக்கைகள் தீவிரப்படுத்தப்பட்டுள்ளன. செப்டம்பர் மாதத்தில் மட்டும் 1,293 டெங்கு பாதிப்புகள் பதிவாகியதாகவும், ஆண்டு தொடக்கம் முதல் செப்டம்பர் வரை சென்னையில் மொத்தம் 4,592 பேர் பாதிக்கப்பட்டதாகவும் மாநகராட்சி தரப்பில் தெரிவிக்கப்பட்டுள்ளது. அதே நேரத்தில், பாதிப்பு குறையத் தொடங்கியுள்ளதற்கான அறிகுறிகள் இருப்பதாகவும் அதிகாரிகள் தெரிவித்துள்ளனர்.

சென்னை புறநகரில் அவலம்:

சென்னை மட்டுமின்றி புறநகர் பகுதிகளான சிட்லம்பாக்கம், தாம்பரம், பெருங்களத்தூர், குரோம்பேட்டை சுற்றுவட்டாரப் பகுதிகளில் காய்ச்சல் பாதிப்பு அதிகரித்து வருகிறது. இதனால் தாம்பரம் அரசு மருத்துவமனைக்கு காய்ச்சல் பாதிப்புடன் வருவோர் எண்ணிக்கை நாளுக்கு நாள் அதிகரித்து வருகிறது. தினந்தோறும் ஆயிரத்திற்கும் மேற்பட்டோர் சிகிச்சைக்காக வரும் நிலையில், அதில் 100க்கும் மேற்பட்டோருக்கு காய்ச்சல் பாதிப்பு உறுதி செய்யப்படுவதாகவும், அதிலும் குறிப்பாக சுமார் 15க்கும் மேற்பட்டோர் டெங்குவால் பாதிக்கப்பட்டிருப்பதும் தெரியவந்துள்ளது. 

சென்னை புறநகர் பகுதிகளில் டெங்கு கொசு ஒழிப்பு பணிகளை முறையாக மேற்கொள்ளாததே இதற்கு காரணம் என பொதுமக்கள் குற்றம்சாட்டியுள்ளனர். குறிப்பாக டெங்கு காய்ச்சலால் கர்ப்பிணிகள் மற்றும் குழந்தைகள் அதிக அளவில் பாதிக்கப்பட்டு வருவது பேரதிர்ச்சியை ஏற்படுத்தியுள்ளது. 

குழந்தைகள், கர்ப்பிணிகள் கூடுதல் கவனம்:

காய்ச்சல் ஏற்பட்ட குழந்தைகளை பள்ளிக்கு அனுப்ப வேண்டாம் என்றும், காய்ச்சல் நீடித்தால் உடனடியாக மருத்துவ பரிசோதனை மேற்கொள்ள வேண்டும் என்றும் சுகாதாரத்துறை அறிவுறுத்தியுள்ளது. கர்ப்பிணிகள், குழந்தைகள் உள்ளிட்ட பாதிக்கப்படக்கூடியவர்கள் காய்ச்சல் ஏற்பட்டால் மருத்துவர்களின் ஆலோசனையைப் பெறுவது முக்கியம்.

டெங்கு பாதிப்பு ஏற்பட்டால் காய்ச்சல், தலைவலி, உடல்வலி, தசைவலி, சோர்வு உள்ளிட்ட அறிகுறிகள் ஏற்படலாம். சிலருக்கு வயிற்று வலி, தொடர்ந்து வாந்தி, ரத்தப்போக்கு போன்ற எச்சரிக்கை அறிகுறிகளும் ஏற்படக்கூடும். குறிப்பாக காய்ச்சல் குறைந்துவிட்டதால் ஆபத்து முடிந்துவிட்டது என்று கருதக்கூடாது; டெங்குவின் முக்கியமான கட்டம் காய்ச்சல் குறைந்த பிறகும் ஏற்படலாம் என மருத்துவர்கள் எச்சரிக்கின்றனர்.

இதையும் படிங்க: #BREAKING அச்சத்தின் உச்சத்தில் மக்கள்...சென்னையில் இரு மடங்கான டெங்கு பாதிப்பு... ஒட்டுமொத்த தமிழகத்தில் இவ்வளவா?