கரூர் மாவட்டம், குளித்தலை அருகே இரும்பூதிப்பட்டியில் நடந்த கல்குவாரி தாக்குதல் சம்பவத்தில், ஸ்ரீரங்கம் தி.மு.க. எம்.எல்.ஏ. பழனியாண்டி உட்பட மூன்று பேருக்கு ஜாமின் கிடைத்துள்ளது. இச்சம்பவம் தமிழக அரசியலில் பெரும் பரபரப்பை ஏற்படுத்தியுள்ளது.

தாக்குதல் சம்பவம் கடந்த ஜனவரி 30ஆம் தேதி நடந்தது. திருச்சி மாவட்டம் லால்குடி அருகே தாளக்குடியைச் சேர்ந்த தனியார் டிவி நிருபர் கதிரவன் (45), கேமராமேன் செபாஸ்டியன் (47) உட்பட ஐந்து பேர் குளித்தலை அருகே உள்ள கல்குவாரிக்கு சென்றனர். 

அங்கு அவர்கள் தாக்கப்பட்டதாகவும், அடித்து உதைக்கப்பட்டதாகவும் கதிரவன் குளித்தலை போலீசில் புகார் அளித்தார். புகாரில், ஸ்ரீரங்கம் தி.மு.க. எம்.எல்.ஏ. பழனியாண்டி தலைமையிலான கும்பல் தாக்கியதாக குற்றம் சாட்டப்பட்டது.

இதையும் படிங்க: பிப்., 22 என்ன நடக்கும்?! திமுக அட்ராசிட்டியால் காங்., அப்செட்?! விஜய் உடன் பேச்சு நடத்த ராகுல்காந்தி ப்ளான்?!

அதே சமயம், கல்குவாரி உரிமையாளரான எம்.எல்.ஏ. பழனியாண்டியின் மகன் விமலாதித்தன் (32) தரப்பிலும் புகார் அளிக்கப்பட்டது. அவர்கள் ஐந்து பேரும் பணம் கேட்டு மிரட்டியதாகவும், வீடியோ எடுத்து மிரட்டியதாகவும், தாக்கியதாகவும் கூறப்பட்டது. இதனால் இரு தரப்பு புகார்களின் அடிப்படையில் குளித்தலை போலீசார் வழக்கு பதிவு செய்தனர்.

நிருபர் கதிரவன் புகாரின் பேரில், பழனியாண்டி, விமலாதித்தன் உட்பட 20 பேர் மீது ஐந்து பிரிவுகளின் கீழ் (ஜாமின் வெளியே வரக்கூடிய பிரிவுகள்) வழக்கு பதிவு செய்யப்பட்டது. விமலாதித்தன் புகாரின் பேரில், கதிரவன் உட்பட ஐந்து பேர் மீது நான்கு பிரிவுகளின் கீழ் வழக்கு பதிவானது.

இந்நிலையில், நேற்று (பிப்ரவரி 12) கரூர் ஜே.எம்.1 நீதிமன்றத்தில் எம்.எல்.ஏ. பழனியாண்டி, அவரது மகன் விமலாதித்தன், தம்பி பெரியசாமி ஆகிய மூவரும் சரணடைந்தனர். வழக்கை விசாரித்த நீதிபதி பரத்குமார், மூவருக்கும் ஜாமின் வழங்கி உத்தரவிட்டார். இதனால் மூவரும் நீதிமன்ற காவலில் இருந்து விடுதலையாகி வெளியே வந்தனர்.

இச்சம்பவம் தொடர்பாக இரு தரப்பும் ஒருவரையொருவர் குற்றம்சாட்டி வருவதால், விசாரணை முழுமையாக நடைபெற வேண்டும் என்பது பொதுமக்களின் எதிர்பார்ப்பாக உள்ளது. தனியார் ஊடக நிருபர்கள் தாக்கப்பட்ட சம்பவம், கல்குவாரி உரிமையாளர்கள் தரப்பு புகார், எம்.எல்.ஏ. குடும்பத்தினர் ஜாமின் என பல்வேறு கோணங்களில் இந்த வழக்கு விவாதத்துக்கு உள்ளாகியுள்ளது. குளித்தலை பகுதியில் பதற்றம் நீடிப்பதாகவும், போலீசார் தீவிர கண்காணிப்பில் ஈடுபட்டுள்ளதாகவும் தகவல்கள் தெரிவிக்கின்றன.

இந்த சம்பவம் தமிழகத்தில் ஊடக சுதந்திரம், அரசியல் செல்வாக்கு, கல்குவாரி மோதல்கள் போன்ற பிரச்சினைகளை மீண்டும் வெளிச்சத்துக்கு கொண்டு வந்துள்ளது.

இதையும் படிங்க: இதமட்டும் பண்ணிடாதீங்க! ஓட்டு பூரா விஜய்க்கு போயிரும்! திமுகவுக்கு திருமாவளவன் கொடுத்த வார்னிங்!