சட்டவிரோத கல் குவாரி நடவடிக்கைகளுக்குக் குறைந்தபட்ச அபராதம் மட்டுமே விதிக்கும் வகையில் தமிழக அரசு வெளியிட்ட சர்ச்சை அரசாணைக்கு விதிக்கப்பட்ட இடைக்காலத் தடையை நீட்டித்து சென்னை உயர்நீதிமன்ற மதுரைக் கிளை இன்று உத்தரவிட்டுள்ளதுடன், அந்த அரசாணையை அரசே விரைவில் திரும்பப் பெறப் பரிந்துரைத்துள்ளதாகத் தமிழக அரசுத் தரப்பில் நீதிமன்றத்தில் தெரிவிக்கப்பட்டுள்ளது.

மதுரையைச் சேர்ந்த மூர்த்தி என்பவர் உயர்நீதிமன்ற மதுரைக் கிளையில் தாக்கல் செய்த பொதுநல மனுவில், தமிழகத்தில் சட்டவிரோத குவாரி நடவடிக்கைகளால் அருகிலுள்ள விவசாய நிலங்கள் பெருமளவில் மலடாகிப் பாதிக்கப்பட்டு வருகின்றன; கனிமங்களை அளவுக்கு அதிகமாக வெட்டி எடுப்பதற்காக ஆபத்தான மற்றும் அதிக சக்தி வாய்ந்த வெடிபொருட்கள் பயன்படுத்தப்பட்டு வருகின்றன.

இந்நிலையில், தமிழக இயற்கை வளங்கள் துறை கடந்த ஜனவரி 22-ஆம் தேதி பிறப்பித்த அரசாணையில், அனுமதிக்கப்பட்ட வரம்பை மீறி கனிமங்களை வெட்டி எடுத்தாலோ அல்லது குத்தகைக்கு அனுமதிக்கப்படாத புறம்போக்கு மற்றும் வனப் பகுதிகளில் சட்டவிரோதமாகக் குவாரி அமைத்தாலோ, அதனை 'ஒருமுறை வரன்முறைப்படுத்தும் திட்டம்' என்ற பெயரில் ஒரு மெட்ரிக் டன்னுக்கு வெறும் ரூ.25 மட்டும் அபராதம் விதித்து வரன்முறைப்படுத்தப்படும் என அறிவிக்கப்பட்டுள்ளது.

இதையும் படிங்க: நாதக திட்டத்திற்கு அரசு பதில் என்ன? மணிமுத்தாறு வழக்கில் நீதிமன்றம் உத்தரவு!

இது சட்டவிரோத குவாரி மாஃபியாக்களைக் காப்பாற்றும் உள்நோக்கத்துடன் கொண்டுவரப்பட்டுள்ளதுடன், மிகக் குறைந்தபட்ச அபராதம் விதிப்பது சட்டவிரோதக் கனிமக் கொள்ளையை மேலும் ஊக்குவிக்குமே தவிர ஒருபோதும் கட்டுப்படுத்தாது; எனவே இந்த அரசாணையை உடனடியாக ரத்து செய்ய வேண்டும்; அதுவரை அரசாணையைச் செயல்படுத்த இடைக்காலத் தடை விதிக்க வேண்டும் என்று கோரியிருந்தார்.

இந்த மனு நீதிபதிகள் வேல்முருகன் மற்றும் ராமகிருஷ்ணன் ஆகியோர் அடங்கிய அமர்வில் இன்று மீண்டும் விசாரணைக்கு வந்தது. அப்போது அரசு தரப்பில் ஆஜரான கூடுதல் தலைமை வழக்கறிஞர், இயற்கை வளங்கள் துறை வெளியிட்ட இந்த அரசாணையை முழுமையாகத் திரும்பப் பெறுவதற்கு அரசுக்குப் பரிந்துரை செய்யப்பட்டுள்ளதாகவும், எனவே விரைவில் இந்த அரசாணை ரத்து செய்யப்பட்டுத் திரும்பப் பெறப்படும் என்றும் அதிகாரப்பூர்வமாகத் தெரிவித்தார்.

அரசுத் தரப்பின் இந்த விளக்கத்தைப் பதிவு செய்து கொண்ட நீதிபதிகள், இந்த அரசாணைக்கு நீதிமன்றம் ஏற்கனவே விதித்திருந்த இடைக்காலத் தடையை மேலும் நீட்டித்து உத்தரவிட்டதுடன், வழக்கின் அடுத்தகட்ட விசாரணையை நான்கு வாரங்களுக்கு ஒத்திவைத்தனர்.

சட்டவிரோதக் குவாரிகளுக்கு ஆதரவாகக் கொண்டுவரப்பட்டதாகக் கடுமையான விமர்சனங்களுக்கு உள்ளான இந்த அரசாணையை அரசே திரும்பப் பெற முன்வந்துள்ளதும், நீதிமன்றத் தடை நீட்டிக்கப்பட்டுள்ளதும் விவசாயிகள் மற்றும் சுற்றுச்சூழல் ஆர்வலர்களிடையே பெரும் வரவேற்பைப் பெற்றுள்ளது.

இதையும் படிங்க: விவசாய இலவச மின்சாரத்தில் தட்கல் முறை ரத்தாகுமா? ₹2,431 கோடி தணிக்கை குறித்து பதிலளிக்க நீதிமன்றம் உத்தரவு!