சென்னை பெருநகரப் போக்குவரத்து காவல்துறை கடந்த மூன்று நாட்களில் நடத்திய சிறப்பு நடவடிக்கையில் வாகன சாகசங்களில் ஈடுபட்ட மற்றும் பதிவு எண் இல்லாமல் இயக்கப்பட்ட இரண்டாயிரம் இருசக்கர வாகனங்களைப் பறிமுதல் செய்துள்ளது. இந்த அதிரடி நடவடிக்கை நகரில் அதிகரித்து வரும் ஆபத்தான பைக் ரேஸ் மற்றும் சாகசங்களுக்கு முற்றுப்புள்ளி வைக்கும் நோக்கில் மேற்கொள்ளப்பட்டது.

சென்னையில் இளைஞர்கள் குழுக்களாகத் திரண்டு நள்ளிரவு நேரங்களில் முக்கிய சாலைகளில் அதிவேகமாகப் பைக்குகளை இயக்கி சாகசங்களில் ஈடுபடும் நிகழ்வுகள் அண்மைக்காலத்தில் பெருகியுள்ளன. நுங்கம்பாக்கம், வள்ளுவர் கோட்டம், ஜெமினி, கோடம்பாக்கம், அண்ணா சாலை, ஐஐடி மேம்பாலம் உள்ளிட்ட பகுதிகளில் இத்தகைய சம்பவங்கள் அடிக்கடி நிகழ்ந்தன. பொதுமக்களின் உயிருக்கும் பாதுகாப்பிற்கும் பெரும் அச்சுறுத்தலை ஏற்படுத்தும் வகையில் இந்த வாகன சாகசங்கள் நடைபெற்றன.

சில சமயங்களில் வீடியோக்கள் சமூக வலைத்தளங்களில் பரவி பொதுமக்களிடையே அச்சத்தை உருவாக்கியது.இதையடுத்து போக்குவரத்து காவல்துறை தீவிர சோதனைகளைத் தொடங்கியது. நகரின் பல்வேறு பகுதிகளிலும் வாகனச் சோதனைச் சாவடிகள் அமைக்கப்பட்டன. வாகன சாகசங்களில் ஈடுபட்டவர்கள் மீது வழக்குகள் பதிவு செய்யப்பட்டன.

இதையும் படிங்க: E- challan..! அழைப்பு மையங்கள் அமைத்த போக்குவரத்து காவல்துறை.!! சிறப்பு ஏற்பாடு..!!

சில இளைஞர்கள் கைது செய்யப்பட்டு அவர்கள் பயன்படுத்திய பைக்குகள் பறிமுதல் செய்யப்பட்டன. அதேநேரம் பதிவு எண் பலகைகள் இல்லாமல் சாலையில் இயக்கப்பட்ட ஏராளமான இருசக்கர வாகனங்களும் கண்டறியப்பட்டு பறிமுதல் செய்யப்பட்டன. மூன்று நாட்களில் மொத்தம் இரண்டாயிரம் இருசக்கர வாகனங்கள் இவ்வாறு பறிமுதல் செய்யப்பட்டுள்ளன.

இதையும் படிங்க: முதல்வரின் பெரம்பூர் வெற்றியை எதிர்த்த வழக்குகள்... நிராகரிக்க கோரி கடும் வாதம்..!