டிட்வா  புயல் காரணமாக நாகப்பட்டினம் மாவட்டத்தில் அதிக கன மழை பெய்யக்கூடும் என வானிலை ஆய்வு மையம் எச்சரிக்கை விடுத்துள்ளது. இந்நிலையில் நாகப்பட்டினம் மாவட்டம் முழுவதும் நேற்று மாலை தொடங்கிய மழை நேற்று சற்று மிதமாக பெய்து வந்த நிலையில் நள்ளிரவு முதல் இன்று அதிகாலை வரை அதிக கன மழை பெய்து வருகிறது. 

நேற்று மாலை தொடங்கிய மழையானது இரவிலும் நீடித்து நள்ளிரவு சற்று ஓய்ந்தது. இருப்பினும் அதிகாலை மழை துவங்கி தற்பொழுது இடைவிடாது மிதமான மழை  பெய்து வருகிறது.ஒரு சில இடங்களில் பலத்த காற்றுடன் மழை  பெய்து வருகிறது. குறிப்பாக நாகை, கீழ்வேளூர், திருமருகல், நாகூர், வேளாங்கண்ணி, கீழையூர், திருப்பூண்டி, திருக்குவளை, வலிவலம், காரப்பிடாகை, வெண்மணி, தேவூர், அணக்குடி, குருக்கத்தி, ஆழியூர், சிக்கல், தலைஞாயிறு, வேதராண்யம், கோடியக்கரை உள்ளிட்ட மாவட்டத்தின் அனைத்து பகுதிகளிலும் மழை பெய்து வருகிறது.

 கனமழையை எதிர்கொள்ள மாவட்ட நிர்வாகம் சார்பில் பல்வேறு முன்னேற்பாடு பணிகள், செய்யப்பட்டுள்ளதோடு தேசிய பேரிடர் மீட்பு குழுவினரும் நாகையில் முகாமிட்டுள்ளனர். மழையானது இடைவிடாமல் தொடர்ச்சியாக பெய்து வருவதால்  பொதுமக்களின் இயல்பு வாழ்க்கை பாதித்துள்ளது. மேலும் மாவட்டத்தில் தாழ்வான பகுதிகளில் மழை நீர் தேங்கியுள்ளது. 

இதையும் படிங்க: அலர்ட் மக்களே... ஆர்ப்பரித்து கொட்டும் அருவிகள்... இங்கெல்லாம் கால் வைக்கக்கூட தடை விதிப்பு...!

குறிப்பாக நாகப்பட்டினம் மாவட்டத்தில்   நேற்று காலை எட்டு முப்பது மணி முதல் இன்று காலை எட்டு முப்பது மணி வரை கடந்த 24 மணி நேரத்தில் மாவட்டம் முழுதும் பரவலாக 98.44 சென்டி மீட்டர் மழை அளவு பதிவாகியுள்ளது. 

நாகப்பட்டினம் - 11.69 செமீ,
திருப்பூண்டி - 12.32 செமீ,
வேளாங்கண்ணி - 13.36 செமீ,
திருக்குவளை - 6.63 செமீ,
தலைஞாயிறு - 10.8 செமீ,
வேதாரண்யம் - 18.56 செமீ,
கோடியக்கரை - 25.08 செமீ 

மாவட்ட முழுவதும் மொத்தம் 98.44 சென்டி மீட்டர் மழை பதிவாகியுள்ள நிலையில் இதன் சராசரி அளவு 14 சென்டி மீட்டர் மழை  பதிவாகியுள்ளது.

இதையும் படிங்க: இனிமே தான் ஆட்டமே இருக்கு... உருவானது காற்றழுத்த தாழ்வு நிலை... வெளுக்கப்போகுது மழை...!