வாக்காளர் சிறப்பு தீவிரத் திருத்தப் பணிகளின் (SIR) போது, வாக்காளர் பட்டியல்களில் உள்ள பிழைகள், போலிப் பதிவுகள் மற்றும் இரட்டைப் பதிவுகளைக் கண்டறிவதற்குப் பயன்படுத்தப்பட்ட மென்பொருள் (Software) குறித்த விரிவான தொழில்நுட்பத் தகவல்களை வெளியிட இந்தியத் தேர்தல் ஆணையம் (ECI) திட்டவட்டமாக மறுத்துவிட்டது.

வாக்காளர் பட்டியலில் உள்ள குளறுபடிகளைக் கண்டறிய தேர்தல் ஆணையம் என்ன மாதிரியான மென்பொருளைப் பயன்படுத்தியது, இதில் செயற்கை நுண்ணறிவு (AI) அல்லது மெஷின் லேர்னிங் (Machine Learning) போன்ற நவீன தொழில்நுட்பங்கள் பயன்படுத்தப்பட்டனவா என்பது குறித்துத் தகவல் அறியும் உரிமைச் சட்டத்தின் (RTI) கீழ் விளக்கம் கோரப்பட்டிருந்தது. இந்த மனுவிற்குப் பதிலளித்துள்ள இந்தியத் தேர்தல் ஆணையம், அந்த மென்பொருள் தொடர்பான தொழில்நுட்பக் குறிப்புகள் வர்த்தக ரகசியம் (Commercial Confidence) மற்றும் அறிவுசார் சொத்துரிமை (Intellectual Property) ஆகியவற்றுடன் தொடர்புடையவை என்பதால், தகவல் அறியும் உரிமைச் சட்டத்தின் விதிகளின் கீழ் அவற்றை வெளியிட முடியாது எனத் தெரிவித்துள்ளது.

மேலும், வாக்காளர் சரிபார்ப்புப் பணிகளில் ஏஐ (AI) மற்றும் மெஷின் லேர்னிங் தொழில்நுட்பங்கள் எவ்வகையில் பயன்படுத்தப்பட்டன என்ற கேள்விக்குத் தேர்தல் ஆணையம் நேரடியான பதிலை அளிக்காமல் தவிர்த்துவிட்டது. அதே சமயம், மென்பொருளானது சரிபார்ப்புக்கான ஒரு கருவியாக மட்டுமே செயல்படுகிறது என்றும், வாக்காளர் பட்டியலில் இருந்து பெயர்களை நீக்குவது அல்லது புதிதாகச் சேர்ப்பது போன்ற அதிகாரப்பூர்வ முடிவுகளை அந்தந்தச் சட்டமன்றத் தொகுதிகளின் தேர்தல் பதிவு அலுவலர்களே (ERO) கள ஆய்வுகளின் அடிப்படையில் மேற்கொள்கின்றனர் என்றும் ஆணையம் தனது பதிலில் சுட்டிக்காட்டியுள்ளது.

இதையும் படிங்க: எஸ்.ஐ.ஆர். விவகாரம்: மோடி வழியில் முதல்வர் விஜய்யும் மௌனம் காப்பதா? மு.வீரபாண்டியன் ஆவேசம்!

இதையும் படிங்க: வாக்காளர் பட்டியல் பெயர் சேர்க்க நவ.12 முதல் வாய்ப்பு: தேர்தல் ஆணையம் முக்கிய அறிவிப்பு!