சென்னை மாநகரப் பயணிகளுக்கு மிகுந்த வசதியை ஏற்படுத்தும் வகையில், சென்னை ஒருங்கிணைந்த போக்குவரத்து ஆணையம் (சி.யு.எம்.டி.ஏ - CUMTA) மூலம் ‘சென்னை ஒன்’ என்ற ஒருங்கிணைந்த மொபைல் செயலி அறிமுகப்படுத்தப்பட்டது. கடந்த ஆண்டு செப்டம்பர் 22-ஆம் தேதி தொடங்கப்பட்ட இந்த செயலி, சென்னையின் பொது போக்குவரத்து சேவைகளை ஒரே இடத்தில் ஒருங்கிணைத்து வழங்குவதை நோக்கமாகக் கொண்டுள்ளது.

இதன் மூலம் சென்னை மெட்ரோ ரயில், மாநகரப் பேருந்துகள் (எம்டிசி - MTC) மற்றும் புறநகர் மின்சார ரயில் சேவைகளுக்கான டிக்கெட்டுகளை எளிதாக வாங்கலாம். கியூஆர் குறியீடு மூலம் டிக்கெட் பெற்று, ஒரே செயலியில் மூன்று வகை போக்குவரத்து சேவைகளையும் பயன்படுத்த முடியும். தனித்தனியாகவோ அல்லது ஒருங்கிணைந்து டிக்கெட் வாங்கவோ வசதி உள்ளது. செயலி அறிமுகமானதிலிருந்து பொதுமக்களிடையே பெரும் வரவேற்பைப் பெற்று வருகிறது. தொடர்ந்து புதிய அம்சங்கள் சேர்க்கப்பட்டு வருவதால், பயனர்கள் எண்ணிக்கை நாளுக்கு நாள் அதிகரித்து வருகிறது.

செயலியில் ஏற்கெனவே அறிமுகப்படுத்தப்பட்ட சில முக்கிய வசதிகளில், மாநகரப் பேருந்துகளுக்கான மாதாந்திர பயண அட்டை (மன்த்லி பாஸ்) பெறும் வசதி மிக முக்கியமானது. இதற்கு ரூ.1,000 மதிப்பிலான ‘கோல்ட்’ பாஸ் (சாதாரண, டீலக்ஸ், எக்ஸ்பிரஸ் பேருந்துகளில் வரம்பற்ற பயணம்) மற்றும் ரூ.2,000 மதிப்பிலான ‘டயமண்ட்’ பாஸ் (ஏசி பேருந்துகள் உட்பட அனைத்து வகை பேருந்துகளிலும் வரம்பற்ற பயணம்) ஆகியவை கிடைக்கின்றன. 

இதையும் படிங்க: போலிசாரை கொன்ற ஈரான் போராட்டக்காரர்கள்! 3 பேருக்கு தூக்கு தண்டனை நிறைவேற்றம்!

மேலும், ஒரு ரூபாய் மட்டுமே செலுத்தி மெட்ரோ, பேருந்து, ரயில் ஆகியவற்றில் ஒரு முறை சலுகைப் பயணம் மேற்கொள்ளும் வசதியும் உள்ளது. இவை அனைத்தும் டிஜிட்டல் முறையில் எளிதாகப் பெற முடியும்.தற்போது, மாநகரப் பேருந்து மாதாந்திர பாஸ்களை ‘சென்னை ஒன்’ செயலி வழியாகப் பெறுவதை ஊக்குவிக்கும் வகையில் புதிய சலுகை அறிவிக்கப்பட்டுள்ளது. முதல் முறை பயன்படுத்துபவர்கள், கோல்ட் அல்லது டயமண்ட் பாஸ் வாங்கும்போது BHIM ஆப் மூலம் பணம் செலுத்தினால், உடனடியாக ரூ.50 கேஷ்பேக் பெறலாம். இதன்மூலம் ரூ.1,000 பாஸ் ரூ.950-க்கும், ரூ.2,000 பாஸ் ரூ.1,950-க்கும் கிடைக்கும் வகையில் சேமிப்பு ஏற்படும்.

சலுகையைப் பெறுவது மிக எளிது:

• சென்னை ஒன் செயலியைத் திறந்து “Pass” என்ற ஆப்ஷனைத் தேர்வு செய்யவும்.
• தேவைக்கேற்ப Gold அல்லது Diamond மாதாந்திர பாஸைத் தேர்ந்தெடுக்கவும்.
• பேமெண்ட் பக்கத்தில் BHIM ஆப் வழியாக தொகையைச் செலுத்தவும்.
• உடனடியாக ரூ.50 கேஷ்பேக் உங்கள் கணக்குக்கு வரும்.

இந்த சலுகை முதல் முறை பயனர்களுக்கு மட்டுமே கிடைக்கும். மேலும், குறிப்பிட்ட கால அளவுக்கு மட்டுமே செல்லுபடியாகும். சலுகையின் விதிமுறைகள் மற்றும் நிபந்தனைகளுக்கு உட்பட்டது. எனவே, விரிவான விவரங்களுக்கு செயலியில் உள்ள தகவல்களைப் பார்க்கவும்.இத்தகைய டிஜிட்டல் முயற்சிகள் மூலம் சென்னையில் பொது போக்குவரத்து பயன்பாடு அதிகரிக்கும் என எதிர்பார்க்கப்படுகிறது. வரிசைகள் இல்லாமல், எளிதாக, பாதுகாப்பாக பயணிக்க விரும்பும் மக்களுக்கு இது பெரும் வரப்பிரசாதமாக அமையும்.

இதையும் படிங்க: தொகுதி பங்கீடு தீவிரம்..! சீக்கிரம் வந்து சேருங்க..! டெல்லிக்கு பறந்த TTV தினகரன், அன்புமணி..!