தமிழகத்தின் கல்வி மற்றும் மருத்துவத் துறைகளுக்காக ஒதுக்கப்படும் நிதி, வெறும் செலவு அல்ல; அது வருங்காலச் சமுதாயத்திற்காகச் செய்யப்படும் உன்னதமான முதலீடு எனத் தமிழக முதலமைச்சர் மு.க. ஸ்டாலின் அவர்கள் தெரிவித்துள்ளார். திராவிட மாடல் ஆட்சியின் இரு கண்களாகத் திகழும் இத்துறைகளில், தமிழகம் இந்தியாவுக்கே முன்னோடியாகத் திகழ்வதாக அவர் பெருமிதம் கொண்டுள்ளார்.

தமிழகத்தின் மருத்துவ சாதனைகள் மற்றும் அரசின் அர்ப்பணிப்பு குறித்து முதலமைச்சர் மு.க. ஸ்டாலின் வெளியிட்டுள்ள அறிக்கையில் திராவிட மாடல் ஆட்சியின் அடிநாதமாகத் திகழும் கல்வி மற்றும் மருத்துவம் ஆகிய துறைகளில், கடந்த நான்கரை ஆண்டுகளில் பல கோடி மக்கள் பயன்பெறும் வகையில் முன்னோடித் திட்டங்கள் நிறைவேற்றப்பட்டுள்ளன. குறிப்பாக, சென்னை கிண்டியில் நாம் உருவாக்கிய கலைஞர் நூற்றாண்டு உயர்சிறப்பு மருத்துவமனை, இன்று ஏழை எளிய மக்களின் நம்பிக்கையாக மாறியுள்ளது. இங்கு மேற்கொள்ளப்படும் சிக்கலான மற்றும் அரிய அறுவை சிகிச்சைகள், தரமான மருத்துவம் அடித்தட்டு மக்களுக்கும் சாத்தியம் என்பதைப் பறைசாற்றுகிறது.

இதையும் படிங்க: இது டப்பா என்ஜின் அல்ல.. சூப்பர் பாஸ்ட் என்ஜின்!  விமர்சனங்களுக்கு தமிழிசை சௌந்தரராஜன் பதிலடி!

பெருநகரங்கள் மட்டுமின்றி, தமிழகத்தின் சிறிய நகரங்களில் உள்ள அரசு மருத்துவமனைகளிலும் சவாலான அறுவை சிகிச்சைகள் வெற்றிகரமாக நடத்தப்பட்டு வருகின்றன. அர்ப்பணிப்பு உணர்வுடன் உயிர் காக்கும் பணியில் ஈடுபட்டுள்ள மருத்துவக் குழுவினரின் சாதனைகள் நாளும் செய்திகளில் இடம்பெறுவது எனக்கு மிகுந்த பெருமிதத்தை அளிக்கிறது. கடந்த நான்கரை ஆண்டுகளில் அரசு மருத்துவமனைகளை நாடி வரும் ஏழை எளிய மக்களின் எண்ணிக்கை பன்மடங்கு அதிகரித்துள்ளது. இது, நமது அரசின் மருத்துவக் கட்டமைப்பு மற்றும் மருத்துவர்கள், செவிலியர்களின் திறமை மீது மக்கள் வைத்துள்ள அசைக்க முடியாத நம்பிக்கைக்குச் சான்றாகும். மக்களின் இந்த நம்பிக்கையைக் காப்பாற்றும் வகையில், மக்கள் தொண்டினைத் தொய்வின்றித் தொடருவோம்.

இதையும் படிங்க: தேர்தலை மனதில் வைத்தேனும் அறிவிப்புகள் வருமா?  மத்திய பட்ஜெட்டுக்கு முன்னதாக முதலமைச்சர் மு.க.ஸ்டாலின் சரமாரி கேள்வி!