தென்மேற்கு வங்கக்கடலில் உருவான முரசு புயல் இன்று அதிகாலை 5.30 மணியளவில் தீவிரப் புயலாக வலுவடைந்துள்ளது. அதுமட்டுமின்றி, தொடர்ந்து மேற்கு-வடமேற்கு திசையில் நகர்ந்து, தற்போது சென்னைக்கு கிழக்கு-வடகிழக்கே சுமார் 230 கிலோமீட்டர் தொலைவில் மையம் கொண்டுள்ளது.

வடதமிழகக் கடலோரப் பகுதிகளுக்கு அருகே தற்போது புயல் நிலைகொண்டுள்ளது. தொடர்ந்து மேற்கு-வடமேற்கு திசையில் நகர்ந்து, இன்று மாலையே கரையைக் கடக்கும் என்று எதிர்பார்க்கப்படுகிறது. அதாவது, நெல்லூருக்குத் தெற்குப் பகுதியில் இந்தப் புயல் கரையைக் கடக்க உள்ளது.

வறண்ட காற்று ஊடுருவுவதன் காரணமாக, புயல் கரையைக் கடப்பதற்கு முன்னதாகவே வலுவிழந்து கரையைக் கடக்கும் என்று எதிர்பார்க்கப்படுகிறது. இதன் காரணமாக, இந்தப் புயலால் காற்றின் வேகத்தால் பெரிய பாதிப்புகள் ஏற்பட வாய்ப்பில்லை. அதே சமயத்தில், தீவிரமான மழைப்பொழிவை ஏற்படுத்தும் என்று எதிர்பார்க்கப்படுகிறது.

இதையும் படிங்க: முரசு புயல் தீவிரம்: கடலோர சாலைகளுக்கு செல்ல தடை! ஆழ்கடல் மீனவர்கள் உடனடியாக கரை திரும்ப உத்தரவு!

தெற்கு ஆந்திரக் கடலோரப் பகுதிகளில் அடுத்த சில மணி நேரங்களில் படிப்படியாக மழை தொடங்கி, பரவலாகக் கனமழை முதல் மிக கனமழை வரை பெய்யக்கூடும். புயல் கரையைக் கடக்கும் நெல்லூர், காவளி போன்ற பகுதிகளில் அதீத கனமழைக்கும் வாய்ப்புள்ளது.

மறுபுறம், வடகோடி மாவட்டங்களை எடுத்துக்கொண்டால், சென்னை, திருவள்ளூர் மாவட்டங்களில் இன்றும் அடுத்த 24 மணி நேரத்திலும் பரவலாகக் கனமழை பெய்யக்கூடும். ஒரு சில கடலோரப் பகுதிகளில் மிக கனமழை பெய்வதற்கும் வாய்ப்புள்ளது.

பிற வடகோடி மாவட்டங்களான காஞ்சிபுரம், செங்கல்பட்டு மற்றும் அதனை ஒட்டியுள்ள ராணிப்பேட்டை போன்ற மாவட்டங்களிலும் இன்று முற்பகலுக்குப் பிறகு விட்டுவிட்டு கனமழை பெய்வதற்கான வாய்ப்புகள் உள்ளன.

புயல் நெல்லூர் அருகே கரையைக் கடக்கும்போது, அரபிக்கடல் காற்று தமிழகத்தின் வழியாக ஊடுருவும். இதன் காரணமாக, வடக்கு உள் மாவட்டங்கள் மற்றும் மத்திய மாவட்டங்களான கிருஷ்ணகிரி, சேலம், தர்மபுரி, திருப்பத்தூர், திருவண்ணாமலை, விழுப்புரம், கடலூர், கள்ளக்குறிச்சி போன்ற மாவட்டங்களில் இன்று இரவு இடியுடன் கூடிய கனமழை பெய்வதற்கான வாய்ப்புகள் உள்ளன.

ஒட்டுமொத்தமாக, முரசு புயல் வடதமிழகம் மற்றும் தெற்கு ஆந்திரப் பகுதிகளுக்கு மழைப்பொழிவைக் கொடுக்கக்கூடிய புயலாக, வலுவிழந்த நிலையில் இன்று மாலை நேரத்திலேயே கரையைக் கடக்கத் தொடங்கும் என்று எதிர்பார்க்கப்படுகிறது.

இந்திய வானிலை ஆய்வு மையம் இன்று நள்ளிரவில்தான் புயல் கரையைக் கடக்கும் என்று தெரிவித்துள்ளது. ஆனால், இன்று மாலையே கரையைக் கடக்கும் நிகழ்வு தொடங்க வாய்ப்புள்ளது.

அதேபோல, நெல்லூருக்குத் தெற்குப் பகுதியிலேயே புயல் கரையைக் கடக்கும் என்று எதிர்பார்க்கலாம்.

இதையும் படிங்க: #BREAKING “பசங்களா..!! - குடையை எடுத்துக்கிட்டு கிளம்புங்க...” - இந்த மாவட்டத்தில் பள்ளி, கல்லூரிகளுக்கு விடுமுறை இல்லையாம்...!