மதுரை: தீபாவளிக்கு ஒரே ஒரு இனிப்பு வேண்டும் என்று சமூக வலைத்தளத்தில் கேட்ட இன்ஸ்டா பிரபலம் வீரமணிக்கு, எதிர்பாராத வகையில் ஏராளமான டெலிவரி ஆர்டர்கள் தொல்லையாக மாறிய சம்பவம் இணையத்தில் பேசுபொருளானது. பல்வேறு பொருள்கள் அவரது முகவரிக்கு அனுப்பப்பட்டதாகக் கூறப்பட்ட நிலையில், தற்போது இரண்டு நிறுவனங்கள் இனிப்புகள் மற்றும் பரிசுப் பொருள்களை வழங்கியிருப்பதாக அவர் பகிர்ந்துள்ள பதிவுகள் கவனம் பெற்றுள்ளன.

மதுரையைச் சேர்ந்த வீரமணி, இன்ஸ்டாகிராமில் பிரபலமாக இருந்து வருகிறார். அண்மையில் கேரளாவுக்கு சுற்றுலா செல்ல தனது பின்தொடர்பாளர்களிடம் நிதியுதவி கேட்டுப் பயணம் மேற்கொண்டதாகக் கூறப்படுகிறது. இதையடுத்து, தீபாவளியை முன்னிட்டு தனக்குப் பிடித்த இனிப்பு வேண்டும் என்று தனது வீட்டு முகவரியுடன் காணொளி ஒன்றை வெளியிட்டுள்ளார்.

ஆனால், இந்த வேண்டுகோள் அவருக்கு எதிர்பாராத சிக்கலை ஏற்படுத்தியதாகத் தெரிகிறது. சிலர் விளையாட்டாக அவரது முகவரியைப் பயன்படுத்தி, பணம் செலுத்திப் பொருளைப் பெற்றுக்கொள்ளும் கேஷ் ஆன் டெலிவரி முறையில் பல்வேறு ஆர்டர்களைப் பதிவு செய்ததாகக் கூறப்படுகிறது.

இதையும் படிங்க: ஜெம் வீரமணி பாலியல் வழக்கில் அடுத்த பூகம்பம்... SIT கையில் சிக்கிய முக்கிய ஆதாரங்கள்...சோதனையில் திடுக் திருப்பம்...!

உணவு விநியோகச் செயலிகள் மூலம் தொடர்ந்து ஆர்டர்கள் வந்ததால், டெலிவரி ஊழியர்கள் அவரது வீட்டுக்கு வரத் தொடங்கியுள்ளனர். தான் அந்த ஆர்டர்களைச் செய்யவில்லை என்று வீரமணி தெரிவித்தபோதும், இந்தத் தொல்லை தொடர்ந்ததாக அவர் வெளியிட்ட காணொளிகளில் குறிப்பிட்டுள்ளார்.

உணவுப் பொருள்களுடன் நிற்காமல், தொலைக்காட்சி, ஸ்மார்ட்போன் உள்ளிட்ட விலையுயர்ந்த பொருள்களுக்கும் ஆர்டர்கள் செய்யப்பட்டதாகத் தகவல்கள் வெளியாகின. மேலும், அவரது தொலைபேசி எண்ணைப் பயன்படுத்தி திருமணத் தொடர்பு மற்றும் சிறுநீரக தானம் தொடர்பான விளம்பரங்கள் வெளியிடப்பட்டதாகவும் கூறப்படுகிறது. ஜேசிபி இயந்திரம், ராணுவ பீரங்கி போன்றவை ஆர்டர் செய்யப்பட்டதாக மீம்ஸ்களும் பரவின. எனினும், இந்தக் குறிப்பிட்ட ஆர்டர்கள் உண்மையில் பதிவு செய்யப்பட்டனவா என்பது உறுதிப்படுத்தப்படவில்லை.

தொடர்ந்து ஏற்பட்ட தொல்லைகள் குறித்து வீரமணி பல காணொளிகளை வெளியிட்டு, ஆர்டர்களை நிறுத்துமாறு கோரிக்கை விடுத்தார். இந்த விவகாரம் சமூக வலைத்தளங்களைத் தாண்டி ஊடகங்களிலும் கவனம் பெற்றது. தனிப்பட்ட தகவல்களைப் பொதுவெளியில் பகிர்வதால் ஏற்படக்கூடிய ஆபத்துகள் குறித்தும் விவாதம் எழுந்தது.

இறுதியில் இனிப்புடன் வந்த மகிழ்ச்சி

இந்தச் சம்பவத்தின் முடிவில், இன்ஸ்டாமார்ட் நிறுவனம் வீரமணி கேட்ட இனிப்பு மற்றும் சில மின்னணுப் பரிசுப் பொருள்களை இலவசமாக வழங்கியதாக அவர் பகிர்ந்துள்ளார். கேரளத்தைச் சேர்ந்த மற்றொரு நிறுவனமும் இனிப்புடன் பல பரிசுப் பொருள்களை வழங்கியதாகத் தெரிவிக்கப்பட்டுள்ளது. இதுதொடர்பான புகைப்படங்களைப் பகிர்ந்த வீரமணி, தனது அனுபவத்துக்கு மகிழ்ச்சியான முடிவு கிடைத்திருப்பதாகக் காட்டியுள்ளார்.

ஒரு சிறிய வேண்டுகோள் இணையத்தில் பெரும் பரபரப்பாக மாறிய இந்தச் சம்பவம், பிறரின் தனிப்பட்ட விவரங்களை அனுமதியின்றிப் பயன்படுத்துவதும் போலி ஆர்டர்கள் செய்வதும் எத்தகைய தொல்லைகளை ஏற்படுத்தும் என்பதை மீண்டும் கவனத்துக்குக் கொண்டுவந்துள்ளது.

இதையும் படிங்க: பூதாகரமாகும் ஜெம் வீரமணி பாலியல் வழக்கு... பாய்ந்தது 5வது போக்சோ வழக்கு... தீவிரமடையும் வழக்கு விசாரணை...!