தமிழ்நாடு சட்டப்பேரவையின் பட்ஜெட் கூட்டத்தொடர் இன்று (ஆகஸ்ட் 10) மீண்டும் தொடங்கிய நிலையில், தமிழ்த்தாய் வாழ்த்து தொடர்பான முக்கிய தீர்மானம் ஒருமனதாக நிறைவேற்றப்பட்டது. அதேநேரம், அவையில் செல்போன் பயன்படுத்திய அமைச்சர் மீது சபாநாயகர் கண்டனம் தெரிவித்ததால் சிறிய பரபரப்பு ஏற்பட்டது.

கடந்த வெள்ளிக்கிழமை தொடங்கிய கூட்டத்தொடரில் மேகதாது அணைக்கு எதிரான சிறப்புக் கவன ஈர்ப்புத் தீர்மானம் மீது விவாதம் நடைபெற்றது. முதலமைச்சர் ஜோசப் விஜய், எதிர்க்கட்சித் தலைவர் உதயநிதி ஸ்டாலின், அதிமுக தலைவர் எடப்பாடி பழனிசாமி உள்ளிட்டோர் பேசினர். அமர்வு மதியம் வரை நீடித்தது. சனி, ஞாயிறு விடுமுறைக்குப் பிறகு இன்று மீண்டும் அவை கூடியது.

இன்றைய அமர்வில் முதலமைச்சர் விஜய் தமிழ்த்தாய் வாழ்த்து குறித்த தனித் தீர்மானத்தை முன்மொழிந்தார். அரசுத் துறைகள், கல்வி நிறுவனங்கள், பல்கலைக்கழகங்கள், பொதுத்துறை நிறுவனங்கள் உள்ளிட்ட அனைத்து பொது நிகழ்ச்சிகளிலும் தமிழ்த்தாய் வாழ்த்து முதலில் பாடப்பட வேண்டும் என்பதே அதன் உள்ளடக்கம்.

இதையும் படிங்க: தமிழ்த்தாய் வாழ்த்திற்கே முதலிடம்! இன்று சட்டமன்றத்தில் முதலமைச்சர் விஜய் தனித் தீர்மானம்!

தீர்மானத்தை விளக்கிப் பேசிய அவர், “மொழி என்பது தொடர்புக்கான கருவி மட்டுமல்ல. தமிழ் நமது உயிர், உணர்வு. தாயை அம்மா என்று சொல்லும்போது எழும் பாசம் போல, தமிழ்த்தாயும் புனிதமானது. 1891-ல் மனோன்மணியம் சுந்தரனார் எழுதிய இந்த வாழ்த்து, எந்த மொழி, மதம், இனத்தையும் காயப்படுத்தாது. ‘அனைத்துலகும் இன்பமுற’ என்று உலகையே உயர்த்திப் பிடிக்கிறது. தமிழ் என்றால் விருந்தோம்பல், கெத்து, பவர்” என்று உணர்ச்சிபூர்வமாகக் குறிப்பிட்டார். 

திமுக, அதிமுக, காங்கிரஸ், பாமக உள்ளிட்ட பல கட்சிகள் ஆதரவு தெரிவித்தன. சபாநாயகர் ஜே.சி.டி. பிரபாகர், தீர்மானம் ஏகமனதாக நிறைவேற்றப்பட்டதாக அறிவித்தார். இது 1970 முதல் பின்பற்றப்படும் நடைமுறையை உறுதிப்படுத்தும் வகையில் அமைந்துள்ளது. இந்த விவாதத்தின் போது, சிறுபான்மையினர் நலத்துறை அமைச்சர் ஏ.எம். ஷாஜகான் (ஐ.யூ.எம்.எல்) செல்போனைப் பார்த்துப் படிப்பது கவனிக்கப்பட்டது. இதைக் கண்ட சபாநாயகர் உடனடியாகத் தலையிட்டு, “சட்டப்பேரவைக்குள் யாரும் செல்போன் கொண்டு வர அனுமதியில்லை. அதைப் பார்த்துப் படிப்பதற்கும் அனுமதியில்லை” என்று அறிவுறுத்தினார். 

அவையின் ஒழுங்கு விதிகளை நினைவூட்டும் இந்த நடவடிக்கை உறுப்பினர்களிடையே பரபரப்பை ஏற்படுத்தியது. இந்த நிகழ்வுகள், தமிழ் மொழி உணர்வுக்கும் அவையின் ஒழுங்குக்கும் முக்கியத்துவம் அளிக்கும் வகையில் அமைந்துள்ளன. கூட்டத்தொடர் தொடர்ந்து நடைபெற்று வருகிறது.

இதையும் படிங்க: தமிழ்த்தாய் வாழ்த்திற்கே முதலிடம்! நாளை சட்டமன்றத்தில் முதலமைச்சர் விஜய் தனி தீர்மானம்!