டிட்வா புயல் முன்னெச்சரிக்கை நடவடிக்கையாக கொடைக்கானலில் சுற்றுலா பயணிகளுக்கு தடை விதிக்கப்பட்டுள்ளது. 

"மலைகளின் இளவரசி" என அழைக்கப்படும் கொடைக்கானல், தமிழகத்தின் திண்டுக்கல் மாவட்டத்தில் அமைந்துள்ளது. கடல் மட்டத்திலிருந்து 2133 மீட்டர் உயரத்தில் உள்ள கொடைக்கானலைச் சுற்றி, பரப்பர் மற்றும் குண்டர் பள்ளத்தாக்குகள் அமைந்துள்ளன. அடர்ந்த காட்டிற்குள் மரங்கள், பாறைகள் மற்றும் அருவிகளோடு இயற்கை அழகை வார இறுதி நாட்களான சனி மற்றும் ஞாயிற்றுக்கிழமைகளில் அதிக அளவிலான சுற்றுலா பயணிகள் கண்டு களிக்க வருவது வழக்கம். 

கோக்கர்ஸ் வாக், பியர் ஷோலா நீர்வீழ்ச்சி, பிரையண்ட் பூங்கா, கொடைக்கானல் ஏரி, தற்கொலை முனை, செண்பகனூர் அருங்காட்சியம், கொடைக்கானல் அறிவியல் வானாய்வகம், தூண் பாறைகள், குணா குகைகள், வெள்ளி நீர்வீழ்ச்சி, டால்பின் நோஸ் பாறை, குறிஞ்சி ஆண்டவர் கோயில், பேரிஜம் ஏரி போன்ற பல சுற்றுலாத் தலங்கள் கொடைக்கானலின் சுற்றுப்புறத்தில் அமைந்துள்ளன.

இதையும் படிங்க: #BREAKING திக்.. திக்..!! வேகத்தை கூட்டிய ‘டிட்வா’ புயல்... சென்னைக்கு இவ்வளவு பக்கத்திலா?

இந்நிலையில் வங்கக்கடலில் உருவாகியுள்ள டிட்வா புயல் எதிரொலி காரணமாக தமிழகத்தின் பல்வேறு பகுதிகளிலும் கனமழை பெய்து வருகிறது. கொடைக்கானலைப் பொறுத்தவரை இன்று காலை முதலே காற்றுடன் கூடிய சாரல் மழை பெய்து வருகிறது. டிட்வா புயல் தமிழகத்தை நெருங்க, நெருங்க மழையின் தாக்கம் அதிகரிக்கக்கூடும் என்பதால் கொடைக்கானலில் வனத்துறை கட்டுப்பாட்டில் உள்ள பகுதிகளில் சுற்றுலா பயணிகளுக்கு அனுமதி மறுக்கப்பட்டுள்ளது. 

கொடைக்கானல் வனத்துறை கட்டுப்பாட்டில் உள்ள பல்வேறு சுற்றுலாதளங்களுக்குச் செல்ல சுற்றுலா பயணிகளுக்கு தடை விதிக்கப்பட்டுள்ளது. இதுகுறித்து வெளியிடப்பட்டுள்ள செய்தி குறிப்பில், இன்று டிட்வா புயலின் காரணமாக மாவட்ட வன அலுவலர் கொடைக்கானல் அவர்களின் உத்தரவின்படி பில்லர் ராக், குணா குகை, பைன் பாரஸ்ட், மோயர் பாயிண்ட் மற்றும் பேரிஜம் ஏரி ஆகிய பகுதிகளுக்கு சுற்றுலா பயணிகளின் பாதுகாப்பு நலன் கருதி சுற்றுலா பயணிகள் செல்ல  அனுமதி இல்லை  என அதிகாரப்பூர்வமாக குறிப்பிடப்பட்டுள்ளது. 

இதையும் படிங்க: சென்னை மக்களே உஷார்... ஒரே நேரத்தில் செம்பரம்பாக்கம், புழல், பூண்டி ஏரிகளில் ஏற்பட்ட திடீர் மாற்றம்...!