கோவை பீளமேடு பகுதியில் உள்ள கே.கே. நாயுடு அரசு உதவிபெறும் பள்ளியில் பதினொன்றாம் வகுப்பு பயின்ற மாணவன் அகிலன் சாதியப் பாகுபாட்டால் மனமுடைந்து தற்கொலை செய்துகொண்ட சம்பவம் மிகுந்த வருத்தத்தை அளிப்பதாக புதிய தமிழகம் கட்சி தலைவர் கிருஷ்ணசாமி தெரிவித்துள்ளார். இச்சம்பவம் குறித்து நான்கு நாளாகியும் அரசு மௌனம் சாதிப்பது ஏன் என்று கேள்வி எழுப்பிய அவர், உயர் காவல்துறை அதிகாரிகள் தலைமையில் உடனடியாக உயர்மட்டக் குழு விசாரணைக்கு உத்தரவிட வேண்டும் என வலியுறுத்தியுள்ளார்.அம்மாணவனின் மரணத்திற்குத் தூண்டுதலாக அமைந்த ஆசிரியர் விஜயகுமார் மற்றும் பள்ளி முதல்வர் அருண்குமார் ஆகியோரைக் கைது செய்ய வலியுறுத்தி நான்காவது நாளாக அவரது பெற்றோர் போராடி வருவதாக அவர் சுட்டிக்காட்டினார்.

பள்ளி நேரத்தில் வகுப்பறையில் சக வகுப்பு மாணவர்கள் முன்னிலையில் நடந்த தீண்டாமை வன்கொடுமையால் அம்மாணவன் உயிரிழந்துள்ளதாகக் குறிப்பிட்ட கிருஷ்ணசாமி, இச்சம்பவம் குறித்து நேரடியாகவோ மறைமுகமாகவோ தகவல் தெரியவந்த உடனேயே தலைமையாசிரியர் சம்பந்தப்பட்ட ஆசிரியரையும் கேலி செய்த மாணவர்களையும் அழைத்து உரிய விசாரணை நடத்தி நடவடிக்கை எடுத்திருக்க வேண்டும் என்றார்.பாதிக்கப்பட்ட மாணவன் நேரில் சென்று புகார் அளித்த பின்னரும் தலைமையாசிரியர் அந்த ஆசிரியர் மீது எவ்வித நடவடிக்கையும் எடுக்காதது பெரும் சந்தேகத்தை எழுப்புவதாக அவர் கூறினார்.

மாணவன் உயிரிழந்த பிறகும் பெற்றோரின் போராட்டத்திற்குப் பின்னருமே தலைமையாசிரியரும் சம்பந்தப்பட்ட ஆசிரியரும் தற்காலிகப் பணிநீக்கம் செய்யப்பட்டுள்ளனர். நியாயப்படி அவர்கள் மீது முறையான விசாரணை மேற்கொண்டு சட்டப்படியான நடவடிக்கைக்குப் பள்ளி நிர்வாகம் பரிந்துரைத்திருக்க வேண்டும். ஆனால் அவ்வாறு செய்யாமல் தற்காலிகப் பணிநீக்கம் செய்ததன் மூலம் தவறிழைத்த ஆசிரியர்களைப் பள்ளி நிர்வாகம் மறைமுகமாகப் பாதுகாக்கிறது என்றே கருத வேண்டியுள்ளது என அவர் விமர்சித்தார்.மாணவனின் உடலை உடற்கூராய்வு செய்ய அனுமதிக்காமல் பெற்றோரின் போராட்டம் தொடர்வதாகக் குறிப்பிட்ட கிருஷ்ணசாமி, இதுவரை பள்ளிக் கல்வித்துறையும் காவல்துறையும் இணைந்து விசாரித்தார்களா, அதன் உண்மைத்தன்மை என்ன, தவறிழைத்தவர்களைப் பாதுகாப்பதில் அரசின் தலையீடுகள் உள்ளனவா என்பது குறித்துப் பலவிதமான சந்தேகங்கள் எழுகின்றன என்றார்.

இதையும் படிங்க: நீலகிரிக்கு ரெட் அலர்ட்..! மக்களே போகாதீங்க..!! சுற்றுலா தளங்களை மூட திடீர் உத்தரவு..!!

மாணவன் இறந்து நான்கு நாட்கள் ஆகியும்கூட அரசுத் தரப்பில் மௌனம் சாதிப்பது நியாயமல்ல என வலியுறுத்திய அவர், பள்ளி வகுப்பறையில் மாணவன் அகிலன் இழிவுபடுத்தப்பட்டது முதல் மரணம் நிகழ்ந்தது வரையிலும் நடந்த அனைத்துச் சம்பவங்களையும் விசாரிக்க மாவட்ட அளவிலான உயர் காவல்துறை அதிகாரிகள், கல்வித்துறை, வருவாய்த்துறை மற்றும் மாணவன் அகிலனின் பெற்றோர் தரப்பில் ஒருவர் உள்ளடங்கிய சிறப்புக் குழுவைத் தமிழ்நாடு அரசு நியமித்து ஓரிரு நாட்களில் விசாரித்து உண்மைத்தன்மையை வெளிக்கொணர வேண்டும் எனக் கோரிக்கை விடுத்தார்.

இதையும் படிங்க: குற்றவாளிகள் "LEO"- க்களா.? மேடையில் பேசிய டயலாக் எங்க CM சார்..? கடுப்பாகிய EPS..!!