தமிழகத்தில் கனிமவளக் கடத்தலைத் தடுக்கும் நோக்கில் லாரிகளில் ஜிபிஎஸ் கருவி பொருத்துவதற்கான கால அவகாசம் இன்றுடன் நிறைவடைகிறது. புவியியல் மற்றும் சுரங்கத்துறை வெளியிட்டுள்ள அறிவிப்பின்படி, நாளை முதல் ஏஐஎஸ்-140 தரநிலை கொண்ட ஜிபிஎஸ் கருவி பொருத்தப்படாத லாரிகளுக்குப் போக்குவரத்து அனுமதிச் சீட்டு வழங்கப்பட மாட்டாது.குவாரிகள், கிரஷர்கள் மற்றும் சேமிப்புக் கிடங்குகளிலிருந்து ஜல்லி, எம்-சாண்ட், மணல் உள்ளிட்ட கனிமங்களை ஏற்றிச் செல்லும் அனைத்து வாகனங்களிலும் ஏஐஎஸ்-140 தரநிலையுள்ள ஜிபிஎஸ் கருவியைப் பொருத்தி, அதை மினரல் மேனேஜ்மென்ட் சிஸ்டம் (மிமாஸ்) போர்ட்டலுடன் இணைக்க வேண்டும் எனத் தமிழக அரசு உத்தரவிட்டிருந்தது.
இந்த உத்தரவுக்கு இணங்க வாகன உரிமையாளர்களுக்குப் பலமுறை கால அவகாசம் நீட்டிக்கப்பட்ட நிலையில், இறுதியாக அக்டோபர் 31ஆம் தேதியுடன் அந்த அவகாசம் முடிவடைகிறது.ஜிபிஎஸ் கருவி பொருத்தப்பட்டு மிமாஸ் போர்ட்டலில் பதிவு செய்யப்பட்ட வாகனங்களுக்கு மட்டுமே நாளை முதல் கனிமங்களை ஏற்றிச் செல்ல நடைச்சீட்டு மற்றும் போக்குவரத்து அனுமதி வழங்கப்படும். கருவி பொருத்தாத லாரிகளுக்கு அனுமதி மறுக்கப்படும் எனத் துறை அதிகாரிகள் தெளிவுபடுத்தியுள்ளனர்.
இந்த நடவடிக்கை கனிமவளக் கடத்தலைக் கட்டுப்படுத்துவதற்கும், அனுமதியற்ற போக்குவரத்தைத் தடுப்பதற்கும் மேற்கொள்ளப்படுகிறது.ஜிபிஎஸ் கருவி மூலம் வாகனத்தின் இருப்பிடம், பயண வழித்தடம், ஏற்றப்படும் கனிம அளவு ஆகியவற்றை நேரடியாகக் கண்காணிக்க முடியும். அனுமதிக்கப்பட்ட வழியிலிருந்து விலகிச் சென்றாலோ அல்லது அனுமதியின்றி கனிமங்களை ஏற்றிச் சென்றாலோ உடனடியாக அறிந்து நடவடிக்கை எடுக்கலாம்.
இதையும் படிங்க: GPS இல்லாத லாரிகளுக்கு தடை..! கனிமங்கள் ஏற்றுவதில் கட்டுப்பாடு..! முக்கிய உத்தரவு..!
இதனால் சட்டவிரோதச் சுரங்க நடவடிக்கைகளைக் கட்டுப்படுத்துவது எளிதாகும் என அதிகாரிகள் தெரிவிக்கின்றனர்.முன்னதாகச் செப்டம்பர் 30ஆம் தேதிக்குள் பொருத்த வேண்டும் எனக் கூறப்பட்ட நிலையில், பல வாகன உரிமையாளர்கள் இணங்காததால் காலக்கெடு நீட்டிக்கப்பட்டது. தற்போது இறுதி நாளாக அறிவிக்கப்பட்டுள்ளதால், இன்னும் கருவி பொருத்தாத லாரி உரிமையாளர்கள் உடனடியாக நடவடிக்கை எடுக்க வேண்டும் என எச்சரிக்கப்பட்டுள்ளது.
இதையும் படிங்க: பெங்களூரு வாகன ஓட்டிகளுக்கு ஷாக்! விதிமீறலுக்கு ₹5,000 அபராதம்.. ரூல்ஸ் மீறினால் ஆப்பு..!!