தமிழ்நாடு அரசு திருமணத் தொடர்பான சேவைகளில் முக்கியமான மாற்றத்தை கொண்டு வந்துள்ளது. திருமணத்திற்கு வரன் தேடும்போதோ அல்லது திருமணப் பதிவுக்காகவோ தேவைப்படும் திருமணமாகாதவர் சான்றிதழை இனி ஆன்லைன் மூலமாகவே எளிதாகப் பெறலாம். இந்தச் சான்றிதழுக்கான விண்ணப்பத்தில் ஆதார் எண் சமர்ப்பிப்பது இப்போது கட்டாயமாக்கப்பட்டுள்ளது. பிப்ரவரி 12 ஆம் தேதி வெளியிடப்பட்ட அரசாணையின் படி, இந்த நடைமுறை முழுமையாக எளிமைப்படுத்தப்பட்டுள்ளது.

முன்பு இந்தச் சான்றிதழைப் பெற பல அடுக்கு சரிபார்ப்புகள் இருந்தன. விண்ணப்பதாரரின் வாக்குமூலத்தை மட்டும் நம்பி நடத்தப்பட்ட சரிபார்ப்பு முறைகள் சிக்கல்களை உருவாக்கின. அதைத் தவிர்க்கும் வகையில் ஆதார் அடிப்படையிலான சரிபார்ப்பு முறை அறிமுகப்படுத்தப்பட்டுள்ளது. திருமணப் பதிவுகளின் போது ஏற்கனவே ஆதார் விவரங்கள் சேகரிக்கப்படுவதால், ஒருவர் ஏற்கனவே திருமணம் செய்துள்ளாரா என்பதை அரசு எளிதில் உறுதி செய்ய முடியும். இதனால் போலித் தகவல்கள் அல்லது மோசடிகள் தடுக்கப்படும் என எதிர்பார்க்கப்படுகிறது.

திருமணமாகாதவர் சான்றிதழ் என்பது இதுவரை ஒருமுறை கூட திருமணம் செய்துகொள்ளாதவர்களுக்கு வழங்கப்படும். விவாகரத்து பெற்றவர்கள் அல்லது துணைவரை இழந்தவர்களுக்கு தனி நபர் அந்தஸ்து சான்றிதழ் என்ற பெயரில் தனியாக வழங்கப்படும். இந்தச் சான்றிதழ்கள் திருமணப் பதிவு, வெளிநாட்டு விசா விண்ணப்பம், அரசு வேலைகளுக்கான பின்னணிச் சரிபார்ப்பு, மேட்ரிமோனி தளங்களில் வரன் தேடும்போது உண்மைத்தன்மையை நிரூபிக்க ஆகியவற்றிற்குப் பயன்படுகின்றன. ஆன்லைன் மேட்ரிமோனி தளங்களில் வரன் தேடும்போது பலர் இந்தச் சான்றிதழைக் கேட்பதால், இது திருமணத் தேடலுடன் நேரடியாகத் தொடர்புடையதாக உள்ளது.விண்ணப்பிக்கத் தகுதியானவர்கள் சட்டப்பூர்வ திருமண வயதை எட்டியிருக்க வேண்டும். அதாவது ஆண்கள் இருபத்தொரு வயதும், பெண்கள் பதினெட்டு வயதும் பூர்த்தி செய்திருக்க வேண்டும்.

இதையும் படிங்க: கவனத்தை ஈர்த்த மாணவர் பாரதிதாசன்... முழு உதவித்தொகை விடுவிப்பு..! தமிழக அரசு நடவடிக்கை..!!

குழந்தை திருமணத் தடைச் சட்டத்தின்படி இந்த வயது வரம்பு நிர்ணயிக்கப்பட்டுள்ளது. சான்றிதழ் பெற்ற பிறகு, விண்ணப்பதாரர் திருமணம் செய்துகொள்ளும் வரை மட்டுமே அது செல்லுபடியாகும். திருமணம் நடந்தவுடன் அதன் செல்லுபடி முடிவுக்கு வரும்.விண்ணப்பம் செய்வது மிகவும் எளிமையாக்கப்பட்டுள்ளது. தமிழ்நாடு இ-சேவை இணையதளம் அல்லது பொது சேவை மையங்கள் மூலம் விண்ணப்பிக்கலாம். முதலில் குடிமகன் அணுகல் எண் பெற வேண்டும். அதற்கு ஆதார் மற்றும் ஓடிபி சரிபார்ப்பு போதுமானது. பின்னர் உரிய சேவையைத் தேர்வு செய்து, ஆதார் அட்டையை மட்டும் பதிவேற்றினால் போதும். சுய உறுதிமொழி கட்டத்தைத் தேர்வு செய்ய வேண்டும். கூடுதல் ஆவணங்கள் பெரும்பாலும் தேவையில்லை. விண்ணப்பம் சமர்ப்பிக்கப்பட்ட பிறகு, அமைப்பில் ஏற்கனவே உள்ள திருமணப் பதிவு தரவுகளுடன் ஆதார் மூலம் ஒப்பிட்டு உடனடியாகச் சரிபார்ப்பு நடைபெறும். ஆதார் சரி பார்ப்புக்கு அனுமதி அளித்து தமிழக அரசு அரசிதழில் வெளியிட்டுள்ளது.

இதையும் படிங்க: சிறிய இரத்த பரிசோதனை நிலையங்களை பாதுகாக்க அரசாணை எண் 41-ஐ ரத்து செய்க! இந்திய கம்யூனிஸ்ட் கட்சி வலியுறுத்தல்!