ஈரானுக்கும் இஸ்ரேலுக்கும் இடையே நிலவி வரும் போர் பதற்றம் மற்றும் வான்வெளி கட்டுப்பாடுகள் காரணமாக, இந்தியக் குடிமக்கள் யாரும் ஈரானுக்குப் பயணம் செய்ய வேண்டாம் என இந்திய வெளியுறவு அமைச்சகம் (MEA) இன்று மீண்டும் ஒரு புதிய எச்சரிக்கையை விடுத்துள்ளது. ஈரான் தனது விமான சேவைகளை மீண்டும் தொடங்கியிருப்பதாகத் தகவல்கள் வந்தாலும், அங்குள்ள சூழல் இன்னும் இயல்பு நிலைக்குத் திரும்பவில்லை என இந்தியா கருதுகிறது.

இந்தியா மற்றும் ஈரான் இடையே சில விமானங்கள் இயக்கப்படத் தொடங்கியுள்ள போதிலும், வான்வெளி கட்டுப்பாடுகள் மற்றும் செயல்பாட்டு நிச்சயமற்ற தன்மைகள் இன்னும் நீடிக்கின்றன. இந்தியக் குடிமக்கள் வான்வழியாகவோ அல்லது நிலவழியாகவோ ஈரானுக்குப் பயணம் செய்வதைத் தவிர்க்குமாறு ஈரானில் உள்ள இந்தியத் தூதரகம் இன்று (ஏப்ரல் 23, 2026) அதிகாரப்பூர்வமாகத் தெரிவித்துள்ளது.

ஏற்கனவே ஜனவரி மற்றும் ஏப்ரல் தொடக்கத்தில் விடுக்கப்பட்ட பயணத் தடைகள் தற்போதும் தொடர்வதாக அறிவிக்கப்பட்டுள்ளது. தற்போது ஈரானில் தங்கியுள்ள சுமார் 7,200-க்கும் மேற்பட்ட இந்தியர்களுக்குத் தூதரகம் சில முக்கியமான வழிகாட்டுதல்களை வழங்கியுள்ளது:

இதையும் படிங்க: ஹார்முஸ் நீரிணை எங்கள் வசம்! ஈரானை எச்சரித்து டொனால்ட் டிரம்ப் பதிவு!

ஈரானில் உள்ள இந்தியர்கள் தூதரகத்தின் உதவியுடன் அங்கீகரிக்கப்பட்ட நிலவழிப் பாதைகள் மூலம் உடனடியாக அந்நாட்டை விட்டு வெளியேற வேண்டும் என அறிவுறுத்தப்பட்டுள்ளது. அவசரத் தேவையின்றி வெளியில் நடமாடுவதைத் தவிர்க்கவும், எல்லைப் பகுதிகளுக்குச் செல்ல வேண்டாம் என்றும் கேட்டுக் கொள்ளப்பட்டுள்ளனர்.

கடந்த பிப்ரவரி 28 அன்று தொடங்கிய அமெரிக்கா-இஸ்ரேல் கூட்டுத் தாக்குதலைத் தொடர்ந்து, மத்திய கிழக்கு பிராந்தியத்தில் போர் பதற்றம் உச்சத்தை எட்டியுள்ளது. பாகிஸ்தானின் மத்தியஸ்தத்தால் அமெரிக்க அதிபர் டொனால்ட் டிரம்ப் தற்காலிகப் போர்நிறுத்தத்தை அறிவித்திருந்தாலும், ஹார்முஸ் நீரிணையில் நிலவும் முழுக் கட்டுப்பாடு மற்றும் வான்வெளி சிக்கல்கள் காரணமாகப் பாதுகாப்பு குறித்த கவலைகள் இன்னும் குறையவில்லை.

ஈரான் மற்றும் வளைகுடா நாடுகளில் வசிக்கும் இந்தியர்களின் பாதுகாப்பை உறுதி செய்வதே முன்னுரிமை என வெளியுறவுத் துறை செய்தித் தொடர்பாளர் ரந்தீர் ஜெய்ஸ்வால் தெரிவித்துள்ளார்.

ஈரானில் உள்ள இந்தியர்கள் எவ்விதத் தேவைக்கும் டெஹ்ரானில் உள்ள இந்தியத் தூதரகத்தை கீழ்க்கண்ட எண்களில் தொடர்பு கொள்ளலாம்:

கைப்பேசி எண்கள்: +98 912 810 9115 / 9102 / 9109

மின்னஞ்சல்: cons.tehran@mea.gov.in

ஈரான் மற்றும் அதன் சுற்றுவட்டாரப் பகுதிகளில் நிலவும் இந்தச் சூழல் முழுமையாகச் சீரடையும் வரை இந்தியர்கள் பொறுமை காக்குமாறு கேட்டுக் கொள்ளப்படுகிறார்கள்.

இதையும் படிங்க: இந்திய பெருங்கடலில் அமெரிக்கா அதிரடி! ஈரானின் மெஜஸ்டிக் எக்ஸ் கச்சா எண்ணெய் கப்பல் சிறைபிடிப்பு!