தமிழக அரசு டாஸ்மாக் கடைகளில் மேலும் 54 புதிய மதுபான வகைகளை அறிமுகப்படுத்த இருப்பதாக வெளியான செய்தி பெரும் அதிர்ச்சியை ஏற்படுத்தியுள்ளது. பாஜக மாநிலத் தலைவர் நயினார் நாகேந்திரன் இதற்கு கடும் எதிர்ப்பு தெரிவித்துள்ளார். மதுவுக்கு அடிமையானோரின் எண்ணிக்கையைக் கட்டுப்படுத்த டாஸ்மாக் கடைகளின் எண்ணிக்கையைப் படிப்படியாகக் குறைக்க வேண்டும் என்று அவர் வலியுறுத்தியுள்ளார்.

தனது எக்ஸ் (ட்விட்டர்) பக்கத்தில் பதிவிட்டுள்ள நயினார் நாகேந்திரன், “டாஸ்மாக் கடைகளை மூடுகிறோம்” என்று தொடர்ந்து சுய விளம்பரம் செய்து வரும் முதல்வர் ஜோசப் விஜய் தலைமையிலான அரசு, உண்மையில் மதுபான வகைகளை அதிகரிக்கும் திட்டத்தில் ஈடுபட்டுள்ளது மிகுந்த வருத்தத்தை அளிப்பதாகக் குறிப்பிட்டார். தமிழகத்தில் நாளுக்கு நாள் அதிகரித்து வரும் கொலை, கொள்ளை, பாலியல் வன்கொடுமை உள்ளிட்ட குற்றங்களில் பெரும்பாலானவை போதைப் பழக்கத்துடன் தொடர்புடையவை என்பது பொதுவான கருத்து.

இத்தகைய சூழலில் மதுபானங்களை எளிதாகக் கிடைக்கச் செய்வதற்குப் பதிலாக, அவற்றைக் கட்டுப்படுத்துவதே ஒரு பொறுப்புள்ள அரசின் முதன்மை கடமையாகும். ஆனால் தற்போதைய நடவடிக்கை அதற்கு நேரெதிரானது என்று அவர் சுட்டிக்காட்டினார். “வெளியூர் பயணங்களின்போது மட்டுமே சில உயர்தர மதுபானங்கள் கிடைக்கும் நிலையை மாற்றி, எல்லா வகை மதுபானங்களையும் கைக்கு எட்டும் தூரத்தில் கொண்டு வருவது இளைஞர்கள் மற்றும் இளம் தலைமுறையினரிடையே குடிப்பழக்கத்தை ஊக்குவிக்கும்” என எச்சரித்த நாகேந்திரன், “More Choices, More Chances” என்ற கொள்கையைச் சுட்டிக்காட்டினார். 

இதையும் படிங்க: சொன்னது தூயசக்தி, நடப்பது ஊழல் வேட்டை! தவெக அரசுக்கு நயினார் நாகேந்திரன் கண்டனம்!

பல்வேறு தேர்வுகள் அதிகரிக்கும்போது போதைக்கு அடிமையாகும் வாய்ப்பும் அதிகரிக்கும் என்பதை அரசு உணர வேண்டும் என்றார்.மதுவால் ஏற்படும் குடும்பச் சிதைவு, உடல்நலக் கேடு, சாலை விபத்துகள், வேலைவாய்ப்பு இழப்பு உள்ளிட்ட பல்வேறு சமூகப் பிரச்னைகளைச் சுட்டிக்காட்டிய அவர், மதுவிற்கு எதிரான போராட்டத்தை வலுப்படுத்த வேண்டிய தருணம் இது என்று வலியுறுத்தினார்.

முதல்வர் விஜய் இந்தத் திட்டத்தை உடனடியாகக் கைவிட்டு, டாஸ்மாக் கடைகளைக் குறைக்கும் நடவடிக்கைகளை முன்னெடுக்க வேண்டும் என்று அவர் வேண்டுகோள் விடுத்துள்ளார். தமிழகத்தில் மது அடிமையால் பாதிக்கப்பட்டோரின் எண்ணிக்கை ஏற்கெனவே கவலைக்கிடமாக உள்ள நிலையில், இத்தகைய நடவடிக்கைகள் மேலும் பிரச்னையை அதிகரிக்கும் என்ற அச்சம் அரசியல் வட்டாரங்களில் எழுந்துள்ளது.
 

இதையும் படிங்க: ஆட்சி அதிகாரத்தை கேடயமாக பயன்படுத்தும் தவெக - காங்கிரஸ்! நயினார் நாகேந்திரன் அதிரடி அறிக்கை!