சென்னை: தமிழக சட்டசபை தேர்தலில் பா.ஜ.க. படுதோல்வியை சந்தித்த நிலையில், கட்சியில் முக்கிய மாற்றங்கள் வரவிருப்பதாக தகவல் வெளியாகியுள்ளது. தமிழக பாஜக தலைவர் நயினார் நாகேந்திரனை கேரள மாநில கவர்னராக நியமிக்க தேசிய தலைமை முடிவு செய்துள்ளதாகக் கூறப்படுகிறது.
தேர்தலில் தமிழக பாஜக பெரும் பின்னடைவைச் சந்தித்தது. மாநிலத் தலைவர் நயினார் நாகேந்திரன் உள்ளிட்ட முன்னணி தலைவர்கள் பலரும் தோல்வியைத் தழுவினர். இந்த நிலையில், தமிழக அமைப்பை முழுமையாக மறுசீரமைக்க தேசிய பாஜக தலைமை தீவிர ஆலோசனையில் ஈடுபட்டுள்ளது.
நயினார் நாகேந்திரனுக்கு கேரள கவர்னர் பதவி வழங்க முடிவு செய்யப்பட்டுள்ளதாகக் கூறப்படுகிறது. தற்போது கேரள கவர்னராக உள்ள ராஜேந்திர அர்லேகர், தமிழகத்துக்கு முழு நேர கவர்னராக நியமிக்கப்படுவார் என எதிர்பார்க்கப்படுகிறது. இந்த மாற்றங்கள் விரைவில் அறிவிக்கப்படும் எனக் கூறப்படுகிறது.
இதையும் படிங்க: அண்ணாமலைக்கு ஆப்பு வைத்த அமித்ஷா! ரஜினிகாந்த் ஆதரவை பெற நயினார் நாகேந்திரன் முயற்சி?!
இதனிடையே, தமிழக பாஜகவின் அடுத்த தலைவரை தேர்வு செய்யும் பொறுப்பில் தேசிய அமைப்பு பொதுச்செயலர் பி.எல். சந்தோஷ் விரைவில் தமிழகம் வர உள்ளார். அவரது வருகைக்குப் பிறகு புதிய மாநிலத் தலைவருக்கான அறிவிப்பு வெளியாகும் என பாஜக வட்டாரங்கள் தெரிவிக்கின்றன.
தேர்தல் தோல்விக்குப் பிறகு தமிழக பாஜகவில் உள்ள அதிருப்தி மற்றும் உட்கட்சி பிரச்னைகளை சரி செய்யும் வகையில் இந்த மாற்றங்கள் மேற்கொள்ளப்படுவதாகக் கூறப்படுகிறது. நயினார் நாகேந்திரன் தலைமையில் தமிழகத்தில் பாஜகவை வலுப்படுத்த பல முயற்சிகள் எடுக்கப்பட்டாலும், எதிர்பார்த்த முடிவுகள் கிடைக்காதது தேசிய தலைமையை சிந்திக்க வைத்துள்ளது.
பி.எல். சந்தோஷ் தமிழக வருகையின்போது முக்கிய நிர்வாகிகளுடன் ஆலோசனை நடத்தி, கட்சியை பலப்படுத்த புதிய உத்திகளை வகுக்கவும் வாய்ப்புள்ளது. அடுத்த மாநிலத் தலைவர் யார் என்பது பெரும் எதிர்பார்ப்பை ஏற்படுத்தியுள்ளது.
தமிழக அரசியல் களத்தில் பாஜகவின் எதிர்கால நகர்வுகள் என்னவாக இருக்கும் என்பதை அரசியல் பார்வையாளர்கள் உற்று நோக்கி வருகின்றனர். இந்த மாற்றங்கள் கட்சியின் உள்கட்டமைப்பை பலப்படுத்துமா அல்லது புதிய சவால்களை உருவாக்குமா என்பது விரைவில் தெரியவரும்.
இதையும் படிங்க: கட்சியை வளருங்க! தொண்டர்களை நேர்ல சந்திச்சு பேசுங்க!! பாஜ நிர்வாகிகளுக்கு நயினார் கண்டிஷன்!!