திண்டுக்கல் மாவட்டம் பழனி அருகே உள்ள அரசுப் பள்ளியின் குடிநீர் தொட்டியில் மர்ம நபர்களால் மனிதக் கழிவு கலக்கப்பட்டதாகக் கூறப்படும் அதிர்ச்சி விவகாரத்தில், தற்போதைய வழக்கின் விசாரணை நிலை குறித்து விரிவான நிலை அறிக்கை (Status Report) தாக்கல் செய்ய வேண்டும் என்று திண்டுக்கல் மாவட்ட காவல் கண்காணிப்பாளருக்குச் சென்னை உயர் நீதிமன்ற மதுரை கிளை அதிரடியாக உத்தரவிட்டுள்ளது.

பழனி சுற்றுவட்டாரப் பகுதியில் இயங்கி வரும் அரசுப் பள்ளி ஒன்றில், மாணவர்கள் மற்றும் ஆசிரியர்கள் அன்றாடக் குடிநீர்த் தேவைக்குப் பயன்படுத்தி வந்த தண்ணீர் தொட்டியில் மர்ம நபர்கள் சிலர் மனிதக் கழிவைக் கலந்து அசுத்தப்படுத்தியதாகப் புகார்கள் எழுந்தன. இச்சம்பவம் பள்ளி மாணவர்கள், பெற்றோர்கள் மற்றும் பொதுமக்கள் மத்தியில் பெரும் அதிர்ச்சியையும், மனிதநேயமற்ற இச்செயலுக்கு எதிரான கடுமையான கொந்தளிப்பையும் ஏற்படுத்தியது.

இதுதொடர்பாக உள்ளூர் காவல் நிலையத்தில் வழக்குப் பதிவு செய்யப்பட்டு விசாரணை தொடங்கப்பட்ட போதிலும், இந்த இழிவான செயலில் ஈடுபட்ட உண்மைக் குற்றவாளிகள் இதுவரை அடையாளம் காணப்பட்டு கைது செய்யப்படவில்லை என்றும், விசாரணையை விரைவுபடுத்தி குற்றவாளிகள் மீது உரிய பிரிவுகளின் கீழ் கடும் நடவடிக்கை எடுக்க உத்தரவிட வேண்டும் என்றும் கோரி சென்னை உயர் நீதிமன்ற மதுரை கிளையில் பொதுநல வழக்கு தொடரப்பட்டது.

இதையும் படிங்க: தமிழகத்தையே உலுக்கிய பழனி பள்ளி குடிநீர் தொட்டியில் மலம் கலந்த விவகாரம்... சிறுவர்கள் கொடுத்த ஷாக்கிங் வாக்குமூலம்...!

இம்மனு இன்று உயர் நீதிமன்ற மதுரை கிளையில் விசாரணைக்கு வந்தபோது, வழக்கை விசாரித்த நீதிபதிகள் பள்ளி மாணவர்கள் குடிக்கும் தண்ணீரில் இத்தகைய கொடூரச் செயலில் ஈடுபட்டவர்கள் மீது எடுக்கப்பட்ட நடவடிக்கைகள் என்ன? இந்த வழக்கின் தற்போதைய புலன்விசாரணை எந்தக் கட்டத்தில் உள்ளது? இதுவரை யார் யாரிடம் விசாரணை நடத்தப்பட்டுள்ளது?" உள்ளிட்ட விவரங்கள் அடங்கிய விரிவான நிலை அறிக்கையைத் திண்டுக்கல் மாவட்ட காவல் கண்காணிப்பாளர் நீதிமன்றத்தில் தாக்கல் செய்ய வேண்டும் என்று உத்தரவிட்டு, வழக்கின் அடுத்தகட்ட விசாரணையை ஒத்திவைத்தனர்.

உயர் நீதிமன்ற மதுரை கிளை பிறப்பித்துள்ள இந்த அதிரடி உத்தரவைத் தொடர்ந்து, பழனி அரசுப் பள்ளி குடிநீர் தொட்டி விவகாரத்தில் காவல் துறையினர் தங்களது தீவிர விசாரணையை முடுக்கிவிட்டுள்ளனர்.

இதையும் படிங்க: அரசு பள்ளி குடிநீர் தொட்டியில் மனித மலம் கலப்பு... மூடி மறைந்த தலைமையாசிரியர்... அடுத்தடுத்து வெளியாகும் அதிர்ச்சி...!