ரஷ்யாவின் கிழக்கு அமூர் பகுதியில் ஜூலை 24ம் தேதியான இன்று, அங்காரா ஏர்லைன்ஸ் நிறுவனத்தின் ஆன்டனோவ் ஆன்-24 பயணிகள் விமானம் விழுந்து நொறுங்கியதில், விமானத்தில் இருந்த 49 பேர் உயிரிழந்ததாக உள்ளூர் அதிகாரிகள் தெரிவித்தனர். 

இந்த விமானம், சைபீரியாவின் கபரோவ்ஸ்க் நகரில் இருந்து பிளாகோவெஷ்சென்ஸ்க் வழியாக டைண்டா என்ற தொலைதூர நகரத்திற்கு சென்று கொண்டிருந்தபோது, டைண்டா விமான நிலையத்திற்கு 15 கி.மீ தொலைவில் ரேடாரில் இருந்து மறைந்தது.

இதையும் படிங்க: ரஷ்யாவில் 50 பயணிகளுடன் சென்ற விமானம் மாயம்: தேடுதல் தீவிரம்..!!

விமானத்தில் 43 பயணிகள், இதில் ஐந்து குழந்தைகள், மற்றும் ஆறு பணியாளர்கள் இருந்ததாக அமூர் மாகாண ஆளுநர் வாசிலி ஓர்லோவ் தெரிவித்தார். மோசமான வானிலை மற்றும் குறைந்த தெரிவுநிலை காரணமாக இரண்டாவது முறையாக தரையிறங்க முயன்றபோது விமானம் விபத்துக்குள்ளானதாக முதற்கட்ட அறிக்கைகள் தெரிவிக்கின்றன. 

எந்தவொரு அவசர சமிக்ஞையும் விமானம் அனுப்பவில்லை என்று அதிகாரிகள் கூறினர். மீட்பு பணிகளுக்கு மி-8 ஹெலிகாப்டர்கள் மற்றும் தரைப்படைகள் அனுப்பப்பட்டன, ஆனால் அடர்ந்த காடு மற்றும் சதுப்பு நிலம் மீட்பு பணிகளை சவாலாக்கியது. விமானத்தின் எரியும் உடற்பகுதி மலைப்பகுதியில் கண்டறியப்பட்டு, ஆரம்ப விசாரணையில் உயிர் பிழைத்தவர்கள் யாரும் இல்லை என உறுதி செய்யப்பட்டது. 

1976இல் உருவாக்கப்பட்ட இந்த சோவியத் கால விமானம், கடுமையான சூழல்களுக்கு ஏற்றவாறு வடிவமைக்கப்பட்டிருந்தாலும், முதுமை மற்றும் மேற்கத்திய பொருளாதார தடைகளால் பராமரிப்பு சவாலாக இருந்ததாக தெரிகிறது. ரஷ்ய அரசு விபத்து குறித்து விசாரணைக்கு உத்தரவிட்டு, அதிபர் புதினுக்கு தகவல் தெரிவிக்கப்பட்டதாக அறிவித்தது.

அண்மையில் இந்தியாவில் அகமதாபாத் நகரில் ஏற்பட்ட விமான விபத்து உலகையே உலுக்கியது. அகமதாபாத் விமான நிலையத்தில் இருந்து லண்டன் புறப்பட்ட ஏர் இந்தியா விமானம், சில நொடிகளிலேயே விழுந்து நொறுங்கியது. இந்த விமான விபத்தில் ஒரேயொரு பயணியைத் தவிர்த்து 242 பேரும் உயிரிழந்தனர்.  

இதேபோல் வங்கதேச தலைநகர் டாக்காவில், உத்தரா பகுதியில் உள்ள மைல்ஸ்டோன் பள்ளி மற்றும் கல்லூரி வளாகத்தில் வங்கதேச விமானப்படையின் F-7 BGI பயிற்சி போர் விமானம் ஒன்று விழுந்து நொறுங்கி தீப்பிடித்தது. இதிலும் பலர் உயிரிழந்தனர். 

இந்த விபத்துகளின் சுவடுகளே இன்னும் மக்கள் மனதில் இருந்த மறையாத நிலையில், ரஷ்யாவில் அடுத்த கோர விபத்து நிகழ்ந்துள்ளது பெரும் அதிர்ச்சியை ஏற்படுத்தியுள்ளது.
 

இதையும் படிங்க: உங்க பொருளாதாரத்தையே அழிச்சிருவோம்!! இந்தியாவுக்கு அமெரிக்கா பகிரங்க மிரட்டல்..!