புதுச்சேரி காங்கிரஸ் கட்சியின் உள்ளக முரண்பாடுகள் மீண்டும் வெளிப்பட்டுள்ளன. முன்னாள் முதலமைச்சர் வி. நாராயணசாமிக்கு வரவிருக்கும் சட்டமன்றத் தேர்தலில் போட்டியிட சீட் மறுக்கப்பட்ட சம்பவம், கட்சியின் மாநிலத் தலைவர் வைத்திலிங்கம் மீது கடும் அதிருப்தியை ஏற்படுத்தியுள்ளது.

இதனால், நாராயணசாமியின் ஆதரவாளர்கள் கடும் எதிர்ப்பை வெளிப்படுத்தி வருகின்றனர். குறிப்பாக, வைத்திலிங்கத்தின் தலைமைத்துவத்தை கேள்விக்குள்ளாக்கி, அவரை பதவி விலகக் கோரி குரல்கள் எழுந்துள்ளன.இந்தப் பிரச்சினைக்கு முக்கிய காரணம், கட்சியின் சீட் பங்கீடு முடிவுகளில் நாராயணசாமி மீது காட்டப்பட்ட அணுகுமுறைதான்.

நாராயணசாமி, புதுச்சேரி காங்கிரஸ் அரசியலில் மிக முக்கியமான தலைவர்களில் ஒருவராக இருந்து வருபவர். அவர் முன்னாள் முதலமைச்சராக பதவி வகித்தவர் என்பதோடு, கட்சியின் பல முக்கிய முடிவுகளிலும் செல்வாக்கு செலுத்தியவர். ஆனால், தற்போதைய சூழலில் அவருக்கு தொகுதி ஒதுக்கப்படாதது, கட்சியின் உயர்மட்டத்தில் அவரை புறக்கணிக்கும் முயற்சியாக பார்க்கப்படுகிறது. வைத்திலிங்கம் மீதான பதவி விலக கோரிக்கை வலுத்து வருகிறது.

இதையும் படிங்க: பாஜக EX. அமைச்சருக்கு போட்டியிட வாய்ப்பு மறுப்பு..! களேபரமான புதுவை..! கொந்தளித்த ஆதரவாளர்கள்..!!

அவரது தலைமையில் கட்சி பலவீனமடைந்து வருவதாகவும், நாராயணசாமி போன்ற மூத்த தலைவர்களை அவமதிப்பது கட்சியின் எதிர்காலத்துக்கு ஆபத்து என்றும் ஆதரவாளர்கள் வாதிடுகின்றனர். இது காங்கிரஸ் கட்சியின் புதுச்சேரி அமைப்பில் ஆழமான பிளவை உருவாக்கும் அபாயத்தை ஏற்படுத்தியுள்ளது. 

இந்த நிலையில், புதுச்சேரி காங்கிரஸ் தலைவர் வைத்திலிங்கம் வீட்டை நாராயணசாமி ஆதரவாளர்கள் முற்றுகையிட்டனர். புதுச்சேரி நெல்லித்தோப்பு தொகுதியில் போட்டியிட நாராயணசாமிக்கு வாய்ப்பு வழங்கவில்லை எனக் கூறி வைத்திலிங்கத்தின் வீட்டை முற்றுகையிட்டதால் பரபரப்பான சூழ்நிலை ஏற்பட்டது. வைத்திலிங்கம் பதவி விலகக் கோரி முற்றுகையிட்டதுடன் கண்டனம் முழக்கங்களை எழுப்பினர். மேலும் வைத்திலிங்கத்தின் காரையும் நாராயணசாமி ஆதரவாளர்கள் முற்றுகையிட்டனர். இதனால் பரபரப்பான சூழ்நிலை ஏற்பட்டுள்ளது.

இதையும் படிங்க: புதுச்சேரியில் எந்தெந்த தொகுதியில் அதிமுக போட்டி?.. வெளியான முக்கிய அறிவிப்பு..!