"தேசத்தை கட்டி எழுப்புதல்" என்ற பெயரில், அதானியன் பைகளை நிரப்புகிறார், மோடி என்றும் அவர் குற்றம் சாட்டினார். தொழிலதிபரின் "ஊழலை" மறைத்ததாக குற்றம் சாட்டிய காங்கிரஸ் மூத்த தலைவரும், மக்களவை எதிர்க்கட்சித் தலைவருமான ராகுல் காந்தி, அமெரிக்காவில் கவுதம் அதானி தொடர்பான கேள்விக்கு பிரதமர் நரேந்திர மோடி அளித்த பதில் குறித்து கடுமையாக சாடினார். 

அதானி விவகாரத்தில் பிரதமர் மோடி நாட்டில் இருந்தபோது "மௌனம் காத்ததற்காகவும்" வெளிநாட்டு மண்ணில் "தனிப்பட்ட விஷயம்" என்று கூறியது பற்றியும் ராகுல் காந்தி கடுமையாக விமர்சித்தார். இது குறித்து தனது எக்ஸ் சமூக வலைதளத்தில் இந்தி மொழியில் பதிவிட்ட ராகுல் காந்தி, “உள் நாட்டில் கேள்விகள் கேட்டால், அமைதி நிலவுகிறது. வெளிநாட்டில் கேட்டால், அது ஒரு தனிப்பட்ட விஷயம்! அமெரிக்காவில் கூட, மோடி ஜி அதானி ஜியின் ஊழலை மறைக்கிறார்!” என்று அவர் கூறி இருக்கிறார்.

பாக்கெட்டை நிரப்புவது மோடிஜிக்கு "தேசக் கட்டுமானம்" என்றால், லஞ்சம் வாங்குவதும் நாட்டின் செல்வத்தைக் கொள்ளையடிப்பதும் "தனிப்பட்ட விஷயமாம்” என்றும்  ராகுல் காந்தி கண்டனம் தெரிவித்தார். அமெரிக்க அதிபர் டொனால்ட் டிரம்புடனான கூட்டு செய்தியாளர் சந்திப்பின் போது, ​​பிரதமர் மோடியிடம், இரு உலகத் தலைவர்களின் சந்திப்பின் போது ‘கௌதம் அதானி வழக்கு’ விவாதிக்கப்பட்டதா? என்று கேட்கப்பட்டது.

இதையும் படிங்க: மோடியின் ‘மேக் இன் இந்தியா’ திட்டம் படுதோல்வி: செம்ம காட்டு காட்டிய ராகுல் காந்தி...!

அந்தக் கேள்விக்கு பதிலளித்த பிரதமர் மோடி, “முதலாவதாக, இந்தியா ஒரு ஜனநாயக நாடு, எங்கள் கலாச்சாரம் மற்றும் எங்கள் தத்துவம் என்பது முழு உலகமும் ஒரு குடும்பம் என்பதாகும். ஒவ்வொரு இந்தியரும் எனது சொந்த குடும்ப உறுப்பினர். மேலும், இதுபோன்ற தனிப்பட்ட விஷயங்களைப் பொறுத்தவரை, இரண்டு நாடுகளின் இரண்டு தலைவர்களும் அந்த தலைப்பில் ஒன்றுகூடி ஒரு தனிப்பட்ட விஷயத்தில் எதையும் விவாதிக்க மாட்டார்கள்.” என்று கூறினார்.

ஆசியாவின் இரண்டாவது பெரிய பணக்காரரான கௌதம் அதானி,  250 மில்லியன் டாலருக்கும் அதிகமான லஞ்சம் வழங்கியதாகவும், அமெரிக்க முதலீட்டாளர்களை ஏமாற்றவும் உதவியதாகக் கூறி அமெரிக்க கூட்டாட்சி நீதிமன்றம் குற்றம் சாட்டியது தொடர்பான கேள்வி இது. அதானி அவருடைய மருமகன் சாகர் அதானே மற்றொரு அதிகாரி ஆகியோர் பத்திரங்கள் மற்றும் கம்பி மோசடி குற்றச்சாட்டுகளை எதிர்கொள்வதாகவும் அமெரிக்க நீதித்துறை தெரிவித்து இருந்தது. 

சூரிய மின்சக்தி ஒப்பந்தங்களுக்கு சாதகமான விதிமுறைகளை பெறுவதற்காக அதானி மற்றும் கூட்டாளிகள் இந்திய அதிகாரிகளுக்கு லஞ்சம் கொடுத்ததாகவும் இந்த திட்டத்தை அமெரிக்க வங்கிகள் மற்றும் திட்டத்திற்கு நிதி அளித்த முதலீட்டாளர்களிடம் இருந்து மறைத்ததாகவும் வழக்கறிஞர்கள் தெரிவித்து இருந்தனர்.

இந்த ஒப்பந்தங்கள் 20 ஆண்டுகளில் வரிக்குப் பிந்தைய லாபத்தில் இரண்டு பில்லியன் டாலருக்கும் அதிகமாக இருக்கும் என்று எதிர்பார்க்கப்பட்டது. இருப்பினும், அதானி குழுமம் இந்தக் குற்றச்சாட்டுகளை அடிப்படை அற்றது என்று மறுத்துள்ளது. அமெரிக்க முதலீட்டாளர்கள் அல்லது சந்தைகளுடன் தொடர்புகளை உள்ளடக்க வெளிநாட்டு ஊழல் வழக்குகளை தொடர அமெரிக்காவின் சட்டம் அனுமதி அளிக்கிறது என்பது குறிப்பிடத்தக்கது.

இதையும் படிங்க: அதானியை மிரட்டிய FCPA சட்டம் முழுவதும் ரத்து..! தொழிலதிபர்களுக்கு ஆதரவாக மாறிய ட்ரம்ப்..!