தமிழ்நாட்டிலுள்ள அனைத்து நியாயவிலைக் கடைகளிலும் இன்று ஆகஸ்ட் 29 ஆம் தேதி குடும்ப அட்டைதாரர்களுக்கான சிறப்பு eKYC முகாம் நடைபெறுகிறது. காலை ஒன்பது மணி முதல் மாலை ஐந்து மணி வரை இந்த முகாம் அனைத்து ரேஷன் கடைகளிலும் நடத்தப்படுகிறது. குடும்ப அட்டையில் இடம்பெற்றுள்ள உறுப்பினர்களின் கைரேகைப் பதிவை சரிபார்த்து ஆதார் விவரங்களை உறுதிசெய்வதே இதன் முக்கிய நோக்கமாகும்.தேசிய உணவுப் பாதுகாப்புச் சட்டத்தின் கீழ் முன்னுரிமை குடும்ப அட்டைகள் மற்றும் அந்தியோதயா அன்ன யோஜனா குடும்ப அட்டைதாரர்களுக்கு வழங்கப்படும் அத்தியாவசியப் பொருட்கள் உண்மையான பயனாளிகளுக்கு மட்டுமே சென்று சேர வேண்டும் என்ற நோக்கில் இந்த நடவடிக்கை மேற்கொள்ளப்படுகிறது.

போலியான அட்டைகளைக் களைவதற்கும் பயோமெட்ரிக் அடிப்படையிலான சரிபார்ப்பை முழுமையாக்குவதற்கும் மத்திய அரசின் அறிவுறுத்தலின்படி மாநில அளவில் இப்பணி தொடர்ந்து நடைபெற்று வருகிறது. அக்டோபர் 2023 முதல் இந்த eKYC பணிகள் நடைமுறைப்படுத்தப்பட்டு வருகின்றன.தற்போதைய நிலவரப்படி முன்னுரிமை குடும்ப அட்டைகளில் 96.21 சதவீதம் eKYC பணி நிறைவுபெற்றுள்ளது. மீதமுள்ள விடுபட்ட பயனாளிகளின் பதிவையும் முழுமையாக நிறைவுசெய்வதற்காகவே இன்று மாநிலம் முழுவதும் சிறப்பு முகாம் ஏற்பாடு செய்யப்பட்டுள்ளது.

இதுவரை கைரேகைப் பதிவு செய்யப்படாமல் உள்ள குடும்ப அட்டை உறுப்பினர்கள் தங்களது குடும்ப அட்டையுடன் அருகிலுள்ள நியாயவிலைக் கடைக்குச் சென்று பதிவை முடிக்கலாம். வேலை காரணமாக வேறு ஊருக்கு இடம் மாறியவர்கள் தற்போது தங்கியுள்ள பகுதியில் உள்ள ரேஷன் கடையிலேயே குடும்ப அட்டை விவரங்களைக் கொடுத்து eKYC செய்ய முடியும்.இந்த முகாம் பொதுமக்களின் வசதிக்காகவே ஒரு நாள் முழுவதும் நடைபெறுகிறது. அனைத்து மாவட்டங்களிலும் உள்ள ஆயிரக்கணக்கான நியாயவிலைக் கடைகளில் ஒரே நேரத்தில் இந்த வசதி கிடைக்கிறது.

இதையும் படிங்க: விலைவாசி உயர்வு அரசின் கையாலாகாத்தனம்! தவெக அரசை சாடிய டிடிவி தினகரன்!

கைரேகைப் பதிவு செய்யாதவர்கள் பின்னர் சிக்கல்களை எதிர்கொள்ள நேரிடலாம் என்பதால் இன்றுள்ள வாய்ப்பை பயன்படுத்திக் கொள்ளுமாறு அரசு அழைப்பு விடுத்துள்ளது. குடும்ப அட்டையில் உள்ள அனைத்து உறுப்பினர்களும் தனித்தனியாக கைரேகைப் பதிவை முடிக்க வேண்டும்.பொது விநியோகத் திட்டத்தின் மூலம் வழங்கப்படும் அரிசி, கோதுமை மற்றும் பிற அத்தியாவசியப் பொருட்கள் தகுதியான குடும்பங்களுக்கு மட்டுமே சென்றடைய இந்த சரிபார்ப்பு உதவுகிறது. தொழில்நுட்ப வசதிகளைப் பயன்படுத்தி வெளிப்படையான முறையில் பயனாளிகளை உறுதிசெய்வது அரசின் தொடர் முயற்சியாகும். இன்று நடைபெறும் சிறப்பு முகாம் இந்த இலக்கை அடைய முக்கிய பங்காற்றும் என எதிர்பார்க்கப்படுகிறது.

இதையும் படிங்க: பட்ஜெட் கூட்டத்தொடரில் இன்று பரபரப்பு... 3 முக்கிய துறைகளுக்கு அமைச்சர்கள் பதில்!