சமூக வலைதளங்களில் வெளியிடும் ரீல்ஸ்களும், விளம்பரங்களும் மட்டுமே தவெக கட்சியின் மூலதனமாகியுள்ளன என்றும், அந்த ரீல்ஸ்கள் மட்டும் இல்லையென்றால் அந்தக் கட்சி ஃபியூஸ் போன மின்சாரக் கம்பம் போல் செயலிழந்துவிடும் என்றும் அதிமுக பொதுச்செயலாளரும் எதிர்க்கட்சித் தலைவருமான எடப்பாடி கே. பழனிசாமி மதுராந்தகத்தில் நடைபெற்ற தேர்தல் பிரச்சாரக் கூட்டத்தில் மிகக் கடுமையான சொற்களால் கடுமையாகச் சாடியுள்ளார்.

செங்கல்பட்டு மாவட்டம் மதுராந்தகம் சட்டமன்றத் தொகுதி இடைத்தேர்தலில் அதிமுக சார்பில் போட்டியிடும் அதிகாரப்பூர்வ வேட்பாளர் கணிதா சம்பத்தை ஆதரித்து, மதுராந்தகம் புதூர் பகுதியில் பிரம்மாண்டமான தேர்தல் பிரச்சாரப் பொதுக்கூட்டம் நடைபெற்றது. இக்கூட்டத்தில் கலந்துகொண்டு தீவிர வாக்கு சேகரிப்பில் ஈடுபட்ட எடப்பாடி பழனிசாமி, ஆளுங்கட்சியான தவெகவின் நிர்வாகச் சீர்கேடுகளை ஒவ்வொன்றாகப் புட்டுப்புட்டு வைத்து அனல் பறக்க உரையாற்றினார்.

தவெகவின் செயல்பாடுகளைக் கேலி செய்து பேசிய எடப்பாடி பழனிசாமி, ரீல்ஸ், ரீல்தான் தவெகவின் மூலதனம்; இந்த இரண்டை மட்டும் வைத்துக்கொண்டுதான் அந்தக் கட்சி ஓடிக்கொண்டிருக்கிறது. சோஷியல் மீடியாவில் போடும் ரீல்ஸ் இல்லை என்றால் தவெக ஃபியூஸ் போன மாதிரி ஸ்தம்பித்துவிடும். தமிழகத்தில் நிர்வாகத் திறமை என்பது துளியும் இல்லை; ஒரு காலத்தில் நமது தமிழ்நாடு காவல்துறை பிரிட்டிish அரசின் ஸ்காட்லாந்து யார்டு காவல்துறைக்கு இணையாகப் புகழப்பட்டது. ஆனால், தற்போதைய ஆட்சியாளர்களின் கையாலாகாத தனத்தினால் அந்தத் துறையே முற்றிலுமாகச் செயலிழந்து போய்விட்டது, மாநிலத்தில் சட்டம் ஒழுங்கு சந்தி சிரிக்கிறது என்று ஆவேசமாகக் குற்றம்சாட்டினார்.

இதையும் படிங்க: அதிமுக vs தவெக? மதுராந்தகம் இடைத்தேர்தலில் மாறிய அரசியல் கணக்கு! உளவுத்துறை என்ன சொல்லுது!

மரகதம் குமரவேலின் கட்சித் தாவல் விவகாரத்தைக் கையில் எடுத்துப் புகைப்பட ஆதாரங்களுடன் விளக்கிய இபிஎஸ், இங்க பாருங்க... மரகதம் குமரவேல் இதற்கு முன்பு என்னுடன் தான் அமர்ந்து ஆலோசனைக் கூட்டத்தில் கலந்துகொண்டார். ஆனால், திடீரென எவ்வித முன்னறிவிப்புமின்றி தனது சட்டமன்ற உறுப்பினர் பதவியை ராஜினாமா செய்தார்; பதவி விலகிய அடுத்த ஐந்தாவது நிமிடமே தவெகவில் போய் இணைந்துவிட்டார் என்று ஒவ்வொரு புகைப்படமாகத் தனித்தனியாகக் காட்டித் துடைத்துத் தள்ளினார். 

மேலும், முதலமைச்சரின் வெளிநாட்டுப் பயணம் குறித்துத் தொண்டர்கள் மத்தியில் அவர் பேசுகையில், நம்முடைய முதல்வர் உல்லாசச் சுற்றுப்பயணத்திற்காக வெளிநாடு போய்விட்டு வந்தார்கள்; எதற்காகப் போனார்கள் என்று உங்களுக்கே தெரியும், அதை நான் வெளிப்படையாகச் சொல்ல மாட்டேன் என்று அவர் குறிப்பிட்டதும், அரங்கத்தில் திரண்டிருந்த தொட்டர்கள் ஆரவாரம் செய்து பலத்த ரியாக்ஷன் கொடுத்தனர். 

தொடர்ந்து பேசிய அவர், தவெக அரசின் முறையற்ற நிர்வாகத்தால் தமிழ்நாடு முழுவதும் கடுமையான மின்வெட்டு நிலவி வருவதாகவும், மக்கள் சொல்லொணாத் துயரத்திற்கு ஆளாகியுள்ளதாகவும் கூறி அதிமுக வேட்பாளர் கணிதா சம்பத்திற்கு 'இரட்டை இலை' சின்னத்தில் வாக்களித்து இமாலய வெற்றி பெறச் செய்ய வேண்டும் என தெரிவித்தார்.

இதையும் படிங்க: மதுராந்தகத்தில் அதிமுக நிர்வாகிகள் ஆப்செண்ட்! பழனிசாமியின் உத்தரவுக்கு ‘நோ ரெஸ்பான்ஸ்’?