சிவகங்கை மாவட்டம் முழுவதும் சட்டம்-ஒழுங்கைப் பாதுகாக்கும் நோக்கில் தடை உத்தரவு அமலில் உள்ளது. விடுதலைப் போராட்ட வீரர்களான மாமன்னர் மருதுபாண்டியர் சகோதரர்களின் நினைவு தின நிகழ்ச்சிகளும், பசும்பொன் முத்துராமலிங்கத் தேவரின் குருபூஜை விழாவும் அடுத்தடுத்து நடைபெற உள்ளதால், மாவட்ட நிர்வாகம் முன்னெச்சரிக்கை நடவடிக்கையாக இந்த உத்தரவைப் பிறப்பித்துள்ளது.

அக்டோபர் 24ம் தேதி சிவகங்கை மாவட்டம் திருப்பத்தூரில் உள்ள மருதுபாண்டியர் மணிமண்டபத்தில் அரசு சார்பில் அவர்களது நினைவு தின விழா நடைபெற உள்ளது. 1801 ஆம் ஆண்டு அக்டோபர் 24 இல் ஆங்கிலேயர்களால் தூக்கிலிடப்பட்ட இந்த வீர சகோதரர்கள், ராணி வேலு நாச்சியாரின் தளபதிகளாகப் பணியாற்றி ஆங்கிலேய ஆதிக்கத்திற்கு எதிராகப் போராடியவர்கள். 

அவர்களது உடல்கள் அடக்கம் செய்யப்பட்ட காளையார்கோவிலில் அக்டோபர் 27 ஆம் தேதி சமுதாய அமைப்புகள் சார்பில் நினைவு தினமும் குருபூஜையும் நடைபெறும். இந்த இரண்டு நிகழ்ச்சிகளிலும் அரசியல் கட்சியினர், சமூக அமைப்பினர் மற்றும் பொதுமக்கள் பெருமளவில் கலந்துகொள்வார்கள் என எதிர்பார்க்கப்படுகிறது.

இதையும் படிங்க: சிவகங்கையில் இரட்டைக் கொலை! பாதிக்கப்பட்ட குடும்பங்களுக்கு அரசு வேலை! முடிவுக்கு வந்தது போராட்டம்!

தொடர்ந்து அக்டோபர் 30 ஆம் தேதி ராமநாதபுரம் மாவட்டம் பசும்பொன்னில் முத்துராமலிங்கத் தேவரின் குருபூஜை விழா நடைபெற உள்ளது. சுதந்திரப் போராட்டத்திலும் சமூக நீதிக்காகவும் முக்கியப் பங்கு வகித்த இவருடைய நினைவிடத்திற்கு தமிழகம் முழுவதிலுமிருந்து ஆயிரக்கணக்கானோர் வருகை தருவார்கள். 

இத்தகைய பெருங்கூட்டங்களால் சட்டம்-ஒழுங்கு பாதிக்கப்பட வாய்ப்புள்ளதால், சிவகங்கை மாவட்ட ஆட்சியர் ஆகாஷ், பாரதீய நாகரிகப் பாதுகாப்பு சன்ஹிதா (பிஎன்எஸ்எஸ்) சட்டப் பிரிவு 163(1) (பழைய குற்றவியல் நடைமுறைச் சட்டம் 144) கீழ் தடை உத்தரவைப் பிறப்பித்துள்ளார். இது இன்று (அக்டோபர் 20) முதல் அக்டோபர் 31 வரை மாவட்டம் முழுவதும் அமலில் இருக்கும்.

இந்தக் காலகட்டத்தில் மாவட்ட ஆட்சியரின் முன் அனுமதியின்றி ஐந்து அல்லது அதற்கு மேற்பட்ட நபர்கள் ஒன்றுகூடுதல், பொதுக்கூட்டங்கள், ஊர்வலங்கள், ஆர்ப்பாட்டங்கள் ஆகியவை தடை செய்யப்பட்டுள்ளன. குறிப்பாக நினைவு தினங்கள் மற்றும் குருபூஜைக்குச் செல்வோர் வேன், சரக்கு வாகனம், டிராக்டர் உள்ளிட்டவற்றில் தொண்டர்களை ஏற்றிச் செல்ல அனுமதி இல்லை. அனுமதி பெற்ற வாகனங்களில் மட்டுமே பயணம் செய்ய வேண்டும் என போலீசார் அறிவுறுத்தியுள்ளனர்.

மாவட்ட காவல்துறை கூடுதல் பாதுகாப்பு ஏற்பாடுகளைச் செய்துள்ளது. பொதுமக்கள் ஒத்துழைப்புடன் செயல்பட்டு, அமைதியான முறையில் நிகழ்ச்சிகளில் பங்கேற்குமாறு நிர்வாகம் கேட்டுக்கொண்டுள்ளது. இந்த முன்னெச்சரிக்கை நடவடிக்கைகள் மூலம் எந்தவித சட்டம்-ஒழுங்கு பிரச்சினையும் ஏற்படாமல் நிகழ்ச்சிகள் நடத்தப்படும் என எதிர்பார்க்கப்படுகிறது. 
 

இதையும் படிங்க: சிவகங்கையில் பழிக்கு பழி கொலை: ரவுடி சுள்ளான் மதன் ஓட ஓட விரட்டி வெட்டி கொலை!