கோவை மாவட்ட திமுகவினரிடையே செந்தில் பாலாஜி மீதான அதிருப்தி அதிகரித்து வருகிறது. மேற்கு மண்டல பொறுப்பாளராக இருந்தபோதும், தேர்தலுக்குப் பிறகு அவர் கோவையை முற்றிலும் புறக்கணித்துவிட்டதாக கட்சித் தொண்டர்கள் குமுறுகின்றனர்.

முன்பு கரூர் மாவட்டப் பொறுப்பை மட்டும் கவனித்து வந்த செந்தில் பாலாஜிக்கு, மேற்கு மண்டலப் பொறுப்பு வழங்கப்பட்டதில் கோவை முக்கியப் பங்காற்றியது. கடந்த திமுக ஆட்சியில் கோவை முழுவதும் அவரது கட்டுப்பாட்டில் இருந்தது. “செந்தில் பாலாஜி இல்லாமல் கோவையில் அணுவும் அசையாது” என்று சொல்லும் அளவுக்கு அவரது செல்வாக்கு இருந்தது. 

சிறையில் இருந்தபோதும் கூட, அவரது வழிகாட்டுதலின்படியே கட்சி இயங்கியது. 2022 உள்ளாட்சித் தேர்தல் மற்றும் 2024 நாடாளுமன்றத் தேர்தலில் திமுக வெற்றி பெற உதவியதில் அவரது பங்கு குறிப்பிடத்தக்கது. 2024-இல் சிறையில் இருந்தபடியே கோவை தொகுதியில் அண்ணாமலையை வீழ்த்த உதவி செய்தார்.

இதையும் படிங்க: முதலமைச்சர் விஜய் அனுப்பிய மெசேஜ்: அரசியல் குறித்து மனம் திறந்த அட்லி!

2026 சட்டமன்றத் தேர்தலுக்கு முன் கரூருக்குப் பதிலாக கோவை தெற்கு தொகுதியில் போட்டியிட்டார். ரேஸ்கோர்ஸ் பகுதிக்குக் குடிபெயர்ந்து வெற்றியும் பெற்றார். ஆனால் திமுக ஆட்சிக்கு வரவில்லை. தேர்தலுக்கு முன் சென்னை, கரூர், கோவை என மூன்று இடங்களிலும் மாறி மாறிப் பயணம் செய்து வந்த அவர், தேர்தலுக்குப் பிறகு கோவையை மறந்துவிட்டதாக திமுகவினரே புலம்புகின்றனர்.

கடந்த ஆறு மாதங்களாக அவர் கோவைக்கு அதிகம் வரவில்லை. வாக்காளர்களுக்கு நன்றி தெரிவிக்க ஒரே ஒரு முறை மட்டும் வந்தார். 19 வார்டுகளில் தலா ஒரு அலுவலகம் அமைப்பேன் என்ற வாக்குறுதியும் நிறைவேறவில்லை. பொதுவான ஒரே அலுவலகம் மட்டுமே செயல்படுகிறது.

தவெக ஆட்சிக்கு வந்த பிறகு அவர் மீது பல வழக்குகள் தொடுக்கப்பட்டன. சிறிது காலம் தலைமறைவாக இருந்த அவர், ஜாமீன் பெற்று மீண்டும் அரசியலில் ஈடுபட்டார். ஆனால் கோவை பக்கம் வருவதில்லை. கட்சி நிகழ்ச்சிகளில் கூட கலந்துகொள்வதில்லை. மாவட்ட மறுசீரமைப்புக்காக நடந்த ஆலோசனைக் கூட்டங்களிலும், செயற்குழுக் கூட்டங்களிலும் அவர் பங்கேற்கவில்லை. முரசொலி நாளிதழில் அறிவிக்கப்பட்டபோதும் வரவில்லை.

கோவை மாவட்டத்திற்கு சேலம் முன்னாள் எம்.பி. பார்த்திபன் மற்றும் முன்னாள் மேயர் பிரியதர்ஷினி பொறுப்பாளர்களாக நியமிக்கப்பட்டுள்ளனர். தொகுதி மறுசீரமைப்பு தொடர்பான அவரது பரிந்துரைகள் ஏற்கப்படவில்லை. “ஆட்சி இருந்தவரை கோவை தேவைப்பட்டது. ஆட்சி போனதும் கைகழுவிவிட்டார்” என்று கோவை திமுகவினர் கடும் அதிருப்தி தெரிவிக்கின்றனர்.

இதையும் படிங்க: சீறிப்பாய்ந்த காரை மடக்கிய சிங்கம்: துணிச்சல் காவலர் வேல்முருகனுக்கு முதல்வர் விஜய் நேரில் பாராட்டு!