ராமேஸ்வரம்: இலங்கை கடற்படையால் கைது செய்யப்பட்ட ராமேஸ்வரம் மீனவர்கள் 12 பேருக்கு இலங்கை நீதிமன்றம் விதித்த 5.34 லட்சம் ரூபாய் அபராதத்தை உடனடியாக செலுத்தத் தவறியதால், அவர்களை மீண்டும் சிறையில் அடைக்க உத்தரவிடப்பட்டுள்ளது. இந்த சம்பவம் ராமேஸ்வரம் மீனவ சமூகத்தில் பெரும் அதிர்ச்சியையும் கோபத்தையும் ஏற்படுத்தியுள்ளது.
கடந்த டிசம்பர் 23-ம் தேதி ராமேஸ்வரம் மீன்பிடித் துறைமுகத்தில் இருந்து மீன்பிடிக்கச் சென்ற ஒரு விசைப்படகில் இருந்த 12 மீனவர்களை இலங்கை கடற்படை வீரர்கள் கைது செய்து, வவுனியா சிறையில் அடைத்தனர். இலங்கை கடல் எல்லையை மீறி மீன்பிடித்ததாக குற்றச்சாட்டு சுமத்தப்பட்டது.
நேற்று (ஜனவரி 23) விசாரணைக்காக மன்னார் நீதிமன்றத்தில் ஆஜர்படுத்தப்பட்ட இவர்களுக்கு, நீதிபதி ஹியத்துல்லா தலா 44,500 இலங்கை ரூபாய் (இந்திய மதிப்பில் சுமார் 12,000 ரூபாய் வீதம்) வீதம் மொத்தம் 5.34 லட்சம் ரூபாய் அபராதம் விதித்தார். அபராதத் தொகையை உடனடியாக செலுத்தத் தவறினால், ஆறு மாதம் சிறைத் தண்டனை விதிக்கப்படும் எனவும் உத்தரவிட்டார்.
இதையும் படிங்க: தொடரும் இலங்கை கடற்படை அட்டூழியம்! 12 மீனவர்கள் கைதை கண்டித்து ராமேஸ்வரத்தில் மீனவர்கள் போராட்டம்!
மீனவர்களின் குடும்பத்தினர் அபராதத் தொகை செலுத்தாமலேயே அவர்களை விடுவிக்கலாம் என்று எதிர்பார்த்திருந்த நிலையில், தொகை செலுத்தப்படாததால் போலீசார் அவர்களை கொழும்பு அருகே உள்ள வெளிக்கடை சிறையில் அடைத்துள்ளனர்.
இது மீனவ குடும்பங்களுக்கு பெரும் ஏமாற்றத்தை ஏற்படுத்தியுள்ளது. அபராதத் தொகை செலுத்தப்பட்டால் மட்டுமே விடுதலை கிடைக்கும் என்பதால், உறவினர்கள் தற்போது திரட்டும் பணியில் ஈடுபட்டுள்ளனர்.
ராமேஸ்வரம் மீனவர்கள் அடிக்கடி இலங்கை கடற்படையால் கைது செய்யப்படுவது தொடர்பான பிரச்சினை பல ஆண்டுகளாக நீடித்து வருகிறது. இந்திய-இலங்கை கடல் எல்லை பிரச்சினை, மீன்பிடி உரிமை தொடர்பான மோதல்கள் ஆகியவை இதற்கு முக்கிய காரணங்களாக உள்ளன.
தமிழக முதலமைச்சர் மு.க. ஸ்டாலின் உள்ளிட்டோர் இதுபோன்ற சம்பவங்களில் மத்திய அரசிடம் தலையீடு கோரி வருகின்றனர். ஆனால், தொடர்ச்சியான கைதுகள் மற்றும் அபராதங்கள் மீனவ சமூகத்தின் வாழ்வாதாரத்தை பெரிதும் பாதித்து வருகின்றன.
இந்த சம்பவத்தால் ராமேஸ்வரத்தில் மீனவர்கள் மத்தியில் கோபம் அதிகரித்துள்ளது. உடனடியாக மீனவர்களை விடுவிக்க வேண்டும், அபராதத் தொகையை ரத்து செய்ய வேண்டும் என கோரிக்கைகள் எழுந்துள்ளன. மத்திய மற்றும் மாநில அரசுகள் இலங்கை அரசுடன் பேச்சுவார்த்தை நடத்தி நிரந்தர தீர்வு காண வேண்டும் என்ற கோரிக்கை வலுப்பெற்று வருகிறது. மீனவர்களின் குடும்பத்தினர் தற்போது பெரும் மன உளைச்சலுடன் காத்திருக்கின்றனர்.
இதையும் படிங்க: தொடரும் இலங்கை கடற்படை அட்டூழியம்! 12 மீனவர்கள் கைதை கண்டித்து ராமேஸ்வரத்தில் மீனவர்கள் போராட்டம்!