சிவகங்கையில்  NGO பகுதியில் மின் கட்டணம் கணக்கிடுவதில் காலதாமதம் ஏற்பட்டுள்ளதால்
மின் நுகர்வோர்க்கு பாதிப்பு ஏற்பட்டுள்ளது உரிய நேரத்தில் கணக்கீடு செய்யாததால் மின்கட்டணங்கள் இரு மடங்கு அதிகரிக்கும் நிலை ஏற்பட்டுள்ளது. தமிழ்நாடு மின்சார வாரியத்தில் மின் நுகர்வு கணக்கீடு செய்யும் பணியில் காலதாமதம் ஏற்படுவதால், மின் பயனீட்டாளர்கள்  பாதிக்கப்படுவதாக புகார் எழுந்துள்ளது.

சிவகங்கை நகரில் பனங்காடி சாலையில் உள்ள என் ஜி ஓ பிரிவில் அழகுமெய்ஞானபுரம், ரோஸ்நகர், முத்துநகர் ஆயுதப்படை, குடியிருப்பு, குடிசை மாற்று வாரிய குடியிருப்பு பகுதி உள்ளிட்ட பல்வேறு பகுதிகளில் 3200 க்கும் மேற்பட்ட வீடுகளில் மின் கணக்கீடு செய்யப்படவில்லை கடந்த மாத இறுதிக்குள் கணக்கீடு செய்திருக்க வேண்டிய நிலையில் 10 நாட்கள் ஆகியும் மின்கணக்கீடு செய்யாததால் கட்டணம் இரு மடங்கு உயரக்கூடும் என்று கவலையில் உள்ளனர்

மின்சார வாரியத்தின் சார்பில் வீடுகள் மற்றும் வணிக நிறுவனங்களில் குறிப்பிட்ட கால இடைவெளியில் 60 நாள் மின் மீட்டர் அளவீடு செய்யப்பட்டு, அதனடிப்படையில் மின் கட்டணம் நிர்ணயம் செய்யப்படுகிறது. ஆனால் மின் கணக்கீட்டு பணியை உரிய காலத்தில் மேற்கொள்ளாமல் தாமதப்படுத்துவதாகவும், இதனால் அடுத்தடுத்த மாதங்களில் அதிக அளவிலான மின் கட்டணம் ஒரே நேரத்தில் செலுத்த வேண்டிய நிலை ஏற்படுவதாகவும் நுகர்வோர் தெரிவிக்கின்றனர்.

இதையும் படிங்க: மானிய கோரிக்கை விவாதங்கள் வெறும் அறிக்கைதான்! பிரேமலதா விஜயகாந்த் குற்றச்சாட்டு!

குறிப்பாக, உரிய காலத்தில் மின் அளவீடு செய்யப்படாததால், முந்தைய மாதங்களின் நிலுவை மற்றும் தற்போதைய நுகர்வு ஆகியவை சேர்ந்து அதிக தொகையாக கணக்கிடப்படும் சூழல் ஏற்படுகிறது. இதனால் குறைந்த வருமானம் கொண்ட குடும்பங்கள் உள்ளிட்ட மின் பயனீட்டாளர்கள் கூடுதல் நிதிச்சுமையை எதிர்கொள்ள நேரிடுகிறது.

மேலும், மின் மீட்டர் கணக்கீட்டில் ஏற்படும் தாமதம் மற்றும் தவறுகள் காரணமாக மின் கட்டணத்தில் சந்தேகம் ஏற்படும் பயனீட்டாளர்கள் மின்வாரிய அலுவலகங்களுக்கு நேரில் சென்றாலும் சரியான பதில் கிடைக்கவில்லை. 

எனவே, மின் கணக்கீட்டு பணியை உரிய கால அட்டவணைப்படி முறையாக மேற்கொள்ளவும், மின் மீட்டர் அளவீட்டில் ஏற்படும் காலதாமதம் மற்றும் தவறுகளை தவிர்க்கவும் மின்வாரிய அதிகாரிகள் உரிய நடவடிக்கை எடுக்க வேண்டும் என மின் பயனீட்டாளர்கள் கோரிக்கை விடுத்துள்ளனர். 

மின் கணக்கீட்டு பணியை மின்வாரிய ஒப்பந்த பணியாளர்கள் செய்து வரும் நிலையில் அவர்களுக்கு கடந்த ஜூன் மாதம் முதல் ஊதியம் வழங்கப்படவில்லை என கூறப்படுகிறது இதனால் அவர்கள் கணக்கெடுக்கும் பணியை செய்யாததால் இந்த பாதிப்பு ஏற்பட்டதாக மின்வாரிய வட்டாரங்கள் தெரிவிக்கிறது

இதையும் படிங்க: 20 லட்சம் இளைஞர்கள்... 20 ஆயிரம் காலி பணியிடங்கள்..! அடித்தட்டு மக்களுக்காக குரல் கொடுத்த வேல்முருகன்..!!