மறைந்த தமிழறிஞர் சாலமன் பாப்பையாவின் உடலுக்கு முழு அரசு மரியாதை செலுத்தப்பட்டு அவரது ஆசைப்படியே தகனம் செய்யப்பட்டது. தமிழ் இலக்கிய உலகத்திலும் பட்டிமன்றக் கலையிலும் தனித்துவமான இடத்தைப் பிடித்திருந்த அவர், செப்டம்பர் 11ஆம் தேதி மதுரையில் உள்ள தனியார் மருத்துவமனையில் வயது மூப்பு காரணமாக உயிரிழந்தார். அவருக்கு வயது 90.

மதுரை அமெரிக்கன் கல்லூரியில் தமிழ்த் துறைப் பேராசிரியராகப் பணியாற்றிய அவர், தொலைக்காட்சிப் பட்டிமன்றங்களின் வழியாகத் தமிழைச் சாதாரண மக்களின் வீடுகளுக்குள் கொண்டு சென்றவர். திருக்குறள், சங்க இலக்கியம், கம்பன், பாரதி உள்ளிட்ட பல நூல்களின் ஆழத்தை எளிய நகைச்சுவையுடன் விளக்கி, ஆயிரக்கணக்கான நிகழ்ச்சிகளில் நடுவராக இருந்து தமிழ் சமூகத்தின் இதயங்களை வென்றார்.அவரது மறைவு செய்தி பரவியதும் தமிழகம் முழுவதும் பெரும் வருத்தம் நிலவியது.

மதுரை ஞானஒளிபுரத்தில் உள்ள அவரது இல்லத்தில் உடல் வைக்கப்பட்டபோது அரசியல் தலைவர்கள், இலக்கியவாதிகள், திரையுலகினர், மாணவர்கள், பொதுமக்கள் எனப் பலரும் அஞ்சலி செலுத்தக் குவிந்தனர். அவரது நீண்டகால உதவியாளர் உள்ளிட்டவர்கள், அவர் தனது உடல் அடக்கம் செய்யப்படாமல் தகனம் செய்யப்பட வேண்டும் எனத் தெளிவாகக் கூறியிருந்ததை நினைவுகூர்ந்தனர். கிறிஸ்தவக் குடும்பத்தில் பிறந்தாலும் சாதி, மத வேறுபாடுகளைக் கடந்து வாழ்ந்த அவர், தனது இறுதி ஆசையை அப்படியே நிறைவேற்ற வேண்டும் எனக் குடும்பத்தினர் முடிவு செய்தனர்.தமிழ்நாடு அரசு அவரது பங்களிப்பைப் பாராட்டி முழு அரசு மரியாதையுடன் இறுதிச் சடங்குகளை நடத்த முடிவு செய்தது. அமைச்சர் நிர்மல் குமார் இதனை அறிவித்தார்.

இதையும் படிங்க: நீங்கா நினைவில்..!! மறைந்த தமிழறிஞர் சாலமன் பாப்பையாவுக்கு அரசு மரியாதை... தமிழ்நாடு அரசு அறிவிப்பு..!!

தமிழறிஞர்கள் மற்றும் பலரின் கோரிக்கைகளை ஏற்று இந்த முடிவு எடுக்கப்பட்டது. இன்று மதுரை தத்தனேரி மின் மயானத்தில் இறுதிச் சடங்குகள் நடைபெற்றன. அரசு மரியாதையின் அங்கமாக துப்பாக்கிக் குண்டுகள் முழங்க அஞ்சலி செலுத்தப்பட்டது. அவரது உடல் அவரது விருப்பத்தின்படி தகனம் செய்யப்பட்டது.சாலமன் பாப்பையா மதுரை மாவட்டம் திருமங்கலம் அருகே உள்ள சாத்தங்குடியில் 1936ஆம் ஆண்டு பிறந்தார். வறுமையான சூழலில் வளர்ந்தாலும் கல்வியில் ஆர்வம் கொண்டு உயர்ந்தார். அமெரிக்கன் கல்லூரியில் தமிழ்த் துறையைத் தலைமை தாங்கி, பல தலைமுறை மாணவர்களை உருவாக்கினார். பட்டிமன்ற மேடைகளில் அவரது இனிமையான குரல், தெளிவான தமிழ், நகைச்சுவை கலந்த விளக்கங்கள் பல்லாயிரக்கணக்கானோரை ஈர்த்தன. இந்தியாவிலும் வெளிநாடுகளிலும் பன்னிரண்டு ஆயிரத்திற்கும் மேற்பட்ட பட்டிமன்றங்களை நடத்தினார்.

கலைமாமணி, பத்மஸ்ரீ உள்ளிட்ட விருதுகள் அவருக்கு வழங்கப்பட்டன. சில திரைப்படங்களிலும் சிறிய வேடங்களில் தோன்றினார்.அவரது மனைவி ஜெயபாய் கடந்த ஆண்டு காலமானார். மகன், மகள் உள்ளிட்ட குடும்பத்தினர் அவரது இழப்பைத் தாங்க முடியாமல் வருந்தினர். அவரது மறைவு தமிழ் இலக்கியத்திற்கும் பட்டிமன்றக் கலைக்கும் ஈடுசெய்ய முடியாத இழப்பாகக் கருதப்படுகிறது. அவரது குரல் இனிமேல் பட்டிமன்ற மேடைகளில் ஒலிக்காது என்றாலும், அவர் விட்டுச் சென்ற தமிழ் விளக்கங்களும் நகைச்சுவையும் மக்களின் நினைவில் நிரந்தரமாக இருக்கும். முழு அரசு மரியாதையுடன் நடைபெற்ற இறுதிச் சடங்கு, தமிழ் சமூகம் அவருக்கு அளித்த கடைசி அன்பின் அடையாளமாக நின்றது.

இதையும் படிங்க: சாலமன் பாப்பையா புகழ் என்றும் நிலைத்திருக்கும்! மக்கள் நீதி மய்யம் தலைவர் கமல்ஹாசன் இரங்கல்!