செஞ்சி அருகே 7 வயது சிறுமி மாயம்: 100-க்கும் மேற்பட்ட காவல்துறையினர் அடங்கிய குழு அமைக்கப்பட்டு, சிறுமியை மீட்கத் தொடர்ந்து முயற்சிகள் மேற்கொள்ளப்பட்டு வருவதாகவும், போதிய தகவல் தொடர்பு இல்லாததால் விசாரணையில் தோய்வு ஏற்ப்பட்டுள்ளதாக எஸ்.பி மதிவாணன் தகவல் 

விழுப்புரத்தில் ஹெல்மெட் அணிவதன் அவசியம் குறித்த விழிப்புணர்வு நிகழ்ச்சியை மாவட்ட காவல் கண்காணிப்பாளர் எஸ். மதிவாணன் தொடங்கி வைத்தார். இதனைத் தொடர்ந்து, செஞ்சி அருகே 7 வயது சிறுமி காணாமல் போனது தொடர்பாக செய்தியாளர்களிடம் கேட்ட கேள்விக்கு பதிலளித்த  பேசிய அவர், சிறுமியை மீட்பதற்காக காவல்துறை சார்பில் தொடர்ந்து பல்வேறு நடவடிக்கைகள் மேற்கொள்ளப்பட்டு வருவதாகத் தெரிவித்தார்.

இந்த வழக்கில் வெளிநபர்களுக்குத் தொடர்பு உள்ளதா அல்லது உள்ளூரைச் சேர்ந்தவர்கள் யாருக்காவது தொடர்பு உள்ளதா என்ற பல்வேறு கோணங்களில் விசாரணை நடைபெற்று வருவதாகக் கூறினார். மேலும், தொடர் குற்றவாளிகள், பாலியல் குற்ற வழக்குகளில் தொடர்புடையவர்கள் மற்றும் குழந்தைகளுக்கு எதிரான குற்றங்களில் ஈடுபட்டவர்கள் குறித்த பட்டியல்கள் தயாரிக்கப்பட்டு, அவர்களிடமும் விசாரணை நடத்தப்பட்டு வருவதாகத் தெரிவித்தார். தொழில்நுட்ப உதவியுடனும் விசாரணை தீவிரப்படுத்தப்பட்டுள்ளதாகக் கூறினார்.

இதையும் படிங்க: சிறுமி மாயமான விவகாரத்தில் அதிரடி திருப்பம்... தாயிடம் காத்திருக்கும் கிளைமேக்ஸ்... புது ட்விஸ்ட் எடுத்த போலீஸ்...!

கூடுதல் காவல் கண்காணிப்பாளர் தலைமையில் 100-க்கும் மேற்பட்ட காவல்துறையினர் அடங்கிய குழு அமைக்கப்பட்டு, சிறுமியை மீட்கத் தொடர்ந்து முயற்சிகள் மேற்கொள்ளப்பட்டு வருவதாகவும், குழந்தையை உயிருடன் மீட்போம் என்ற நம்பிக்கை இருப்பதாகவும் எஸ்.பி. மதிவாணன் தெரிவித்தார்.

சிறுமி காணாமல் போய் ஆறு நாட்கள் ஆகியும் கண்டுபிடிக்க முடியாததற்காண காரணம் குறித்து கேட்டதற்கு, சம்பவம் நடைபெற்ற பகுதி கிராமப்புறமாக இருப்பதால், அப்பகுதிக்குள் நுழையும் இடம் ஒன்றில் மட்டுமே சிசிடிவி கேமரா இருப்பதாகவும், தொழில்நுட்ப வசதிகள் குறைவாக இருப்பதாகவும் தெரிவித்தார்.

எளிதில் கிடைக்கக்கூடிய தடயங்கள் இதுவரை கிடைக்காததால் விசாரணையில் சற்று தொய்வு ஏற்பட்டுள்ளதாகக் குறிப்பிட்ட அவர், காவல்துறையினர் தொடர்ந்து பல்வேறு கோணங்களில் விசாரணை மேற்கொண்டு வருவதாகவும், விரைவில் நல்ல செய்தி கிடைக்கும் என நம்புவதாகவும் கூறினார்.

சில கோணங்களில் வலுவான சந்தேகம், விசாரணையில் ஏதேனும் துப்பு கிடைத்துள்ளதா என்ற கேள்விக்கு, சில கோணங்களில் வலுவான சந்தேகங்கள் எழுந்துள்ளதாகவும், அவற்றின் அடிப்படையில் தொடர்ந்து விசாரணை நடைபெற்று வருவதாகவும் தெரிவித்தார். விசாரணை நடைபெற்று வரும் தற்போதைய சூழலில், கூடுதல் விவரங்களை வெளியிட இயலாது என்றும் எஸ்.பி. மதிவாணன் தெரிவித்தார்

இதையும் படிங்க: செஞ்சி சிறுமி சம்பவத்தில் திடுக் திருப்பம்... நேராக கரும்பு தோட்டத்திற்குள் சென்ற மோப்ப நாய்... நடந்தது என்ன?