தமிழ்நாட்டில் வாக்காளர் பட்டியல் சிறப்பு சுருக்கமுறை திருத்தம் தொடர்பாக சென்னை தலைமைச் செயலகத்தில் இன்று அனைத்துக் கட்சிக் கூட்டம் நடைபெற்றது. தமிழ்நாடு தலைமைத் தேர்தல் அதிகாரி அர்ச்சனா பட்நாயக் தலைமையில் நடைபெற்ற இந்தக் கூட்டத்தில், வாக்காளர் பட்டியல் திருத்தப் பணிகள், வரைவு பட்டியல் வெளியீடு, பெயர் சேர்த்தல் மற்றும் நீக்குதல் உள்ளிட்ட அம்சங்கள் குறித்து ஆலோசிக்கப்பட்டது.

இந்தியத் தேர்தல் ஆணையம் அறிவித்துள்ள அட்டவணையின்படி 2027 ஆம் ஆண்டுக்கான புகைப்படத்துடன் கூடிய வாக்காளர் பட்டியல் சிறப்பு சுருக்கமுறை திருத்தப் பணிகள் மேற்கொள்ளப்படவுள்ளன. 2027 ஜனவரி 1 ஆம் தேதியைத் தகுதியேற்படுத்தும் நாளாகக் கொண்டு இந்தப் பணிகள் நடைபெறும். நவம்பர் 2 ஆம் தேதி ஒருங்கிணைந்த வரைவு வாக்காளர் பட்டியல் வெளியிடப்படும். அதன்பிறகு நவம்பர் 12 முதல் டிசம்பர் 11 வரை பெயர் சேர்த்தல், நீக்குதல், திருத்தம் மற்றும் முகவரி மாற்றம் தொடர்பான விண்ணப்பங்கள் ஏற்கப்படும்.

இறுதி வாக்காளர் பட்டியல் 2027 ஜனவரி 4 ஆம் தேதி வெளியிடப்படும் என அறிவிக்கப்பட்டுள்ளது.இந்தக் கூட்டத்திற்கு திமுக, அதிமுக, தமிழக வெற்றிக் கழகம், விடுதலைச் சிறுத்தைகள் கட்சி, நாம் தமிழர் கட்சி, தேமுதிக உள்ளிட்ட மாநில அங்கீகாரம் பெற்ற கட்சிகள் மற்றும் பாஜக, காங்கிரஸ், மார்க்சிஸ்ட் கம்யூனிஸ்ட், இந்திய கம்யூனிஸ்ட் உள்ளிட்ட தேசியக் கட்சிகள் என மொத்தம் 13 கட்சிகளின் பிரதிநிதிகளுக்கு அழைப்பு விடுக்கப்பட்டிருந்தது.

இதையும் படிங்க: ஓயாத SIR பிரச்சனை..! அதுக்குள்ள SSR..! மக்கள் அலையனுமா.? வேல்முருகன் காட்டம்..!

கூட்டம் தொடங்கியதும் இந்திய தலைமைத் தேர்தல் ஆணையர் ஞானேஷ் குமார் பதவி விலக வேண்டும் என வலியுறுத்தி ஆளும் தமிழக வெற்றிக் கழகமும் அதன் கூட்டணிக் கட்சியான காங்கிரசும் வெளிநடப்பு செய்தன. திமுக உள்ளிட்ட சில கட்சிகளும் இதே கோரிக்கையை முன்வைத்து கூட்டத்திலிருந்து வெளியேறின. வாக்காளர் பட்டியல் திருத்த நடைமுறைகள் குறித்து கட்சிகளின் கருத்துகளைக் கேட்பதற்காக ஏற்பாடு செய்யப்பட்ட இந்தக் கூட்டத்தில் இத்தகைய வெளிநடப்பு ஏற்பட்டது அரசியல் வட்டாரங்களில் பரபரப்பை ஏற்படுத்தியுள்ளது. 

இதையும் படிங்க: தலைமை தேர்தல் அதிகாரி அர்ச்சனா பட்நாயக் தலைமையில் அனைத்து கட்சி கூட்டம் அறிவிப்பு..!