பாமக மாணவர் சங்கத்தின் மாநிலப் பொதுக்குழு கூட்டம் இன்று சென்னையில் நடைபெற்றது. இதில் பாமக தலைவர் அன்புமணி ராமதாஸ், பொதுச் செயலாளர் வடிவேல் ராவணன் உள்ளிட்ட முக்கிய நிர்வாகிகள் கலந்துகொண்டனர்.

நிகழ்ச்சியின் தொடக்கத்தில் உற்சாகமடைந்த மாணவர்கள் மற்றும் நிர்வாகிகள் விசில் சத்தம் எழுப்பினர். அப்போது குறுக்கிட்ட அன்புமணி ராமதாஸ், "எதுக்கு விசில்? விசில் சத்தத்தைக் குறைத்துக்கொள்ளவும்" என்று கண்டிப்புடன் கூறினார். அதன் பிறகு அரங்கில் சத்தம் குறைந்து அமைதி நிலவியது.

நிகழ்ச்சியில் பங்கேற்ற மாணவர்கள் தங்களது வலது கரத்தை நீட்டி, அன்புமணி ராமதாஸ் வாசிக்க, பின்வரும் 10 அம்ச உறுதிமொழிகளை ஏற்றனர்: அனைவருக்கும் கட்டணமில்லா, சுமையற்ற, திறன்சார்ந்த அறிவுசார் கல்வியை உறுதி செய்யப் பாடுபடுவோம். சமூக நீதியே எங்கள் உயிர் மூச்சு' என முழங்குவோம்; கல்வியை வணிகமயமாக்குவதைத் தடுத்து, நீட் போன்ற நுழைவுத் தேர்வுகளை அகற்றப் பாடுபடுவோம்.

இதையும் படிங்க: தேர்தல் தோல்வி பயத்தில் தான் ரூ.5,000 வரவு..!! முதல்வரை கிழித்து தொங்கவிட்ட அன்புமணி ராமதாஸ்..!!

தமிழக இளைஞர்களுக்குத் தனியார் நிறுவனங்களில் 80 விழுக்காடு (80%) வேலைவாய்ப்பு வழங்கப்படுவதை உறுதி செய்வோம். ஒரு சொட்டு மது மற்றும் கஞ்சா இல்லாத தமிழகத்தை அமைப்போம்; புகைபிடித்தல் மற்றும் குட்காவிற்கு எதிரான கலாச்சாரத்தை உருவாக்குவோம். தமிழரின் மொழி, பண்பாடு, நாகரிகத்தைக் காப்போம்; வன்முறை மற்றும் பயங்கரவாதத்திற்கு எதிராக விழிப்புணர்வு ஏற்படுத்துவோம். 108 அவசர ஊர்தி சேவை போல, அரசு மருத்துவமனைகளில் அனைவருக்கும் உயர்தரமான கட்டணமில்லா மருத்துவம் கிடைப்பதை உறுதி செய்வோம். உணவு படைக்கும் உழவர்களைக் கடவுளாகக் கருதி, விவசாயத்தை லாபகரமான தொழிலாக மாற்றவும், நீர் மேலாண்மையை மேம்படுத்தவும் பாடுபடுவோம். ஒரு பைசா ஊழல் இல்லாத நேர்மையான ஆட்சியை அமைக்கவும், ஓட்டுக்குப் பணம் கொடுக்கும் கலாச்சாரத்தை ஒழிக்கவும் பரப்புரை செய்வோம். வரதட்சணைக் கொடுமையை ஒழிப்போம்; பெண்கள் அச்சமின்றி நடமாடக்கூடிய பாதுகாப்பான சூழலை உருவாக்குவோம். நிலம், நீர், காற்று மாசுபடாமல் காத்து, அடுத்த தலைமுறைக்குப் பசுமையான பூமியை விட்டுச்செல்ல மாணவர் சக்தியைப் பயன்படுத்துவோம்.

இந்த உறுதிமொழிகளை ஏற்றுக்கொண்ட மாணவர்கள், தமிழகத்தில் அரசியல் மாற்றத்தை ஏற்படுத்தத் தீவிரமாகப் பணியாற்றுவோம் எனத் தெரிவித்தனர்.

இதையும் படிங்க: திமுக ஒரு இலக்க இடங்களிலேயே சுருங்கும்!  மதுரையில் அன்புமணி ராமதாஸ் காட்டம்!