தாம்பரம்: இந்திய ராணுவ வீரர், பயங்கரவாத தாக்குதலில் வீரமரணம் அடைந்த மேஜர் முகுந்த் வரதராஜனின் நினைவைப் போற்றும் வகையில், தாம்பரம் - வேளச்சேரி சாலைக்கு ‘மேஜர் முகுந்த் வரதராஜன் சாலை’ என்று பெயர் சூட்ட மாநகராட்சி கூட்டத்தில் தீர்மானம் நிறைவேற்றப்பட்டுள்ளது. இந்த முடிவு உள்ளூர் மக்கள் மற்றும் ராணுவ வீரர்களின் குடும்பத்தினரிடையே பெரும் மகிழ்ச்சியை ஏற்படுத்தியுள்ளது.

மேஜர் முகுந்த் வரதராஜன், தாம்பரம் கிழக்குப் பகுதியில் உள்ள தனது இல்லத்தில் பெற்றோருடன் வசித்து வந்தவர். இந்திய ராணுவத்தில் துணிவுடன் பணியாற்றிய அவர், பயங்கரவாதிகளின் தாக்குதலில் வீரமரணம் அடைந்தார். அவரது துணிச்சலுக்கு இந்திய அரசு உயரிய விருதான ‘அசோக சக்ரா’ வழங்கி கௌரவித்தது. தனது பகுதியைச் சேர்ந்த வீரரின் நினைவை நிலைப்படுத்தும் வகையில் இந்தப் பெயர் மாற்றம் முக்கியத்துவம் பெறுகிறது.

இந்த தீர்மானத்திற்கான நடவடிக்கைகள் கடந்த ஆகஸ்ட் மாதம் தொடங்கின. நகராட்சி நிர்வாக இயக்குநர் சார்பில் 2025 ஆகஸ்ட் 26-ம் தேதி கடிதம் அனுப்பப்பட்டது. அதைத் தொடர்ந்து செப்டம்பர் 19-ம் தேதி தமிழ்நாடு நகர்ப்புற உள்ளாட்சிகள் சட்டம் 1998 மற்றும் விதிகள் 2023-ன் பிரிவு 186-ஐப் பின்பற்றி அனுமதி கோரப்பட்டது. 

இதையும் படிங்க: ஜம்மு காஷ்மீரில் குண்டு வெடிப்பு!! 2 ராணுவ வீரர்கள் பலி! தளவாடங்களை ஒப்படைக்கும் போது சோகம்?!

அக்டோபர் 23-ம் தேதி துறை முதன்மை செயலர் தரப்பில் தீர்மானம் நிறைவேற்ற அனுமதி வழங்கப்பட்டது. இதையடுத்து, நேற்று நடைபெற்ற தாம்பரம் மாநகராட்சி மாமன்றக் கூட்டத்தில் இந்த முக்கிய தீர்மானம் ஒருமனதாக நிறைவேற்றப்பட்டது.

ரயில் நிலையத்திலிருந்து வேளச்சேரி வரை செல்லும் முக்கிய சாலைக்கு வீரரின் பெயர் சூட்டப்படுவது, அந்தப் பகுதி மக்களுக்கு பெருமிதத்தை ஏற்படுத்தியுள்ளது. மேஜர் முகுந்தின் பெற்றோர் வசிக்கும் இடத்துக்கு அருகிலேயே இந்தச் சாலை அமைந்துள்ளதால், இந்த முடிவு அவர்களுக்கும் உணர்ச்சிப்பூர்வமானதாக அமைந்துள்ளது.

இந்த நடவடிக்கைக்கு உள்ளாட்சி பிரதிநிதிகள், ராணுவ முன்னாள் வீரர்கள் மற்றும் பொதுமக்கள் பலரும் வரவேற்பு தெரிவித்து வருகின்றனர். தேசத்திற்காக உயிரைத் தியாகம் செய்த வீரர்களின் நினைவை நிலைப்படுத்தும் வகையில் உள்ளாட்சி அமைப்புகள் மேற்கொள்ளும் நடவடிக்கைகள் பாராட்டுக்குரியவை என்று பலரும் கூறுகின்றனர்.

தாம்பரம் மாநகராட்சியின் இந்த முடிவு, மற்ற நகராட்சிகளுக்கும் ஒரு முன்னுதாரணமாக அமையும் என எதிர்பார்க்கப்படுகிறது. விரைவில் சாலையில் பெயர் பலகைகள் மாற்றப்பட்டு, மேஜர் முகுந்த் வரதராஜனின் நினைவு இனி வரும் தலைமுறையினருக்கும் தொடர்ந்து நினைவூட்டும் வகையில் இருக்கும்.

இதையும் படிங்க: S 400!! இந்தியா வந்தது மற்றொருமொரு சுதர்சன சக்கரம்! 'Project Kusha'உருவாக்கும் பணி தீவிரம்!