தமிழகத்தில் ஆட்டோக்களுக்கான புதிய கட்டணம் அமலுக்கு வந்துள்ள நிலையில், அனைத்து ஆட்டோக்களிலும் ஜி.பி.எஸ். வசதியுடன் கூடிய டிஜிட்டல் மீட்டர் பொருத்தும் திட்டம் குறித்து அரசு எந்த அறிவிப்பும் வெளியிடாதது பயணிகள் மத்தியில் அதிருப்தியை ஏற்படுத்தியுள்ளது. ஏற்கனவே அறிவிக்கப்பட்ட இந்தத் திட்டம் தற்போது கைவிடப்பட்டதா என்ற கேள்வியும் எழுந்துள்ளது.

தமிழகத்தில் ஆட்டோ கட்டணம் கடைசியாக கடந்த 2013-ம் ஆண்டு ஆகஸ்ட் 25-ம் தேதி மாற்றியமைக்கப்பட்டது. சுமார் 13 ஆண்டுகளுக்குப் பிறகு தற்போது புதிய கட்டணத்தை அரசு நிர்ணயித்துள்ளது. இந்தக் கட்டண முறை நேற்று முன்தினம் முதல் நடைமுறைக்கு வந்துள்ளது. இதையடுத்து, தற்போதுள்ள ஆட்டோ மீட்டர்களில் புதிய கட்டண விவரங்களைத் திருத்துவதற்கு ஆறு மாதங்கள் வரை அவகாசம் வழங்கப்பட்டுள்ளது.

கடந்த 2013-ம் ஆண்டு ஆட்டோ கட்டணம் உயர்த்தப்பட்டபோதே, ஆட்டோக்களில் ஜி.பி.எஸ். கருவி மற்றும் பயணக் கட்டணத்துக்கான ரசீது வழங்கும் பிரின்டர் வசதியுடன் கூடிய புதிய டிஜிட்டல் மீட்டர்கள் பொருத்தப்படும் என்று அரசு அறிவித்திருந்தது. இந்த மீட்டர்களை 2014-ம் ஆண்டு பிப்ரவரி மாதத்திற்குள் கொள்முதல் செய்து பயன்பாட்டுக்கு கொண்டு வரவும் திட்டமிடப்பட்டது.

இதையும் படிங்க: கிரானைட் தொழிலதிபர் வீரமணி வழக்கில் முக்கிய திருப்பம்!! டிரைவர்களை அடையாளம் காட்டிய சிறுமிகள்!

இதற்கான டெண்டர் மற்றும் கொள்முதல் பணிகள் அரசு மின்னணு கழகமான எல்காட் வசம் ஒப்படைக்கப்பட்டன. ஆனால், பல்வேறு காரணங்களால் திட்டத்தைச் செயல்படுத்துவதற்கான காலக்கெடு தொடர்ந்து நீட்டிக்கப்பட்டது. இருந்தபோதிலும், அறிவிக்கப்பட்ட காலத்திற்குள் ஜி.பி.எஸ். வசதியுடன் கூடிய டிஜிட்டல் மீட்டர்கள் ஆட்டோக்களில் பயன்பாட்டுக்கு வரவில்லை.

தற்போது புதிய ஆட்டோ கட்டணம் அறிவிக்கப்பட்டுள்ள நிலையில், பழைய மீட்டர்களிலேயே கட்டணத்தைத் திருத்திக் கொள்ள ஆறு மாதங்கள் அவகாசம் அளிக்கப்பட்டுள்ளது. ஆனால், 2013-ம் ஆண்டு அறிவிக்கப்பட்ட ஜி.பி.எஸ். வசதியுடன் கூடிய டிஜிட்டல் மீட்டர் திட்டம் குறித்து புதிய அறிவிப்பு எதுவும் வெளியாகவில்லை. இதனால், அந்தத் திட்டம் கைவிடப்பட்டிருக்கலாம் என்ற சந்தேகம் பயணிகள் மத்தியில் எழுந்துள்ளது.

ஆட்டோக்களில் ஜி.பி.எஸ். வசதி இருந்தால், அவை செல்லும் வழித்தடத்தைக் கண்காணிக்கவும், பயணத்தின் விவரங்களைப் பதிவு செய்யவும் வாய்ப்பு ஏற்படும். குறிப்பாக, பெண்கள் மற்றும் குழந்தைகள் தனியாக ஆட்டோவில் பயணிக்கும் சூழலில், பாதுகாப்பு தொடர்பான புகார்கள் எழும்போது வாகனத்தின் இருப்பிடத்தை அறிய இந்த வசதி உதவக்கூடும். மேலும், டிஜிட்டல் மீட்டருடன் ரசீது வழங்கும் வசதி இருந்தால், பயணக் கட்டணம் தொடர்பான புகார்களுக்கும் ஆதாரமாக அமையும்.

இதுகுறித்து தமிழக முற்போக்கு நுகர்வோர் மையத் தலைவர் சடகோபன் கூறுகையில், பெண்களும் குழந்தைகளும் தனியாகப் பயணிக்கும் நிலை இருப்பதால், பயணிகளின் பாதுகாப்பைக் கருத்தில் கொண்டு அனைத்து ஆட்டோக்களிலும் ஜி.பி.எஸ். கருவிகள் கட்டாயம் பொருத்தப்பட வேண்டும். அப்போதுதான் ஆட்டோக்களின் இயக்கத்தைக் கண்காணிக்க முடியும் என்று வலியுறுத்தியுள்ளார்.

இதற்கிடையே, ஜி.பி.எஸ். வசதியுடன் கூடிய டிஜிட்டல் மீட்டர் திட்டம் தொடர்பாக தமிழக போக்குவரத்து ஆணையரக அதிகாரிகளிடம் கேட்கப்பட்டபோது, அந்தத் திட்டத்தைச் செயல்படுத்துவது குறித்து தமிழக அரசுதான் முடிவெடுத்து அறிவிக்கும் என்று தெரிவித்துள்ளனர்.

இதனால், புதிய ஆட்டோ கட்டணம் அமலுக்கு வந்துள்ள நிலையில், ஏற்கனவே அறிவிக்கப்பட்ட ஜி.பி.எஸ். டிஜிட்டல் மீட்டர் திட்டம் மீண்டும் செயல்படுத்தப்படுமா அல்லது கைவிடப்படுமா என்ற எதிர்பார்ப்பு எழுந்துள்ளது. இதுகுறித்து தமிழக அரசு தெளிவான முடிவை அறிவிக்க வேண்டும் என்பதே பயணிகளின் கோரிக்கையாக உள்ளது.

இதையும் படிங்க: தமிழகத்தில் அதிக வருமானம் ஈட்டும் டாப் 10 கோவில்கள்! ரூ.233.50 கோடியுடன் பழனி முதலிடம்!