சென்னை: தமிழகத்தில் வடகிழக்கு பருவமழை தீவிரமடைந்து வரும் நிலையில், வங்கக்கடலில் உருவாகும் புதிய காற்றழுத்த தாழ்வுப் பகுதி புயலாக வலுப்பெற வாய்ப்புள்ளதாக வானிலை ஆய்வு மையம் தெரிவித்துள்ளது. இந்தப் புயல் தமிழகத்தை நோக்கி வராமல் ஆந்திராவை நோக்கி நகர வாய்ப்புள்ளதாகக் கணிக்கப்பட்டுள்ளது. இதற்கிடையே, தமிழகத்தின் பல மாவட்டங்களில் கனமழை முதல் மிக கனமழை வரை பெய்யக்கூடும் என எச்சரிக்கை விடுக்கப்பட்டுள்ளது.

தமிழகத்தின் கடலோர மாவட்டங்கள் உள்ளிட்ட பல்வேறு பகுதிகளில் கடந்த சில நாட்களாக மழை பெய்து வருகிறது. இதனால் வெப்பத்தின் தாக்கம் குறைந்து, குளிர்ச்சியான வானிலை நிலவுகிறது. பல இடங்களில் ஏரி, குளங்களில் நீர்வரத்து அதிகரித்து வருகிறது. இருப்பினும், அடுத்தடுத்து உருவாகும் காற்றழுத்தத் தாழ்வுப் பகுதிகளால் மழையின் தீவிரம் அதிகரிக்கக்கூடும் என எதிர்பார்க்கப்படுகிறது.

தென்மேற்கு வங்கக்கடல் மற்றும் தென் தமிழகப் பகுதிகளை ஒட்டிய பகுதியில் ஏற்கெனவே குறைந்த காற்றழுத்தத் தாழ்வுப் பகுதி உருவாகியுள்ளது. இதன் காரணமாக தென் மாவட்டங்களில் கனமழை பெய்ய வாய்ப்புள்ளது. மேலும், தென்கிழக்கு மற்றும் மத்திய கிழக்கு வங்கக்கடல் பகுதிகளில் புதிய காற்றழுத்தத் தாழ்வுப் பகுதி உருவாகும் என வானிலை முன்னறிவிப்பில் தெரிவிக்கப்பட்டுள்ளது.

இதையும் படிங்க: சென்னை மக்களே கவனம்! இன்று இரவு மீண்டும் ருத்ர தாண்டவம் ஆட காத்திருக்கும் கனமழை! பிரதீப் ஜான் வார்னிங்!

இதன் காரணமாக தூத்துக்குடி, திருநெல்வேலி, கன்னியாகுமரி, தென்காசி, விருதுநகர், ராமநாதபுரம், தேனி, திண்டுக்கல், மதுரை, கோவை, நீலகிரி, சிவகங்கை, புதுக்கோட்டை, தஞ்சாவூர், திருவாரூர், நாகப்பட்டினம், மயிலாடுதுறை உள்ளிட்ட 17 மாவட்டங்களில் கனமழை முதல் மிக கனமழை வரை பெய்யக்கூடும் எனத் தெரிவிக்கப்பட்டுள்ளது.

தொடர்ந்து வரும் நாட்களிலும் தமிழகத்தின் பல மாவட்டங்களில் மழை நீடிக்க வாய்ப்புள்ளது. கன்னியாகுமரி, நீலகிரி, கோவை மாவட்டங்களில் சில இடங்களில் கனமழை முதல் மிக கனமழையும், ஈரோடு, சேலம், நாமக்கல், கரூர், திருச்சி உள்ளிட்ட பல மாவட்டங்களில் கனமழையும் பெய்யக்கூடும் என முன்னறிவிக்கப்பட்டுள்ளது. புதுச்சேரி, காரைக்கால் பகுதிகளிலும் கனமழைக்கு வாய்ப்புள்ளது. வரும் 27-ம் தேதி வரை பல இடங்களில் மிதமானது முதல் கனமழை வரை பெய்யக்கூடும்.

வங்கக்கடலில் உருவாகும் புதிய காற்றழுத்தத் தாழ்வுப் பகுதி படிப்படியாக வலுப்பெற்று புயலாக மாற வாய்ப்புள்ளதாகவும், அது ஆந்திராவை நோக்கி நகரக்கூடும் என்றும் வானிலை ஆய்வு மையம் தெரிவித்துள்ளது. இருப்பினும், தாழ்வுப் பகுதி உருவான பின்னரே அதன் நகர்வு குறித்து தெளிவாகக் கணிக்க முடியும்.

சென்னை மற்றும் புறநகர் பகுதிகளில் மிதமான மழைக்கு வாய்ப்புள்ளதாகவும், ஞாயிற்றுக்கிழமை கனமழை பெய்யக்கூடும் என்றும் முன்னறிவிக்கப்பட்டுள்ளது. காஞ்சிபுரம், திருவள்ளூர், செங்கல்பட்டு மாவட்டங்களிலும் சில இடங்களில் பலத்த மழை பெய்ய வாய்ப்புள்ளது. பொதுமக்கள் வானிலை ஆய்வு மையத்தின் அதிகாரப்பூர்வ அறிவிப்புகளைத் தொடர்ந்து கவனிக்க வேண்டும்.

இதையும் படிங்க: மக்களே உஷார்! சென்னையை நோக்கி நகரும் கனமழை மேகங்கள்!! 150 மி.மீ. வரை மழை பெய்ய வாய்ப்பு?!