ஜப்பானில் நடைபெற்ற 2026 ஆசிய பாரா விளையாட்டுப் போட்டியில் 114 பதக்கங்களை வென்று இந்திய வீரர், வீராங்கனைகள் வரலாற்றுச் சாதனை படைத்துள்ளனர். இதையடுத்து, இந்திய அணியினருக்குப் பிரதமர் நரேந்திர மோடி வாழ்த்து தெரிவித்துள்ளார். ஆசிய பாரா விளையாட்டுப் போட்டிகளில் இந்தியாவின் இதுவரையிலான சிறந்த செயல்பாடாக இந்தப் பதக்க வேட்டை அமைந்துள்ளது.

ஜப்பானின் அய்ச்சி–நகோயா நகரில் கடந்த அக்டோபர் 18ஆம் தேதி தொடங்கிய ஆசிய பாரா விளையாட்டுப் போட்டிகள் அக்டோபர் 24ஆம் தேதியுடன் நிறைவடைந்தன. ஆசியாவின் பல்வேறு நாடுகளைச் சேர்ந்த மாற்றுத்திறனாளி விளையாட்டு வீரர்கள் பங்கேற்ற இந்தப் போட்டியில், இந்திய அணி பல்வேறு பிரிவுகளில் சிறப்பாகச் செயல்பட்டு பதக்கங்களைக் குவித்தது.

இந்தியா மொத்தம் 30 தங்கம், 35 வெள்ளி, 49 வெண்கலம் என 114 பதக்கங்களை வென்றது. இதன் மூலம் பதக்கப் பட்டியலில் நான்காவது இடத்தைப் பிடித்தது. சீனா முதலிடத்தையும், ஜப்பான் இரண்டாவது இடத்தையும், உஸ்பெகிஸ்தான் மூன்றாவது இடத்தையும் பிடித்தன.

இதையும் படிங்க: பாஜக உடன் நெருக்கம் காட்டும் முதல்வர் விஜய்?! மோடி, அமித் ஷாவுடன் இணக்கம்? காங்கிரசில் அதிருப்தி!

இந்தியாவின் பதக்க வேட்டையில் பாரா தடகளப் போட்டிகள் முக்கியப் பங்கு வகித்தன. இந்தப் பிரிவில் மட்டும் இந்திய வீரர்கள் 65 பதக்கங்களை வென்றனர். பாரா பேட்மிண்டன் போட்டிகளில் 16 பதக்கங்களும், பாரா நீச்சலில் 11 பதக்கங்களும் கிடைத்தன. பாரா வில்வித்தை, துப்பாக்கிச் சுடுதல் உள்ளிட்ட போட்டிகளிலும் இந்திய வீரர், வீராங்கனைகள் பதக்கங்களைப் பெற்றனர்.

இந்திய அணியின் சாதனையைப் பாராட்டிய பிரதமர் மோடி, தனது எக்ஸ் சமூக வலைதளப் பதிவில், 114 பதக்கங்கள் என்பது இந்தியாவின் மிகச்சிறந்த செயல்பாடு என்றும், இந்த வெற்றி நாடு முழுவதும் மகிழ்ச்சியையும் பெருமையையும் ஏற்படுத்தியுள்ளதாகவும் குறிப்பிட்டார். அசாதாரண மன உறுதியுடன் விளையாடிய அணியின் ஒவ்வொரு வீரர், வீராங்கனைக்கும் வாழ்த்து தெரிவித்த அவர், ஒவ்வொருவரும் இந்த வரலாற்றுச் சாதனைக்கு பங்களித்துள்ளதாகவும் கூறினார்.

மேலும், இந்திய வீரர்களின் வெற்றிகள் எண்ணற்ற மக்களுக்கு உத்வேகம் அளிப்பதாகவும் பிரதமர் பாராட்டினார்.

2023ஆம் ஆண்டு ஹாங்சோவில் நடைபெற்ற ஆசிய பாரா விளையாட்டுப் போட்டிகளில் இந்தியா பெற்ற 108 பதக்கங்களைக் கடந்து, இம்முறை 114 பதக்கங்களுடன் புதிய உச்சத்தை எட்டியுள்ளது. இந்திய பாரா விளையாட்டுத் துறையின் வளர்ச்சியை வெளிப்படுத்தும் வகையில் இந்தச் சாதனை அமைந்துள்ளது.

இதையும் படிங்க: பனி மலைகளில் எதிரொலிக்கும் வீர முழக்கம்! ITBP வீரர்களுக்கு மோடி, அமித் ஷா வாழ்த்து!!