மதுரை: தமிழகத்தில் 6 முதல் 8-ம் வகுப்பு மாணவர்களுக்கும் காலை உணவு திட்டத்தை விரிவுபடுத்துவதற்கான தொடக்க விழா, வரும் செப்டம்பர் 17-ம் தேதி விருதுநகரில் நடைபெற உள்ளதாக தகவல் வெளியாகியுள்ளது. காமராஜர் படித்த கே.வி.எஸ். பள்ளியில் இந்த நிகழ்ச்சியை நடத்த அரசு திட்டமிட்டுள்ளதாகவும், இதில் முதல்வர் விஜய் பங்கேற்க வாய்ப்புள்ளதாகவும் கூறப்படுகிறது. எனினும், முதல்வரின் நிகழ்ச்சி இதுவரை அதிகாரப்பூர்வமாக உறுதி செய்யப்படவில்லை.

தமிழகத்தில் தொடக்கப் பள்ளி மாணவர்களின் ஊட்டச்சத்து மற்றும் கல்வி வருகையை மேம்படுத்தும் நோக்கில் 1 முதல் 5-ம் வகுப்பு வரை காலை உணவு வழங்கும் திட்டம் ஏற்கனவே செயல்படுத்தப்பட்டு வருகிறது. இந்த நிலையில், தற்போது 6 முதல் 8-ம் வகுப்பு மாணவர்களுக்கும் திட்டத்தை விரிவுபடுத்த முடிவு செய்யப்பட்டுள்ளதாக தெரிவிக்கப்பட்டுள்ளது.

இந்த விரிவாக்கத்தின் மூலம் தமிழகம் முழுவதும் 15,454 அரசு மற்றும் அரசு உதவி பெறும் பள்ளிகளில் பயிலும் 15 லட்சத்துக்கும் அதிகமான மாணவர்கள் பயன்பெற உள்ளதாக கூறப்படுகிறது. இதனால், நடுநிலை வகுப்பு மாணவர்களுக்கும் பள்ளி நாட்களில் காலை உணவு கிடைக்கும் சூழல் உருவாக உள்ளது.

இதையும் படிங்க: தமிழ்நாட்டை முந்திய புதுச்சேரி! பள்ளிக் கல்வி தரவரிசையில் வெளியான அதிர்ச்சி ரேங்க்! முழு விவரம்!

புதிய திட்டத்தை விருதுநகரில் உள்ள கே.வி.எஸ். பள்ளியில் தொடங்கி வைக்க அரசு திட்டமிட்டுள்ளது. இந்த பள்ளியில் பெருந்தலைவர் காமராஜர் கல்வி பயின்றதாக கூறப்படும் நிலையில், அவரது பெயரில் திட்டம் விரிவுபடுத்தப்படுவது கூடுதல் கவனத்தை பெற்றுள்ளது.

இதையொட்டி கல்வித்துறை அதிகாரிகள் நிகழ்ச்சிக்கான ஆரம்பகட்ட ஏற்பாடுகளை மேற்கொண்டு வருகின்றனர். முதல்வர் விஜய் பங்கேற்று திட்டத்தை தொடங்கி வைப்பது தொடர்பாக ஆலோசனைகள் நடைபெற்று வருவதாக அதிகாரிகள் தெரிவித்துள்ளனர். மாவட்ட நிர்வாகத்துக்கும் இதுகுறித்த தகவல் தெரிவிக்கப்பட்டுள்ளதாக கூறப்படுகிறது.

இதற்கிடையே, செப்டம்பர் 17-ம் தேதியே மீனாட்சி கோவில் கும்பாபிஷேக நிகழ்வும் நடைபெற உள்ளதாக தகவல் வெளியாகியுள்ளது. முதல்வர் விருதுநகர் வருகை உறுதி செய்யப்பட்டால், அந்த நிகழ்ச்சியிலும் அவர் பங்கேற்க வாய்ப்பு இருப்பதாக கூறப்படுகிறது. ஆனால், முதல்வரின் முழுமையான பயணத் திட்டம் இன்னும் இறுதி செய்யப்படவில்லை.

இதனால் செப்டம்பர் 17-ம் தேதி விருதுநகரில் நடைபெற உள்ள காலை உணவு திட்ட விரிவாக்க விழாவில் முதல்வர் விஜய் பங்கேற்பாரா என்ற எதிர்பார்ப்பு தற்போது அதிகரித்துள்ளது. அதிகாரப்பூர்வ அறிவிப்பு வெளியான பிறகே அவரது பங்கேற்பு உறுதியாகும்.

இதையும் படிங்க: அண்ணா பல்கலை கோப்புகள் 3 மாதம் தேக்கம்! துணைவேந்தர் இல்லாததால் முடங்கியதா நிர்வாகம்?