தமிழ்நாட்டில் பத்திரப்பதிவு துறையில் கடந்த காலங்களில் நடந்த முறைகேடுகளை விசாரிக்க அமைக்கப்பட்ட சிறப்பு புலனாய்வுக்குழு (SIT), ஐந்தாண்டுகளாக ஒரு புகாரைக்கூட முழுமையாக விசாரிக்காமல் தேங்கி நிற்கிறது என தகவல்கள் வெளியாகியுள்ளன. இது பொதுமக்களிடையே பெரும் அதிர்ச்சியையும் ஏமாற்றத்தையும் ஏற்படுத்தியுள்ளது.

தமிழகத்தில் சொத்து வாங்கி விற்கும்போது பத்திரங்களை பதிவு செய்ய சார்-பதிவாளர் அலுவலகங்களை மக்கள் நாடுகின்றனர். இங்கு சார்-பதிவாளர்களும், அவர்களின் மேலதிகாரிகளுமே முக்கிய முடிவுகளை எடுக்கின்றனர். 

2021-ல் தி.மு.க. ஆட்சி அமைந்த பிறகு, பதிவுத்துறை அமைச்சராக பொறுப்பேற்ற மூர்த்தி, முந்தைய ஆட்சி காலத்தில் பத்திரப்பதிவில் நடந்த மோசடிகளை விசாரிப்பதாக அறிவித்தார். அதன்படி, 2021 டிசம்பர் 15-ஆம் தேதி அரசாணை (GO No.174) வெளியிடப்பட்டது. 

இதையும் படிங்க: பணி நியமன முறைகேடு! அமைச்சர் நேருவுக்கு சிக்கல்! அடுத்தடுத்து ஆப்பு வைக்கும் அதிமுக எம்.பி!!

வழிகாட்டி மதிப்புக்கு மாறாக பதிவு, வகைப்பாடு மறைத்தல், வேண்டுமென்றே குறைந்த மதிப்பு நிர்ணயம், மோசடி பத்திரங்களை புறக்கணித்தல் உள்ளிட்ட புகார்களை விசாரிக்க இந்த சிறப்பு குழு அமைக்கப்பட்டது.

ஆனால், அரசாணை வெளியான பிறகும் உடனடியாக அதிகாரிகள் நியமிக்கப்படவில்லை. 2023-இல் மட்டுமே குழுவுக்கு உறுப்பினர்கள் நியமிக்கப்பட்டனர். மக்கள் எதிர்பார்த்தபடி, இந்த குழு விசாரணை நடத்தி குற்றச்சாட்டு அறிக்கை அளிக்கும் என நம்பப்பட்டது. 

ஆனால், தி.மு.க. ஆட்சியின் ஐந்தாண்டு காலம் முடிவடைந்த நிலையில், குழு எந்த குறிப்பிடத்தக்க முன்னேற்றத்தையும் காட்டவில்லை. ஒரு புகார்கூட முழுமையாக விசாரிக்கப்படவில்லை என்று துறை வட்டாரங்கள் தெரிவிக்கின்றன.

இது குறித்து பதிவுத்துறை அதிகாரி ஒருவர் கூறியதாவது: "சிறப்பு புலனாய்வுக்குழு விசாரணையில் பல மோசடிகள் தெரியவந்தன. இவை மேலதிகாரிகள் மற்றும் அமைச்சருக்கு தெரிவிக்கப்பட்டன. ஆனால், பெரும்பாலான வழக்குகளில் நடவடிக்கை எடுக்க மேலதிகாரிகள் விரும்பவில்லை. சில சமயங்களில் குற்றச்சாட்டுக்கு ஆளானவர்களே மேலதிகாரிகளாக இருப்பதால், துறை ரீதியான நடவடிக்கை எடுக்க முடியாத நிலை ஏற்பட்டது. இதனால் விசாரணை பாதியிலேயே முடங்கிவிட்டது" என்றார்.

இந்த நிலை, பத்திரப்பதிவு துறையில் நம்பகத்தன்மை குறைந்துவிட்டதாகவும், மக்களின் சொத்து பாதுகாப்புக்கு ஆபத்து ஏற்படலாம் எனவும் விமர்சனங்கள் எழுந்துள்ளன. தேர்தல் முடிந்த பிறகு புதிய அரசு இதில் தீவிர நடவடிக்கை எடுக்குமா என்பதே இப்போது எழும் மிகப்பெரிய கேள்வியாக உள்ளது.

இதையும் படிங்க: சென்னையில் முகாமிடும் அமலாக்கத்துறை தலைமை இயக்குநர்! அமைச்சர்கள் பீதி!! ஆட்டத்தை ஆரம்பிக்கும் பாஜக!