தமிழகத்தில் வாக்காளர் பட்டியல் சிறப்பு தீவிர திருத்தப் பணி இன்று (நவம்பர் 4) தொடங்கி உள்ளது. இதன் முதல் கட்டமாக, ஓட்டுச்சாவடி அலுவலர்கள் (பி.எல்.ஓ.) வீடு வீடாக வந்து கணக்கெடுப்பு படிவங்களை வழங்குவார்கள். வாக்காளர்கள் இன்று அவர்களிடம் படிவத்தைப் பெற்றுக்கொண்டு, விவரங்களைப் பூர்த்தி செய்ய வேண்டும் என்று முன்னாள் தலைமைத் தேர்தல் கமிஷனர் என். கோபாலசாமி தெரிவித்தார்.

இந்தியத் தேர்தல் ஆணையத்தின் வழிகாட்டுதலின்படி, 2002-ஆம் ஆண்டு தயாரிக்கப்பட்ட வாக்காளர் பட்டியலை அடிப்படையாகக் கொண்டு இப்பணி நடக்கிறது. ஒவ்வொரு ஓட்டுச்சாவடி அலுவலரும் தங்கள் பகுதியில் உள்ள வாக்காளர்களின் வீடுகளுக்கு சென்று, படிவம்-1 என்ற கணக்கெடுப்பு படிவத்தை வழங்குவார்கள். இதில் வாக்காளரின் பெயர், முகவரி போன்ற விவரங்கள் முன்பே அச்சிடப்பட்டிருக்கும்.

எத்தனை நாட்கள் ஆகும்?
ஒரு ஓட்டுச்சாவடிக்கு சராசரியாக 1,200 வாக்காளர்கள் இருக்கும் வகையில் பிரிக்கப்பட்டுள்ளது. ஒரு நாளைக்கு 40 முதல் 50 வீடுகள் வரை செல்லும் திட்டம் உள்ளது. எனவே, 7 முதல் 10 நாட்களுக்குள் படிவ விநியோகம் முடியும். அடுத்த சுற்றில் ஆவணங்களைச் சரிபார்த்து, இறுதிப் பட்டியல் தயாரிக்கப்படும்.

இதையும் படிங்க: Breaking! வெளியானது பீகார் தேர்தல் தேதி!! தேர்தல் கமிஷன் அறிவிப்பு!

படிவத்தை எப்படிப் பூர்த்தி செய்வது?

• 2002-ஆம் ஆண்டு அதே இடத்தில் வசித்திருந்தால், தற்போதைய விவரங்களை (போட்டோ, ஆதார், மொபைல் எண் போன்றவை) எழுதி வைக்க வேண்டும்.
• வீடு அல்லது தொகுதி மாறியிருந்தால், அலுவலரிடம் தெரிவிக்க வேண்டும். அவர்கள் 2002 பட்டியலைச் சரிபார்த்து உறுதி செய்வார்கள்.
• குடும்பத்தில் உள்ள அனைத்து வாக்காளர்களின் விவரங்களையும் படிவத்தில் சேர்க்க வேண்டும்.
• அடுத்த முறை அலுவலர் வரும்போது, பூர்த்தி செய்த படிவத்தைத் திரும்ப ஒப்படைக்க வேண்டும்.

சந்தேகம் இருந்தால்?
படிவத்தைப் பூர்த்தி செய்வதில் ஏதேனும் சந்தேகம் இருந்தால், ஓட்டுச்சாவடி அலுவலர்களே உதவி செய்வார்கள். தேவையான ஆவணங்களை (ஆதார், பாஸ்போர்ட், வாக்காளர் அடையாள அட்டை போன்றவை) தயாராக வைத்திருக்க வேண்டும்.

முன்னாள் தலைமைத் தேர்தல் கமிஷனர் கோபாலசாமி கூறுகையில், “இது மிக முக்கியமான பணி. வாக்காளர்கள் ஒத்துழைப்பு அளித்தால், துல்லியமான பட்டியல் தயாராகும். புதிய வாக்காளர்கள், இடமாறியவர்கள், இறந்தவர்களின் பெயர்களை நீக்குதல் போன்றவை இதன் மூலம் சரியாகும்” என்றார்.

தமிழகத்தில் 6.29 கோடி வாக்காளர்கள் உள்ளனர். இப்பணி டிசம்பர் 9-ஆம் தேதி வரை நடைபெறும். இறுதிப் பட்டியல் ஜனவரி 2026-இல் வெளியிடப்படும். வாக்காளர்கள் தவறாமல் படிவத்தைப் பெற்று, சரியாகப் பூர்த்தி செய்து ஒப்படைக்க வேண்டும் எனத் தேர்தல் ஆணையம் கேட்டுக்கொண்டுள்ளது.

இதையும் படிங்க: திமுகவோ? தவெகவோ? நமக்கு 125 சீட்டு கன்பார்ம்!! தொகுதிகள் எவை எவை? காங்கிரஸில் தேர்தல் பணிகள் ஜரூர்!