தமிழகப் பகுதிகள் வழியாகத் தெற்கு உள் கர்நாடகா முதல் மன்னார் வளைகுடா வரை நிலவும் வளிமண்டலக் காற்றழுத்தத் தாழ்வுப் பாதை காரணமாக, தமிழகம், புதுவை மற்றும் காரைக்கால் பகுதிகளில் அடுத்த ஏழு தினங்களுக்கு இடி மின்னலுடன் கூடிய மழை தொடரும் என்று சென்னை மண்டல வானிலை ஆய்வு மையம் தெரிவித்துள்ளது. கடந்த 24 மணி நேரத்தில் அதிகபட்சமாகச் சென்னை ஐசிஎஃப் (ICF) பகுதியில் 56 மி.மீ மழை பதிவாகியுள்ளது. திருச்சி விமான நிலையத்தில் அதிகபட்சமாக 39.5 டிகிரி செல்சியஸ் வெப்பநிலை பதிவான நிலையில், உள் தமிழகத்தில் ஓரிரு இடங்களில் வழக்கத்தை விட 2 முதல் 4 டிகிரி செல்சியஸ் வரை வெப்பநிலை உயரக்கூடும் எனவும் தெரிவிக்கப்பட்டுள்ளது.

இன்று (செப். 11) மேற்கு தொடர்ச்சி மலை மாவட்டங்கள், கடலூர், திருச்சி, தஞ்சாவூர், மதுரை, நாமக்கல், விழுப்புரம் உள்ளிட்ட மாவட்டங்களில் மணிக்கு 40 முதல் 50 கி.மீ வேக பலத்த காற்றுடன் லேசானது முதல் மிதமான மழை பெய்யக்கூடும். செப்டம்பர் 12 மற்றும் 13 ஆகிய தேதிகளில் மதுரை, தேனி, திண்டுக்கல், விருதுநகர், சிவகங்கை உள்ளிட்ட தென் மாவட்டங்களில் மிதமான மழை தொடரும். குறிப்பாக, செப்டம்பர் 15-ஆம் தேதி விழுப்புரம், திருவண்ணாமலை, தர்மபுரி, சேலம் மற்றும் கோயம்புத்தூர் ஆகிய ஐந்து மாவட்டங்களில் ஓரிரு இடங்களில் கனமழை பெய்ய வாய்ப்புள்ளதாக வானிலை மையம் எச்சரித்துள்ளது.

சென்னை மற்றும் புறநகர்ப் பகுதிகளில் அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும் எனவும், நகரின் ஒருசில இடங்களில் இடி மின்னலுடன் கூடிய லேசானது முதல் மிதமான மழை பெய்ய வாய்ப்புள்ளதாகவும் தெரிவிக்கப்பட்டுள்ளது. அதிகபட்ச வெப்பநிலை 34 முதல் 36 டிகிரி செல்சியஸ் வரை பதிவாகக்கூடும். மேலும், தென் தமிழகக் கடலோரப் பகுதிகள், மன்னார் வளைகுடா மற்றும் குமரிக் கடல் பகுதிகளில் இன்று மணிக்கு 45 முதல் 65 கி.மீ வேகத்தில் பலத்த சூறாவளிக் காற்று வீசக்கூடும் என்பதால், மீனவர்கள் இப்பகுதிகளுக்கு மீன்பிடிக்கச் செல்ல வேண்டாம் என அறிவுறுத்தப்பட்டுள்ளனர்.

இதையும் படிங்க: டெல்டா மாவட்டங்களில் பலத்த காற்றுடன் கனமழை எச்சரிக்கை! சென்னை வானிலை அறிக்கை!

இதையும் படிங்க: சென்னை, திருவள்ளூர் உள்ளிட்ட மாவட்டங்களில் மழைக்கு வாய்ப்பு! வானிலை மையம் முக்கிய அறிவிப்பு!