சென்னை: தமிழக சட்டமன்றத் தேர்தலில் திமுக தலைமையிலான கூட்டணிக்கு பெரும்பான்மை கிடைத்தாலும், பாஜக திமுகவை உடைக்க முயற்சி எடுக்கும் என்று விடுதலைச் சிறுத்தைகள் கட்சி (விசிக) தலைவர் தொல். திருமாவளவன் எச்சரித்துள்ளார்.

ஒரு ஆங்கில தொலைக்காட்சி நேர்காணலில் பேசிய திருமாவளவன், தொகுதி ஒதுக்கீடு குறித்து விரிவாக விளக்கினார். “நாங்கள் 10 தொகுதிகளை எதிர்பார்த்தோம். ஆனால் தேமுதிக உள்ளிட்ட சிறிய கட்சிகள் கூட்டணியில் சேர்ந்ததால் தொகுதிகள் பகிர்ந்து அளிக்க வேண்டியதாயிற்று. இடதுசாரிகள், மதிமுக, இந்திய முஸ்லிம் லீக் உள்ளிட்ட கட்சிகள் தங்களுக்கான இடங்களை குறைத்துக் கொண்டன. 

கூட்டணியை தொடர வேண்டும் என்பதற்காக திமுக எங்களுக்கு 8 தொகுதிகள் ஒதுக்க முன்வந்தது. ஆரம்பத்தில் 7 தருவதாக சொன்னார்கள். நாங்கள் 8 கேட்டோம். பேச்சுவார்த்தையை நீண்ட நாட்கள் இழுக்க விரும்பாமல் 8 இடங்களுக்கு ஒப்புக்கொண்டோம்” என்றார்.

இதையும் படிங்க: டீக்கடையில் முதல்வர் ஸ்டாலின் ஓட்டு சேகரிப்பு!! அதிமுக கூட்டணி கட்சிகள் இரட்டை இலையில் ஏன் போட்டியிடவில்லை?

தொகுதிகள் குறித்து பேசிய அவர், “அனைத்து கட்சிகளுக்கும் கேட்ட இடங்கள் கிடைப்பது சாத்தியமல்ல. பல கட்சிகள் ஒரே தொகுதியை கேட்கும். காட்டுமன்னார்கோவில், செய்யூர், திருப்போரூர் ஆகிய மூன்று தொகுதிகளை முதலில் கேட்டு பெற்றோம். நாகை தொகுதி ஜவாஹிருல்லாவுக்கு ஏற்கனவே ஒதுக்கப்பட்டது எங்களுக்கு ஆச்சரியம் அளித்தது. 

அரக்கோணம் எங்களுக்கு கிடைத்தது. வானூர் கேட்டோம், கிடைக்கவில்லை. அதற்கு பதிலாக கள்ளக்குறிச்சி கிடைத்தது. தென்மாவட்டத்தில் இரு தொகுதிகள் கேட்டோம், பெரியகுளம் மட்டும் கொடுத்தனர்” என்று தெரிவித்தார்.

2021 சட்டமன்றத் தேர்தலிலேயே சட்டசபையில் போட்டியிட விரும்பியதாக சொன்ன திருமாவளவன், “பாராளுமன்றத்துக்கு சென்றது கௌரவம் தான். ஆனால் தமிழக அரசியலை பார்க்கும்போது பிராந்தியக் கட்சிகளை பலவீனப்படுத்தி தன்னை நிலைநிறுத்தும் பாஜகவின் உத்தி கவலை அளிக்கிறது. 

அதிமுக தலைமையிலான கூட்டணியை தேசிய ஜனநாயகக் கூட்டணி என்று பிரதமர் அழைக்கிறார். தேர்தலுக்குப் பிறகு வாக்கு சதவீதங்கள் தெரியவரும். கூட்டணிகள் மாறலாம். மற்ற மாநிலங்களில் செய்தது போல், திமுக பெரும்பான்மை பெற்றாலும் கட்சிகளை உடைத்து எம்எல்ஏக்களை தங்கள் பக்கம் இழுக்க பாஜக முயற்சிக்கும். இதுபோன்ற சூழலில் தமிழக அரசியலை விட்டு நான் விலகி இருக்கக் கூடாது” என்று வலியுறுத்தினார்.

திருமாவளவனின் இந்த பேட்டி, தமிழக அரசியலில் பாஜகவின் சாத்தியமான தலையீடு குறித்த விவாதத்தை தீவிரப்படுத்தியுள்ளது. விசிகவுக்கு 8 தொகுதிகள் ஒதுக்கப்பட்டிருப்பது கூட்டணியில் நல்லிணக்கத்தை காட்டினாலும், எதிர்கால அரசியல் மாற்றங்கள் குறித்த அவரது எச்சரிக்கை அனைவரின் கவனத்தையும் ஈர்த்துள்ளது. 

தமிழக சட்டமன்றத் தேர்தல் ஏப்ரல் 23ஆம் தேதி நடைபெற உள்ள நிலையில், கூட்டணி கட்சிகளிடையே உள்ள உறவுகள் மற்றும் சவால்கள் இன்னும் தீவிரமடைந்து வருகின்றன.

இதையும் படிங்க: மோடியும், நானும் காரியங்களை சிறப்பாக செய்து முடிப்பவர்கள்!! பலருக்கு இந்த தகுதி இல்லை!! ட்ரம்ப் சூசகம்!