தமிழகத்தின் புனிதமான கோயில்கள் பக்தர்களுக்கு அமைதியான வழிபாட்டிற்கும், ஆன்மிக அனுபவத்திற்கும் இடமாக விளங்குகின்றன. ஆனால் சமீப காலமாக சிலர் கோயிலுக்குள் செல்போன்களை எடுத்துச் சென்று படமெடுப்பதும், ரீல்ஸ் உருவாக்குவதும் அதிகரித்துள்ளது. இதனால் உண்மையான பக்தர்களின் அமைதி பாதிக்கப்படுவதுடன், கோயில்களின் புனிதத்தன்மையும் கேள்விக்குள்ளாகிறது. இந்த நிலையை கருத்தில் கொண்டு தமிழக இந்து சமய அறநிலையத்துறை முதன்மையான கோயில்களில் செல்போன் கொண்டு செல்ல தடை விதித்துள்ளது.

இந்த முடிவை அறிவித்தவர் இந்து சமய அறநிலையத்துறை அமைச்சர் எஸ். ரமேஷ் ஆவார். அவர் தமிழகம் முழுவதும் உள்ள முக்கிய கோயில்களில் வரும் செப்டம்பர் 1 ஆம் தேதி முதல் செல்போன் பயன்பாட்டை முழுமையாகத் தடை செய்வதாக தெரிவித்தார். கோயில்களின் கருவறையை படமெடுத்து சமூக ஊடகங்களில் பரப்புவது போன்ற செயல்களைத் தடுக்கவே இந்த நடவடிக்கை எடுக்கப்பட்டுள்ளது. இதற்காக ஒவ்வொரு முக்கிய கோயிலிலும் செல்போன்களை பாதுகாப்பாக ஒப்படைக்கும் மையங்கள் அமைக்கப்பட்டுள்ளன.

இந்த தடை திருவண்ணாமலை அண்ணாமலையார் கோயிலிலும் அமலுக்கு வரவுள்ளது. உலகப் புகழ்பெற்ற இந்த அக்னி தலத்திற்கு தினமும் ஆயிரக்கணக்கான பக்தர்கள் வருகை தருகின்றனர். பெளர்ணமி கிரிவலம், கார்த்திகை தீபம் போன்ற சிறப்பு நாட்களில் லட்சக்கணக்கானோர் கூடுவதுண்டு. இத்தகைய புனிதமான இடத்தில் செல்போன் பயன்பாட்டால் ஏற்படும் இடையூறுகளைத் தவிர்க்கவே இந்த முடிவு எடுக்கப்பட்டுள்ளது.அண்ணாமலையார் கோயில் நிர்வாகம் பக்தர்களின் வசதிக்காக ஐந்து இடங்களில் செல்போன் பாதுகாப்பு மையங்களை அமைத்துள்ளது. கிழக்கு ராஜகோபுரம் அருகே இரண்டு மையங்களும், வடக்கு அம்மணி அம்மன் கோபுரம் அருகே இரண்டு மையங்களும், தெற்கு திருமஞ்சன கோபுரம் அருகே ஒரு மையமும் உள்ளன.

இதையும் படிங்க: தி.மலை இடுக்கு பிள்ளையார் கோவில்... பறிபோகும் உயிர்கள்..! உடல் பருமன் உள்ளவர்களுக்கு தடை..!

பக்தர்கள் தங்களது செல்போன்களை இந்த மையங்களில் ரூபாய் ஐந்து கட்டணம் செலுத்தி ஒப்படைத்து டோக்கன் பெற்றுக்கொள்ளலாம். தரிசனம் முடிந்த பிறகு அந்த டோக்கனைக் காட்டி மீண்டும் செல்போனைப் பெற்றுக்கொள்ளலாம்.தடையை மீறி யாரேனும் மறைமுகமாக செல்போனை உள்ளே எடுத்துச் சென்றால் அது உடனடியாகப் பறிமுதல் செய்யப்படும். அத்துடன் காவல்துறை மூலம் சட்டப்பூர்வ நடவடிக்கையும் எடுக்கப்படும் என கோயில் நிர்வாகம் எச்சரித்துள்ளது. இந்த நடவடிக்கை கோயிலின் புனிதத்தன்மையைப் பாதுகாப்பதற்கும், பக்தர்கள் அமைதியாக தரிசனம் செய்வதற்கும் உதவும் என எதிர்பார்க்கப்படுகிறது.

இதையும் படிங்க: ரூ.125 கோடி திட்டம்... கோயில்களுக்கு மெகா அப்டேட்..! அமைச்சர் ரமேஷ் அதிரடி..!!