சென்னையில் கடந்த இரவு முழுவதும் கொட்டித் தீர்த்த கனமழையால் பல பகுதிகளில் மழைநீர் தேங்கியதால் பொதுமக்கள் பெரிதும் பாதிக்கப்பட்டனர். குறிப்பாக தியாகராய நகர் தொகுதியில் வெள்ள பாதிப்புகள் அதிகமாக இருந்ததால், அப்பகுதியின் அமைச்சர் ஆனந்த் நேரில் சென்று ஆய்வு மேற்கொண்டார்.

அமைச்சர் ஆனந்த் இருசக்கர வாகனத்தில் தனது தொகுதிக்குச் சென்று மழைநீர் தேங்கியுள்ள இடங்களை ஆய்வு செய்தார். தி.நகர் பகுதிகளில் குறிப்பாக பசுல்லா சாலை மற்றும் பனகல் பூங்கா அருகே மழைநீர் அதிக அளவில் தேங்கியிருந்தது. சாலைகளில் தண்ணீர் தேங்கியதால் போக்குவரத்து பாதிக்கப்பட்டதுடன், வீடுகளுக்கும் கடைகளுக்கும் நீர் புகுந்ததால் மக்கள் கஷ்டப்பட்டனர்.

இந்த நிலையில் மாநகராட்சி ஊழியர்கள் உடனடியாக களத்தில் இறங்கி பணியில் ஈடுபட்டனர். தேங்கிய மழைநீரை அகற்ற மோட்டார்கள் மூலம் தண்ணீரை வெளியேற்றும் பணிகள் தீவிரமாக நடைபெற்று வருவதாக அமைச்சர் தெரிவித்தார். பசுல்லா சாலை மற்றும் பனகல் பூங்கா பகுதிகளில் தொடர்ந்து மோட்டார் மூலம் நீர் வெளியேற்றப்பட்டு வருகிறது. இதனால் சாலைகளில் தேங்கியிருந்த நீர் படிப்படியாக குறைந்து வருகிறது.

இதையும் படிங்க: சென்னையில் கனமழை எதிரொலி: ரிப்பன் மாளிகை கட்டுப்பாட்டு அறையில் முதல்வர் விஜய் நேரில் ஆய்வு!

அமைச்சர் ஆனந்த் ஆய்வின்போது பாதிக்கப்பட்ட மக்களுடன் பேசி அவர்களின் கவலைகளை கேட்டறிந்தார். மேலும் மாநகராட்சி அதிகாரிகளுக்கு உரிய அறிவுரைகளை வழங்கி, விரைவில் நிலைமையை சீர்செய்யும்படி வலியுறுத்தினார். கனமழையால் ஏற்பட்ட இந்த வெள்ள பாதிப்புகளை முழுமையாக சரிசெய்வதற்கு அனைத்து முயற்சிகளும் மேற்கொள்ளப்படும் என அவர் உறுதியளித்தார்.

இதையும் படிங்க: நாதக கார்த்திகாவுக்கு ரிமாண்ட்.! அதிகாலை கைதும்... 15 நாள் சிறையும்..! பரபரக்கும் தாராபுரம்..!