தமிழகச் சட்டமன்றத் தேர்தல் பிரச்சாரம் இறுதிக்கட்டத்தை எட்டியுள்ள நிலையில், தவெக தலைவர் விஜய் குறித்து அதிமுக கொள்கைப் பரப்புத் துணைச் செயலாளரும், நடிகையுமான விந்தியா கடுமையான விமர்சனங்களை முன்வைத்துள்ளார்.

நடிகர் விஜய்யைத் தமிழக மக்கள் இன்னும் ஒரு அரசியல் தலைவராகப் பார்க்கவில்லை. அவர் செல்லும் இடங்களில் கூடும் கூட்டம் எல்லாம் வெறும் ரசிகர் கூட்டம் மட்டுமே. ஒரு நடிகரைப் பார்ப்பதற்கான ஆர்வத்தில் ரசிகர்கள் செல்கிறார்களே தவிர, தமிழக மக்கள் யாரும் அவரைத் தேடி ஆர்வமாகச் செல்லவில்லை என விந்தியா எள்ளி நகையாடினார்.

விஜய்யின் அரசியல் முதிர்ச்சி குறித்துப் பேசிய அவர், தனது உயிருக்கே யாரிடம் பாதுகாப்பு கேட்க வேண்டும் என்று கூடத் தெரியாத ஒரு நபர், நாளை இந்த நாட்டு மக்களை எப்படிப் பாதுகாப்பார்? அரசியலில் 'அ' என்ற எழுத்தைக் கூடத் தெரியாதவர் அவர். முதலில் அரசியல் அரிச்சுவடியைக் கற்றுக்கொண்டு, பிறகு அவர் அரசியலுக்கு வரட்டும் எனச் சாடினார்.

இதையும் படிங்க: கேமரா சின்னத்தில் 234 தொகுதிகள்! திமுக-விற்கு போட்டியாக வேல்முருகன் அமைத்த புதிய மெகா கூட்டணி!

மயிலாப்பூரில் அதிமுக பொதுச்செயலாளர் எடப்பாடி பழனிசாமி தேர்தல் பிரச்சாரத்தைத் தொடங்கியது குறித்து உதயநிதி ஸ்டாலின் விமர்சித்திருந்த நிலையில், அதற்கு விந்தியா பதிலடி கொடுத்தார்: மயிலாப்பூரில் இபிஎஸ் பிரச்சாரம் செய்தால் உதயநிதிக்கு ஏன் கோபம் வருகிறது? காஞ்சிபுரத்திற்கும் உதயநிதிக்கும் என்ன தொடர்பு இருக்கிறது என்று யாராவது கேட்டுச் சொல்லுங்கள். தனது சொந்தத் தொகுதியைப் பார்க்காமல் ஊர் ஊராகச் சென்று உதயநிதி பேசுவது வேடிக்கையாக இருக்கிறது" எனத் தெரிவித்தார்.

இதையும் படிங்க: கரூர் எப்போதுமே கழக ஊர் தான்! செந்தில் பாலாஜியை புகழ்ந்து தள்ளிய முதலமைச்சர் ஸ்டாலின்!